Amos 2 - Bible azumeina

(f) Mi ngop Mowap-ma

¹ Ma didina mi dala: Suma Mowap-ma a nga i avogovok kur tchod’a wan pî, an mba ni djok vunan yam zla d’a an data d’i. Kayam azi ngal asok amul ma Edom-ma woi á mbud’um butna,

² an mba ni do akud’a ata azì ma ngol ma Mowap-ma, ti mba d’i ngal azì ma ad’eng ma ngungu ma Keriyot-na woyo, suma Mowap-ma a mba dap pei aduk siwela hayînid’a, aduk tchina hadifina mi.

³ An mba ni tchamul mazina woi adigaziya, an mba ni tchi mam suma nglona zlapa ki sed’em mi. An Ma didina ni de na.

(g) Mi ngop Juda-na

⁴ Ma didina mi dala: Suma Juda-na a nga i avogovok kur tchod’a wan pî, an mba ni djok vunan yam zla d’a an data d’i. Kayam azi ar gata hi an Ma didinid’a ki vun man ma hed’a woyo, kayam azi vit tazi woi ki filei ma ka zla ma abuyozi ngolo a he tazi kama,

⁵ an mba ni do akud’a ata azì ma ngol ma Juda-na, ti mba d’i ngal azì ma ad’eng ma ngungu ma Jerusalem-ma woi mi.

ALONA MBA MI KA SARIYAD’A YAM ISRAEL-LÂ ( 2.6—6.14 ) (h) Mi ngop Israel-lâ

⁶ Ma didina mi dala: Israel-lâ a nga i avogovok kur tchod’a wan pî, an mba ni djok vunan yam zla d’a an data d’i. Azi gus suma d’ingêrâ woi yam kawei ma hapma, a gus ma houd’a woi yam atuguru ma ir tchuka tuna,

⁷ a nga miret yam suma kid’aka kä, a nga hum zlad’a hi suma houd’id’a ata yima ka sariyad’a d’i. Gora kabum a nga zlap yam gor atcha d’a tud’a á b’lagan simiyên ma bei tchod’a ba na woyo.

⁸ A nga bur kä gen yima ngal ahle suma ngat buzu ma lara ge yam baru d’a suma houd’a a nga dengêzizid’a, a nga tche süm guguzlud’a kur gonga halo mazinid’a ki bege d’a a kat yam suma ata lovod’ot tuo d’a.

⁹ Hina pet pî, an tchi suma Amor suma fuyogeid’a d’igi agu sedrena na suma ad’engêzi d’igi agu sena na na woi avoroziya, an tchazi vud’uzi woyo, an sozi sideyezi woi mi.

¹⁰ Wani avok ahle ndazina, an buzugugï woi yam ambas sa Ezipte-d’a, an tit ki sed’egi abagei hur fulâ bizad’a dok fid’i tala agi tagi ambasa hi suma Amor-râ d’a.

¹¹ Bugola, an tchol ki suma djok vuna aduk grogina, an tchol ki suma dingâ aduk azungeî magina a tin tazi irazi vazi á le sun nda nazira. Agi Israel-lâ, an Ma didina nga ni djobogiya, nga hina d’uo zu?

¹² Wani agi hagi süm guguzlud’a mi suma a tin tazi irat vatna agi nga d’elegi suma djok vuna ala a djogon vunan ndei d’i.

¹³ Gola! An mba ni mired’egi kä ata yagi d’igi pus ma yo aneka kurum ma mi miret andagad’a kä na na.

¹⁴ Sama mi ring heîna mba mi fe lovota á ringâ d’i, ma ad’engâ mba mi fe lovota á le va kad’eng mamba d’i, ma dur ayîna heîna mba fe lovota á sut tam mbuo mi.

¹⁵ Sama mi we yet yeûd’a heîna mba mi fe lovota á tchol li, sama ring heîna mba mi fe lovota á sut tam mbi, sama djang akuluma mba mi fe lovota á sut tam mbuo mi.

¹⁶ Grang ma ve tam ad’enga aduk ndromina mba mi ring gandila kur bur máma! An Ma didina ni de na.