Amos 1 - Bible azumeina

ALONA MBA MI KA SARIYAD’A YAM ANDJAF SUMA A NGUI ISRAEL-LÎNA ( 1.1—2.5 )

¹ Wana ni zlad’a hi Amos ma aduk suma pol d’uwarâ avo Tekowa-nid’a. Ahlena a nde tazi woi iram yam Israel-lâ kur atchogoid’a hi Oziyas amul ma Juda-nid’a katchogoid’a hi Jerobowam Jowas goroma amul ma Israel-lîd’a mi. Ahle suma a nde tazi irama a le ni bizad’a mbà tua ba, andagad’a ti giged’a.

² Amos mi dala: Ma didina nga mi to breîd’a kur Siyon, delem nga d’i nde woi avo Jerusalem. Yima te hatna hi suma polina mi lugod’a, hat ma yam ahina d’a Karmel-lina mi so woi mi.

Ma didina mi ngop andjaf suma tetengâ (a) Mi ngop Asiri-na

³ Ma didina mi dala: Suma Damas-sâ a nga i avogovok kur tchod’a wan pî, an mba ni djok vunan yam zla d’a an data d’i. Kayam a miret suma Galät-na kä kasezi d’igi suma a to awuna ki toto d’a kaweina na.

⁴ An mba ni do akud’a ata azì ma amula hi Hazayel-lâ, ti mba d’i ngal azì ma ad’eng ma ngunguna hi Ben-Hadat-na woi mi.

⁵ An mba ni kus kawei ma murguli ma avun azì ma ngol ma Damas-sîna woyo, an mba ni dap suma a nga kaka kä kur hor ra Bikat-Aven-nda ki ma nga mi tamula yam suma hi Bet-Eden-na woi mi. Suma Siri-na a mba yozi magomba izi Kir. An Ma didina ni de na.

(b) Mi ngop Filistê-na

⁶ Ma didina mi dala: Suma Gaza-na a nga i avogovok kur tchod’a wan pî, an mba ni djok vunan yam zla d’a an data d’i. kayam azi yo suma magomba, a hazi mi suma Edom-ma,

⁷ an mba ni do akud’a ata gulumun ma Gaza-na, ti mba d’i ngal azì ma ad’eng ma ngunguna woi mi.

⁸ An mba ni tchi suma a nga kaka Asdot-na woi pet ki ma nga mi tamula Askalon-na woi mi. An mba ni hulong abon ni tum suma Ekron-na, suma Filistê suma a arâ a mba dap pei mi. An Salad’a Ma didina ni de na.

(c) Mi ngop Fenis-sâ

⁹ Ma didina mi dala: Suma Tir-râ a nga i avogovok kur tchod’a wan pî, an mba ni djok vunan yam zla d’a an data d’i. Kayam a yo suma magomba pet, a hazi mi suma Edom-ma bei djib’er yam bana d’a azi vata ba,

¹⁰ an mba ni do akud’a ata gulumun ma Tir-râ, ti mba d’i ngal azì ma ad’eng ma ngunguna woi mi.

(d) Mi ngop Edom-ma

¹¹ Ma didina mi dala: Suma Edom-ma a nga i avogovok kur tchod’a wan pî, an mba ni djok vunan yam zla d’a an data d’i. Kayam azi dik b’oziyozina ki mbigeu d’a fiyaka, a we nga hohowa sa d’i, a djulul kayî mazina, a i avogovok ki hur mazi ma zala bei ara ba mi,

¹² an mba ni do akud’a ata azì ma Teman-na, ti mba d’i ngal azì ma ad’eng ma ngungu ma Bosra-na woi mi.

(e) Mi ngop Amon-na

¹³ Ma didina mi dala: Suma Amon-na a nga i avogovok kur tchod’a wan pî, an mba ni djok vunan yam zla d’a an data d’i. Kayam azi ze hur arop suma Galät-na woi á wul andaga mazid’a avogovogo,

¹⁴ an mba ni do akud’a ata gulumun ma Raba-na, ti mba d’i ngal azì ma ad’eng ma ngunguna woi kur bur ma ayîna ki siwela d’igi babarâ ki mbirlimba a siwela na.

¹⁵ Amul mazina, a mba im magomba ki mam suma nglona. An Ma didina ni de na.