Abdiyas 1 - Bible azumeina

¹ Wana ni vama Salad’a Ma didina mi ndum mbei mi Abdiyas yam zla d’a mi dat mi suma Edom-mid’a: Ami humumi zlad’a tcholï ata Ma didina; mi sun sana aduk andjaf suma, mi dala: Agi tchologi akulo, ei i ndeï suma Edom-ma durâ.

Ma didina mi de yam b’laka hi Edom-mid’a

² Ma didina mi dala: Agi suma Edom-ma, an nga ni mbud’ugi akid’eid’a aduk andjaf suma, suma pet a mba gologi is mi.

³ Yam mba ad’eng magid’a ti vid’igi wa woyo. Agi suma nga kak aduk ahuniyôna ata yima sana ndak á lagi va kua d’uo na, agi nga dagi ala: Ni nge ba, mba mi digimi woi kua ge?

⁴ Wani le agi i kagagi sä nakulo dei d’igi b’aruna na d’oze agi minigi aziyagi sä nakulo aduk tchitchiud’a pî, an mba ni tchugugï asegi kä woyo.

⁵ Le suma kula d’oze suma hurum ahlena a mba avo hatagi andjege ni, gagazi, a mba b’lagagiya, a mba kulï ahle suma huruzi minizina d’uo zu? Le suma dut guguzlud’a a mba avo hatagiya ni, a mba arî guguzlud’a blangâtna akulo hol luo zu?

⁶ Agi andjafâ hi Esau-na, a fegegi wa aziyagiya, ndjondjoî magi d’a nga ngeid’id’a pî, a ndat wa ad’ut tei abu mi.

⁷ Buniyôgina a digigi gak a igi ir hagad’a, a mbud’ugi iragiya. Buniyôgina a kus kagiya. Suma a tagi te maginina a gunugi nga dauna kä avorogiya, a nga de kagi ala agi ni suma bei ned’a.

⁸ An Ma didina nga ni dagiya: Kur bur máma an mba ni dap suma ne suma yam ambas sa Edom-mbina woyo, an mba ni ar sama wad’ud’a yam ahina mamba tu d’i.

⁹ Agi suma Teman-na, mandarâ mba mi ve grang magi suma durâ, azigar suma kur ambasina pet, a mba tchazi woi mi.

Edom-ma a nga le furîd’a yam ndaka hi Israel-lîd’a

¹⁰ Kayam murud’um mba agi lat mi b’oziyogi suma hi Jakob-mid’a, zulona mba mi lagiya, a mba dabagi woi ki iragi fafat.

¹¹ Agi tagid’a nga ata yima suma djangûna a kus kazi a i kal avo hatazina, ata yima andjaf ma ding máma mi le togina yam ndjondjoî d’a Jerusalem-mbina, agi lagi d’igi azi na mi.

¹² Agi suma Edom-ma, nga djivid’a agi lagi furîd’a yam b’oziyogi suma Juda-na kur bur ma azi nga kur ndakina d’i, nga djivid’a agi lagi furîd’a ata yima b’laka mba kazina d’oze agi sanagi ad’uzi kur bur ma azi nga kur pupulukina d’uo mi.

¹³ Nga djivid’a agi kalagi avo hi sum mana kur bur ma b’laka mba kazina d’i, nga djivid’a agi sogi iragi kazi kur bur ma azi nga kur ndakina d’i, nga djivid’a agi tinigi abogi ata ndjondjoî mazid’a kur bur ma azi nga kur ndakina d’uo mi.

¹⁴ Nga djivid’a agi tchologi avun grak lovota á tchagi mazi suma a nga ringâ d’i, nga djivid’a agi hagi mazi suma a arâ mi ma djangûna kur bur ma ndaka d’uo mi.

Israel-lâ a mba hlatchuguluzi ki Edom-ma

¹⁵ Kayam burâ hi Ma didinina mi ar go á mbad’a á ka sariyad’a yam andjaf suma pet. Mba mi lagi ni d’igi agi tagi lagi na, sun magid’a mba d’i hulong kagagiya.

¹⁶ Agi Israel-lâ, agi tchagiya wa kur kop man ma ayîna yam ahina man nda a tinit irat vata. Andjaf suma dingâ a mba tchumî hina baba, azi mba tchum gak a gurut kiya. Bugola, azi mba dap pei ki irazi fafat.

¹⁷ Wani suma a sut teina a mba kak yam ahina d’a Siyon-nda. Azi mba ka’î suma a tinizi irazi vazina. Suma hi Jakob-ma a mba hle yi mazi ma a hlum abozi adjeuna.

¹⁸ Suma hi Jakob-ma a mba mbut ni d’igi akud’a na, suma hi Josef-fâ a mba mbut ni d’igi sin akud’a na. A mba ngal suma hi Esau-na woi d’igi akud’a ti ngal kuzad’a na, sa mam tu pî mba mi ar ri, kayam an Ma didina ni de na.

Israel-lâ a mba hlambas sa nguyuzid’a

¹⁹ Suma Juda-na a mba hlahinad’a hi Esau-d’a, suma a nga kaka kä ata yima ligitimina a mba hlahinad’a hi suma Filistê-nid’a, a mba hle leud’a hi suma Efraim-mid’a ki d’a hi suma Samari-nid’a, suma hi Benjamin-na a mba hle Galät mi.

²⁰ Azigar suma Israel suma mimiyâk suma a yozi magombina a mba hlambasa hi suma Kanan-nid’a gak Sarepta, suma Jerusalem suma a yozi magomba suma a nga kaka Sefarat-na a mba yo azì ma nglo ma hur ful ma abo ma sutnina mi.

²¹ Suma a sutna a mba djak akulo yam ahina d’a Siyon-nda, a mba te yam ahina d’a Edom-mba mi. Ma didina mba mi kak amula!