Wana ni mbaktumba hi Oze-d’a 9 - Bible azumeina

Ahlena hi Israel-lîna a mba dap pei pet

¹ Agi Israel-lâ, agi lagi furîd’a d’oze hur ma hapma d’igi andjaf suma dingâ na d’i, kayam agi walagi woi kAlo magina á lagi gaulangâ, agi nga minigi wurak ka ata yat tuo d’a ata yima lara ma a nga to gemena kuana.

² Yima to gemena ki yima miret guguzlud’a, agi mba fagi va kua d’i. Süm guguzlu d’a awilid’a pî, agi mba fum mbuo mi.

³ Suma Efraim-ma a mba kak kur ambasa hi Ma didinid’a d’i. Azi mba hulong kur ambas sa Ezipte-d’a, a mba i Asiri á te te ma ndjendjed’a.

⁴ Suma Efraim-ma a mba he he d’a hawa d’a süm guguzlud’a d’i; ahle mazi suma ngat buzuna Ma didina tam mba d’i lum djivid’a kazi d’i. A mba mbut ni d’igi te ma hohoud’a na kaziya. Suma pet suma a mba tazina a mba mbut ndjendjed’a, kayam te mazina mba mi arî kazi azi hol, a mba i ki te máma kur gong nga kud’ora hi Ma didinid’a d’i.

⁵ Agi mba lagi ni nana kur bur ma vun til ma a ngama, kur bur ma vun tilâ hi Ma didinina ge?

⁶ Fata agi mba ringîgi abo b’lak ka mba d’i mba yam ambasid’a, Ezipte-na a mba yogiya, azì ma Memfis-sâ mba mi mbut ni yima a tozogi kuana. Kekerezeuna mba mi se yam kawei magi ma hap ma djivi ma kal teglesâ, aweid’a mba d’i se kur zlub’u magid’a mi.

⁷ Bur ma Ma didina mba mi mba á ngobogina nga mi djïya. Gagazi, bur ma hlatchugula nga mi djïya. Agi Israel-lâ, agi mba wagiziya. Agi nga dagi ala: Ma djok vun Alona mi ni lilid’a, sama Muzu’â nga mi zud’uma ni sama yam nga d’uo na. Tcho magi d’a bei dap ndumba ki murud’um magid’a a kal ngola heî.

⁸ Sama kak ndjola yam suma Efraim-ma ni ma djok vuna zlapa kAlona, wani dauna mi nga gunda kä kur lovot mam mba lara ge d’a mam nga mi tit kuad’a. Kur ambasa hAlo mamid’a, mam fe ni d’ugura vat tu.

⁹ Agi tub’agagi tagi ki tchod’a d’igi agi lagi adjeu avo Gibeya na, wani Ma didina nga mi djib’er yam tcho magid’a, mba mi ngobogi yam tchila magid’a.

Suma a tin nga huruzi yam Ma didina d’i

¹⁰ Ma didina mi dala: An fe Israel-lâ nabagei hur fulâ d’igi guguzlud’a na, an wabuyozi ngolo ni d’igi vud’a tulum ma mi ne avo’â na, wani a i bugol alo ma a yum ala Bäl-Peyor-râ, a tin tazi irat vat mi va mazi ma ndjendjed’a, a mbut ndjendjed’a d’igi va mazi ma huruzi vuma na.

¹¹ Suma Efraim-ma, subur mazid’a mba d’i pir d’igi aleina na, a mba vut tuo, a mba vut gor ruo, atcha mba d’i ve wir ruo mi.

¹² Le azi nga wul grozina pî, an mba ni yozi woi avok bei a djeng suma. Fata an mba ni wal ki sed’ezid’a ni zla d’a hohoud’a kaziya.

¹³ Suma Efraim-ma a nata yima djivina d’igi Tir na, wani a mba he grozina abo ma tchi suma.

¹⁴ Ma didina, ang haziya, ang hazi ni me ge? Ang hazi azì gro ma mi tchuk grona woina! Ang hazi napo ma sid’amba b’agadjana!

¹⁵ Asa’at mazid’a ti nde woi navo Gilgal. Ni kua ba, an noyôzi woyo. An mba ni digizi woi avo hatan yam tcho mazi d’a azi lata, an mba ni le kazi baba d’uo d’a, kayam mazi suma nglo suma avorozina pet a ni suma bei hum vuna ba na.

¹⁶ Suma Efraim-ma, a kazi woyo, sideyezi mi so woyo, a mba vut ti. Le azi nga ki grona pî, an mba ni tchazi grozi suma huruzi vazi heîna woyo.

¹⁷ Alo mana mba mi arazi woyo, kayam azi humum nga vunam mbi. Azi mba b’rau woi aduk andjaf suma yayak.