Mise 5 - Bible azumeina

Betelehem nandagad’a hamul ma sutid’a

¹ Ang azì ma Betelehem ma Efrat-na, ang ma akid’eid’a aduk azì ma dudubu ma Juda-nina, man ma mba mi te yam Israel-lîna mba mi ndeï ni kurungû, ni ma andjavam tcholï adjeu dedeina.

² Ma didina mba mi ar sum mama woi gak bur ma atcha d’a ti vut gorîd’a ti vud’um tua, suma a mba ar kur magombina a mba hulongî a zlap ki b’oziyozi Israel-lâ.

³ Gor ma a vud’um máma mba mi polozi kad’enga hi Ma didinid’a ki ngola hi Ma didina Alo mamid’a. Azi mba kak ki halasa, kayam suma a suburum gak avun dabid’a handagad’id’a.

⁴ Ni mam ba, mba mi mba ki b’leng nga halasa. Ata yima suma Asiri-na a mba mba kur ambas meid’a, a mba kal kur azì mei ma ad’eng ma ngungunina, ei mba tcholei ki suma nglo suma avok sumina ablaud’a á duruziya.

⁵ A mba te yam ambas sa Asiri d’a hi Nimrot-ta ni kahle mazi suma sïna. Ata yima suma Asiri-na a mba mba yam ambas meid’a a mba kal yam andaga meid’ina, mam mba mi pad’ei woi aboziya.

Israel suma á arâ a nga aduk andjaf suma

⁶ Andjafâ hi Jakob ma arâ mba mi kak aduk andjaf ma ablauna d’igi mbad’ï d’a ti tcholï ata Ma didinid’a na, d’igi alo ma mi se yam asunina na. A mba tin huruzi yam sa d’i, a mba ka’î yam sa d’uo mi.

⁷ Andjafâ hi Jakob ma arâ mba mi kak aduk andjaf ma ablauna d’igi azlona aduk amburei suma aduk agud’ina na, d’igi azlo ma azongâ aduk kangâna haho’îna na. Ata yima mi kalâ, mi ve, mi kizak keyo, sama mi prut va woi aboma nga d’i.

⁸ Ang hlabong akulo yam mang suma djangûna, ar ang kizagazi woi pet!

Ma didina mba mi pleî ahle suma hawa ya’â woyo

⁹ Ma didina mi dala: Kur bur máma an mba ni tchagi akulumei magina woyo, an mba ni b’lagagi pus magi ma dur ayîna woi mi.

¹⁰ An mba ni b’lagagi azì magi ma nglo ma kur ambas magid’ina woyo, an mba ni b’lagagi azì magi ma ad’eng ma ngunguna woi pet mi.

¹¹ An mba ni dap magi suma kumana woyo, a mba fe sama mi djop ki tchitchiud’ina avo hatagi d’uo mi.

¹² An mba ni to filei magina kahina magi d’a tcheta woyo, agi mba kud’urogi ahle suma agi minizi kabogina d’uo d’a.

¹³ An mba ni kus agu ma agi pum malo d’a a yat ala Asera d’a na woyo, an mba ni b’lagagi azì magi ma nglona woyo.

¹⁴ An mba ni hlatchugulun kayîna ki hurun ma zal ma gugulu’â kandjaf suma a nga humun vunan nduo na.