Judə 1 - Əka yi Fîə

¹ Aŋwaʼlə zəənə́ á lǒo lə́ á mbô maŋ Judə, ngaŋəfaʼ Yeso Klisto ńkə́ ḿbɨ́ ḿbə́ mɔ́mɛ́ Jɛmsə; Maŋ ŋwaʼlə̂ lə́ á mbô pɨ páʼ Əsê a fóŋ nə́ ághóobə́, pó lə́ pɨ páʼ Tǎ Əsê a kɔŋ nə́, Yeso Klisto a kə́ ńtə́ ńnáŋə ághóobə́;

² Ńgə́ akóolə́mə́lə́ŋ pópə mbwɔ́dnə nə́ akɔŋnə chîə á mə́m pɨ tə ńdwɛ́nkə.

Pəzéʼkə pə́ Məfɨgə

³ Pəshunə́ mə maŋ kɔŋ nə́, maŋ kə pyádnə fǔəlóʼə á mə́ ŋwaʼlə̂ nə́ á mbô pɨ ńté nchwadkə́ páʼ pɛn kyeetə̂ nə́ ńchîə á mə́m ə́wɨ́ lə́. Maŋ zɨ́ ńgə́ a koʼnə̂ á mə́ ŋwaʼlə̂ nə́ á mbô pɨ ńnéŋ məntɨ́ mɨ́, ńgə́ nə ghɛn nə́ mbi ḿbóʼnə nə́ á mə́ túg nə́ mbimə́ páʼ Əsê a kə pɛ́d nə́ tə ə́fɛ̂ á mbô pɨ pí ngǎ mɔʼə́ lə́.

⁴ Ńté ńgə́ pɨ pətsə́ pə́ kě nə́ Əsë pɔ́gə pô, pó pánə ńkwúnə á mə́m pɛn, pɛn kě jî pô, pɨ páʼ pó píʼkə nə́ nkɨ ńté apɔŋə́ntə́əmə Əsê əzɛ̂n, á mə́ laŋ nə́ ə́lɨ́d ə́lyáŋ məndú mə́ təpɔŋ mɔ́b ə́wə́, ńtíʼ ńkǐə ághóobə́ Yeso Klisto, páʼ a pə́ nə́ ndaʼ Tǎ Afaʼ əwɛ̂n ńkə́ ḿbə́ Mmaʼmbî əwɛ̂nə. Ə́fɛ́lə á nəfɛdnə́ lə́ aŋwaʼlə Əsê a fiʼtə̂ ndzaŋ pə́ yǒ nə́ lə́g əsáʼ əghɔ́b pó wǔ əsáʼə.

⁵ Nə́ pǎtə ńjî ndɛn mənu ghɛn lə́, maŋ loonə̂ á mə́ kwúmtə nə́ áwɨ́ ndzaŋ páʼ Mmaʼmbîə a kə chwádkə nə́ pɔ́ pə́ Islɛlə á Ijibə, lə́ ḿbə́ ḿməgtə̂ lə́ ńtíʼ ńtsəŋkə̂ pɨ páʼ pó nə ńkě nə́ ńtɨ́ nə́ yí néŋ pô.

⁶ Kwúmtə nə́ pətseŋpə́ndɛ́pə́sê páʼ pó nə ńkě nə́ pímə á mə́ chî nə́ tsɔʼə nə́ aliʼ pó túg nə́ mətɨ wɨ́ pô, lə́ ḿmyaʼə̂ azóobə́ aliʼ pó nə ńchî nə́ ə́wə́: pə́ nə ńkwúlə ághɔ́b nə́ məŋkɛd mə́ atəənə́ páʼ pó láʼ nə́ kě ə́wɨ́ fɛ́d pô, ńnéŋə ághóobə́ á mə́m ḿbî ndzəmə́ á ndəsê. Aliʼ Əsê lɔʼkə̂ nə́ ághɔ́b ə́wɨ́, ḿbyáabə tə́kɔʼə Alě asáʼə́məsáʼ wə́.

⁷ Kwúmtə nə́ Sodom pó Gomolya, ńdzoŋ ḿbá pətɔ̂ŋ pə́ kə páatə nə́. Ngaŋə́láʼ yi ə́wɨ́ ə́ nə ə́faʼə̂ ándó pətseŋpə́ndɛ́pə́sê pə́ pó kə faʼ nə́ lə́, ńtíʼ ńnéŋ mbɨ əzoobə́ á mə́mə anǔəndzɔ́ʼə́ tə apímnə, pópə mətsə́ mənu mə́ təpɔŋə; pö zɨ́ ngə́ʼə á mə́m móg tə láʼ měe ándó akwantə əshîsaŋə á mbô ŋwu ntsəmə.

