Isai 18 - Bible azumeina

Zla d’a a dat mi suma sun suma Etiyopi-nid’a

¹ Alë! Ndak ambas sa gigingâ nga mi vet ta sä abo alum ma Etiyopi-na woi hî d’a,

² ndak nga d’i sun suma sunda yam alum ma Nil-lâ kalum mba tchereuna. Agi suma sun suma afefetna, agi igi avo hi suma fuyogei suma babagazi akulongôd’id’ina, avo hi suma suma yam andagad’ina pet a nga lazi mandarazina, avo handjaf suma sib’ik suma a nga miret mazi suma djangûna kä kasezina, agi hulongôgi kur ambas magi d’a aluma mi walat tei aduk tetenga.

³ Agi suma pet suma nga kaka kur duniyad’ina, agi suma nga kak kä yam andagad’ina, agi gologi drapo d’a taka ata yima a pat akulo yam ahuniyônina, agi humugi adifa ata yima a butna.

⁴ Kayam Ma didina mi dan ala: An nga ni mbut tan ndoze hle tan á gola b’enek ki, d’igi huwaka hafat ta b’o yinid’a na, d’igi d’ugul la ti ge mbad’ïd’a ata yima fet awunid’a na.

⁵ Avok ka bei yima feta ndaka, ata yima b’od’a yak keina, ata yima b’od’a ti tchuk vuta ti nena, a tchau abo guguzlud’a abot ma gurei ma kukulurâ kä woyo, a ka abo guguzlud’a abot ma sed’a, a tchugum kä woi andaga.

⁶ Azi ki zla tazi pet a mba arazi woi maluwei suma yam ahuniyô suma a te hliunina, mamburei suma yam andagad’ina mi. Aluwei suma te hliuna a mba tchawalid’a ki hliwiziya, amburei suma yam andagad’ina pet a mba tchi vun simetna ki sed’ezi mi.

⁷ Kur atchogoi ndata, suma a mba mba ki he d’a hawad’a mi Ma didin ma ad’engêm kal petna. Ni he d’a hawad’a hi suma fuyogei suma babagazi akulongôd’id’ina. Ni suma suma yam andagad’ina pet a nga lazi mandarazina. Nandjaf suma sib’ik suma a nga miret mazi suma djangûna kä kasezi suma aluma mi wal ir ambas mazid’a woi tetengâ. A mba i ki sed’et ata yima Ma didin ma ad’engêm kal petna mi tak simiyêm mbei kua yam ahina d’a Siyon-ndina.