Josue 13 - Bible azumeina

B’RAUD’A HAMBASID’A ( 13—21 ) Ambas sa ar bei hled’a tua d’a

¹ Josue mi mbut mamara, bizam kal ngola. Ata yi máma Ma didina mi dum ala: Gola! Ang mbut wa mamara, bizang kal wa ngola mi. Ambas sa ar bei hled’a tua d’a ti ngola heî.

² Ambas sa ar bei hled’id’a ba wana: Ambasa hi suma Filistê-nid’a pet kambasa hi suma Gesur-rîd’a pet,

³ tinï ad’ud’a Sihor ra nga avok Ezipte-d’a dei gak mba yo hagad’a ki Ekron. Ni yima suma Kanan-na a te kam adjeuna, ni yima amulei suma vahl suma Filistê-na a nga te kama, nala, azì ma Gaza-na, ma Asdot-na, ma Askalon-na, ma Gat-na ki ma Ekron-na ki suma Af-fâ.

⁴ Ambas sa ar bei hled’a abo ma sutnid’a ba wana: Ambasa hi suma Kanan-nid’a pet ki Meyara d’a hi suma Sidon-nid’a gak mba Afek, gak mba yo hagad’a ki suma Amor-râ,

⁵ kambasa hi suma Giblos-sîd’a, ki Liban nda abo ma yorogonid’a tinï ad’ud’a Bäl-Gad ad’u ahina d’a Hermon-nda dei gak mba avun azì ma Hamat-na,

⁶ ki suma nga kaka yam ahinad’ina pet, tinï ad’ud’a Liban dei gak mba Misrefot-Mayim ki suma Sidon-na pet. An mba ni digizi woi avok Israel-lâ. Ki tchetchemba, ang b’rau ambas ndata mi Israel-lâ ni ki togina d’igi an hang vuna na.

⁷ Ang b’rau ambas ndata mandjaf ma zlengîna kabo andjafâ hi Manase-na mi.

A b’rau ambas sa sä abo Jurdê woi hid’a

⁸ Andjafâ hi Ruben-na, andjafâ hi Gad-na kabo andjafâ hi Manase-na, a b’rawazi ambas sa sä abo alum ma Jurdê-na woi hî abo ma yorogonid’a. Ni Moise azongâ hi Ma didinina ba, mi b’rawaziziya.

⁹ Ambas mazid’a tinï ad’ud’a Arower avun alum ma Arnon-na ei kur azì ma ngol ma kä kur horina dei gak mba hur ful la papana d’a Medeba-d’a gak mba Dibon,

¹⁰ zlapa kazì ma nglona hi Sihon amul ma Amor ma te yam Hesbon-na gak mba yo hagad’a ki suma Amon-na,

¹¹ zlapa kambas sa Galät-ta, ambas hi suma Gesur-rîd’a ki d’a hi suma Mäka-nid’a zlapa kahina d’a Hermon-nda pet kazì ma Basan-na pet gak mba Salka,

¹² zlapa ki leud’a hi Ok amul ma Basan ma mi te yam Astarot ki Edrei-na pet, ni ma tu ma danan ma ad’u andjafâ hi suma Refa-nina. Moise mi dur amulei ndazina adjeu, mi digizi woyo.

¹³ Wani Israel-lâ a dik nga suma Gesur-râ ki suma Mäka-na woi d’i. Sum ndazina a nga kaka aduk Israel-lâ gak ini.

¹⁴ Nandjafâ hi Levi-na hol ba, Moise mi hum nga andagad’a djona d’i, kayam ahle suma ngat buzu suma a hazi he d’a hawa d’a ngala mi Ma didina Alona hi Israel-lîna ni djo mama d’igi Ma didina mi hlum vunam na.

¹⁵ Moise mi b’rau andagad’a djona mandjafâ hi Ruben-na nad’u adezeziya, ad’u adezeziya.

¹⁶ Andaga mazid’a tinï ad’ud’a ni Arower avun alum ma Arnon-na ei kur kazì ma kä kur horina dei gak mba hur ful la papana d’a go ki Medeba-d’a,

¹⁷ zlapa ki Hesbon kazì mam ma nglo ma hur ful la papanid’ina pet zlapa ki Dibon, ki Bamot-Bäl, ki Bet-Bäl-Meyon,

¹⁸ ki Jahas, ki Kedemot, ki Mefat,

¹⁹ ki Kiriyatayim, ki Sipma, ki Seret-Sahar ra yam ahina d’a kur horid’a,

²⁰ zlapa ki Bet-Peyor, kahina d’a Pisga-d’a yat ma sulugot kä na ki Bet-Jesimot,

²¹ zlapa kazì ma nglo ma hur ful la papanid’ina, ki leud’a hi Sihon amul ma Amor ma mi te leud’a avo Hesbon-na pet mi. Ni ma Moise mi kus kam kamulei suma Madiyan-na, nala, Evi, Rekem, Sur, Hur ki Reba; namulei suma Sihon mi te kazi suma a nga kaka kur ambas ndatina.

²² Aduk suma Israel-lâ a tchazi ki mbigeu d’a fiyakina, ma djopa Baläm Beyor goroma mi nga adigazi mi.

²³ Andjafâ hi Ruben-na haga mamba nalum ma Jurdê-na ki gongôd’i mamba. Wana ni djo ma a hum mandjafâ hi Ruben-nina, ad’u adezeziya, ad’u adezeziya, azì ma nglona kazì ma gureina mi.

²⁴ Moise mi b’rau andagad’a djona mandjafâ hi Gad-na nad’u adezeziya, ad’u adezeziya.

²⁵ Andaga mazid’a tinï ad’ud’a ni Jazer kazì ma nglo ma Galät-na pet kabo ambasa hi suma Amon-na gak mba Arower ra ngagad’a yam Raba-d’a.

²⁶ Ti hleï Hesbon gak ti mba Ramat-Mispe ki Betonim, ti kal ti i Mahanayim gak mba yo hagad’a ki Debir.

²⁷ Ti kal i kur hora. Azì ma kurutna ni Bet-Haram, Bet-Nimra, Sukot ki Safon; ni leu d’a ara hi Sihon amul ma Hesbon-nid’a. Haga mazid’a nalum ma Jurdê-na gak mba avun apo d’a Kineret-ta sä abo alum ma Jurdê-na woi hî abo ma yorogonid’a.

²⁸ Wana ni djo ma a hum mandjafâ hi Gad-nina ad’u adezeziya, ad’u adezeziya, azì ma nglona kazì ma gureina mi.

²⁹ Moise mi b’rau andagad’a djona mabo andjafâ hi Manase-na nad’u adezeziya, ad’u adezeziya.

³⁰ Andaga mazid’a tinï ad’ud’a Mahanayim zlapa kazì ma Basan-na pet, ki leud’a hi Ok amul ma Basan-nid’a pet zlapa kazì ma ngol ma Jayir ma kur Basan ma dok karagayana mi.

³¹ Abo azì ma Galät-na ki Astarot ki Edrei nazì ma nglo ma kur leud’a hi Ok amul ma Basan-nina, azì máma a humî mabo andjafâ hi Makir ma Manase goromina.

³² Wana nandaga d’a Moise mi hat djona sä abo alum ma Jurdê-na woi hî ngagad’a yam Jeriko abo ma yorogona kid’a mam nga abagei hur ful la Mowap-pid’a.

³³ Wani Moise mi he nga andagad’a djona mandjafâ hi Levi-na d’i, kayam Ma didina Alona hi Israel-lîna ni djo mazina d’igi mam dazi na.