Isai 56 - Bible azumeina

WAL LA HINDID’A (a) NGOPA KI VUN MA HLED’A ( 56—66 ) A mba dik sa woi d’uo d’a

¹ Ma didina mi dala: Agi ngomogi gagazid’a, agi tid’igi yam d’ingêra, kayam sut manda ti ar wa go á mbad’a, d’ingêr manda nga d’i nde tat tei abua.

² Sama mi le vama an duma, ma nga tchola ngingringâ, ma nga mi ngom bur ma sabatna á mbud’um ndjendjed’a d’uo na, ma nga mi d’el tam mbei ata tcho d’a lara ge petna, mi le furîd’a.

³ Ar andjaf ma ding ma mi djin tam ki Ma didinina mi dala: Gagazi, Ma didina mba mi walan ndei ki sum mama d’i, ar adimbangâ mi dala: An nagu ma so ganangû d’uo mi.

⁴ Kayam Ma didina mi de mi adimbang suma a nga ngom bur ma sabatna suma a mba man ahle suma an tan lan djivid’a kazi suma a mba kak ngingring yam vun man ma djindina ala:

⁵ An mba ni b’irizi simiyêzi kur gulumuna hi gong man nda kud’orina an mba ni yazi ki simi ma djivi ma kal simina hi gro andjofâ ki ma hi gro aropmina, an mba ni tinizi simi ma didin ma bei tchum mbei ba na mi.

⁶ Wani andjaf suma ding suma a mba zlap ki an Ma didina á lan sunda, á le yam simiyên an Ma didina, á kud’uron suma pet suma a mba ngom bur ma sabatna á mbud’um ndjendjed’a d’uo suma a mba kak ngingring yam vun man ma djindina,

⁷ an mba ni mbazi yam ahina man nda an tinit irat vata, a mba le furîd’a kur gong man nda tchenda mi. He mazi d’a hawa d’a ngala kahle mazi suma ngat buzuna a mba mbut nahle suma his suma afufuîna yam yi man ma ngal ahle suma ngat buzuna, kayam a mba yi gong manda ala Gong nga tchen nda yam suma peta.

⁸ Salad’a Ma didin ma mi tok Israel suma a b’rau woina, mi dala: An mba ni togï suma dingâ kua yam suma an togozi dana.

Suma hat suma a ndak nga d’uo na

⁹ Agi amburei suma abageina kamburei suma aduk agud’ina pet, agi mbeyegï á tagi tena.

¹⁰ Suma ndjola hi Israel-lîna pet ni suma duka, a ni suma bei wed’a. Azi pet nadurei suma ngela, a ndak nga á bud’a d’i; azi ni suma adïd’a dazina; a burî kä, a tcho’î sena vam tu.

¹¹ Azi nadurei suma d’od’ok suma a nga hop ki va d’uo na, azi ni suma pol suma bei wäd’u zlad’ina, azi pet nge nge pî, mi hle ni lovot mamba, nge nge pî, mi halî djivi d’a yam mam tambid’a mi.

¹² Azi nga dala: Agi mbeyegïya, ami i halagï süm guguzlud’a, ei mba gurud’i ki süm ma ayîna, ei mba lei avin ni d’igi ini hina dedege. Ad’um mba d’i ar kä woi ngola.