Isai 15 - Bible azumeina

Hor ma ge ma yam Mowap-ma

¹ Wana ni zla d’a a dat yam suma Mowap-mid’a: Gagazi, kur andjege d’a tud’a a b’lak azì ma Ar ma Mowap-ma woyo, mi mbut vama hawana; gagazi, kur andjege d’a tud’a a b’lak azì ma ngol ma Kir ma Mowap-ma woyo, mi mbut vama hawana mi.

² Suma Dibon-na a djak akulo kur gong nga fileina yam yima ndingâ á tchina, suma Mowap-ma a nga tchi yam Nebo ki Medeba, a wel yazi woyo, a tchau dudumazi woi pet mi.

³ A nga tit ir palumba ki baru d’a dodora ataziya, a nga yor tazi akulo yam azuweina, yam yima suma a tok tazi kuana mi. Nge nge pî nga mi tchiya, simina nga mi djang kä iramu.

⁴ Suma Hesbon-na ki suma Elale-na a nga er ad’uzi akulo, suma a nga humuzi delezi sä woi Jahas. Kayam ndata, azigar suma dur suma Mowap-ma a nga tchi wulula, a nga zlak mi.

⁵ An nga ni tchi kurun krovo yam Mowap, kayam sum matna a ring gak a i Sowar, gak a mba Eglat-Selisiya. Azi nga tchi irazi glovot ata yima a nga djak akulo Luhit-na, a nga tchi wulula irazi kur glovot ta i Horonayim-mba abo b’lak ka d’i mba kazid’a.

⁶ Mbiyo ma Nimrim-ma mi so woyo, asuna mi so woyo, gered’etna mi so woi mi, asu ma nguloma nga d’uo d’a.

⁷ Kayam ndata, a yo ahle mazina ad’uzi d’a ara, a i kahle suma a ngomozina sä abo toliyon nda Da’ara woi hî.

⁸ Wulul mazid’a ti nde sä woi ir haga d’a Mowap-pa pepet, tchi mazi ma hohoud’a mi i gak mi nde sä woi Eglayim, tchi mazi máma mi nde sä woi Ber-Elim mi.

⁹ Toliyon nda Dimon-nda mba d’i mbut buzuna. Ma didina mi dala: An mba ni sunï ndak ka dinga yam suma Dimon-na, an mba ni sunï azlona ata suma Mowap suma a sutna, ata ad’uzi d’a ar yam andaga mazid’id’a mi.