Amos 3 - Bible azumeina

Suma hAlonina a mba mba ki zla mazid’a avoromu

¹ Agi Israel-lâ, agi andjaf ma an buzugumi woi yam ambas sa Ezipte-d’ina, agi humugi zla d’a an dagizid’a.

² Ni agi hol ba, an managi aduk andjaf suma pet. Ni kayam ndata ba, an mba ni mba á ngobogi yam tcho d’a agi lata.

Ma didina mi de zlad’a; ma djok vuna mi ba vunam mbi

³ Suma mbà a tit ad’u tazi ni bei zla mazid’a ndjak su?

⁴ Azlona bei mi ve va ba ni, mi to breîd’a aduk agud’a zu? Gor azlona bei mi ve va ba ni, mi er ad’um tchina ata yam ma domina zu?

⁵ Aleina mi ve ki dauna ni bei a gunum kä zu? Dauna mi yet akulo ni bei mi ve va zu?

⁶ Le adif fa ayîna ti tchi kur azì ma ngolâ ni, suma a ba bei le mandarâ zu? Na ni ndaka ti mba kur azì ma ngolâ bei Ma didina mi wat tchu?

⁷ Gagazi, Salad’a Ma didina nga mi le va gumun bei mi tagam mbei mazungeî mam suma djok vuna d’i.

⁸ Azlona le mi breyâ ni, ni nge ba, mi le mandarâ d’uo ge? Salad’a Ma didina le mi de ni, ni nge ba, mi djogom vunam mbei d’uo ge?

B’laka hi Samari-d’a

⁹ Agi tchagi wala akulo yam azì ma amul ma Asdot-na, yam azì ma amul ma Ezipte-na ala: Agi togogi tagi akulo yam yima nding ma Samari-na, agi gologi siwel la gandjaud’a ki murud’um mba a nga lat ata tazid’a.

¹⁰ Ma didina mi dala: Azi nga we lovota á le sun nda ata yata d’i, a nga tok ahle suma a b’ad’azi abo suma kad’enga a hurumuzina kur azì mazi ma amula.

¹¹ Ni kayam ndata ba, Salad’a Ma didina mi dala: Gola! Agi suma Samari-na, ma djangûna nga mi ngui ambasa, mba mi b’lagagi aziyagi ma ad’eng ma ngunguna woyo, mba mi hurum ahle suma kur aziyagi ma amulina mi.

Sut ta hohoud’a

¹² Gola! Ma didina mi dala: A mba sut Israel suma a nga kaka kä Samari yam azangâ ki tapi ma djifîna, ni d’igi ma pola mi prut asema mbà d’oze abo humba avun azlona na.

Ge humba

¹³ Salad’a Ma didina Alo ma ad’engêm kal petna mi dala: Agi humugiya, agi i dagi zla d’a wanda woi mandjafâ hi Jakob-ma:

¹⁴ Kur bur ma an mba ni mba á ngop Israel-lâ yam tcho mazid’ina, an mba ni to yima ngal ahle suma ngat buzu ma Betel ma tetengâ kä woyo, kengêm ma djidjid’engâ mba mi dris kä woi andaga mi.

¹⁵ An mba ni to azì ma andolâ kazì ma vun simetnina kä woyo. Azì ma a d’udjom ki sï ahlo’îna mba mi b’lak keyo, azina hi suma nglonina a mba tom kä woi ndjandjap. An Ma didina ni de na.