⁸ Tsɔʼə nə́ ndú wɨ́d wə́, pɨ pɨ pö sóŋə ńgə́ pó lê ndzəəmə atəəmə́tɨ́ ńtíʼ ńdaŋ ə́lɨ́d ə́féŋkə mbɨ əzoobə́, pó wág mətɨ mə́ əsê, ńtíʼə ńdzɔmtə̂ pǐə ándó pó túg nə́ nəgháʼə á nəpóolə.

⁹ Tsɔʼə əfo pətseŋpə́ndɛ́pə́sê pə́ nə fóŋ nə́ nə́ Mayikɛl, a nə ńkě ə́lɨ́d faʼ pô. Á nə ḿbə́ əghâ a nə sáʼnə nə́ pó Dɛbəəl lə́, nə ndɛd páʼ pó yí nə ńdzɔŋnə̂ nə́ akwûə Mosisə lə́, Mayikɛɛlə a nə ńkě tə́ ńdoonə̂ á mə́ lə́g nə́ əsáʼ əyí nə́ atséebə ndzɔmnə pô, lə́ ḿbə́ ə́sóŋ nə́ yí ńgə́, “Mmaʼmbî a yǐ ə́sáʼə gho!”

¹⁰ Lə́ pɨ pɨ pö kwáalə anuə atsəm páʼ atûə azóobə́ kě nə́ wɨ́ lá pô lə́ nə́ ndzɔmnə; mənu páʼ pó jî nə́ ńdaŋə̂ pə́ ndzaŋ na mbɨ əzɔb fiʼtə̂ nə́ ághóobə́, tsɔʼə ándó məna mə́ akɔb lə́, lə́ mənu páʼ mə́ jwítə nə́ ághóobə́.

¹¹ Á yǐ pə́gə á mbô pó pə́ ə́lɛ́! Pó zoŋə̂ lə́ ndú páʼ Kɛnə a nə ńgɛn nə́ ə́wə́. Ńté nkáb, pó fɛ̂ mbɨ əzɔb nə́ afankə́nu páʼ Balaamə a nə ńgɛd nə́ lə́. Pó kǐ Əsê ándó Kola a nə ńkǐ nə́ Əsê, pə́ yǒ kə́ tsəŋkə̂ ághóobə́ ándó pə́ kə kə́ nə́ ńtsəŋkə̂ Kola.

¹² Mənu mə́ təpɔŋ páʼ pó ghɛd nə́ ńkě əsɨ́ kóolə pô, mə́ ghɛd pó chîə ándó əpab ndɔtíə tətɨ pɨ əghâ ándó pɨ tə́ nə́ ńkyeetə̂ á mə jî nə́ məjî mə́ akɔŋnə mə́ənə́. Pó náŋə lə́ tsɔʼə məmbɨ móobə́. Pó chî lə́ ándó alə́m páʼ kəfəələ á twá nə́, á pə́ ńkě nə́ mbəŋ yitsə̌ tə́ ńgyǐəə pô, pó chî lə ándó atǐ páʼ təmbɔʼ a kě mənta zə́m pô. Pó chî lə́ ándó mətǐ mə́ alu páʼ pə́ soŋ nə́ ńtsɔ́ʼtə nə́ məŋaŋ mí, mə́ kwéʼnə ńkwû tə ḿměe.

¹³ Pó chî lə́ ándó atyǎntə kəfɨd mə́m nkǐə, təpɔŋ əghɔb pó ghɛd nə́ tə əsɨ́ yi ndaʼ yitsə̌ á chîə ándó məfuʼfuʼə. Pó chî lə́ ándó pɔ́ pə́ sáŋ páʼ pó nyi nə́ ńkě ndú pó ghɛn nə́ ə́wɨ́ tə́ ńjîə pô. Əsê a lɔʼkə̂ aliʼə́ á mbô pó páʼ á mɛdnə̂ nə́, zə́ələ́ á chî lə́ á mə́mə apɛ́lə ndzəmə́ páʼ á chígə́ nə́ ə́shǐəə.

¹⁴ Enok páʼ a chî nə́ a mə́mə akɔʼə asaambɛ̂ á mə́m ngwud Adam, a kə sóŋə á ngoʼ pəchə́ ńté ághɔ́b ńgə́, “Mmaʼmbîə a yǒ yǐ nə́ pətseŋpə́ndɛ̂ pí pi ŋwaʼ nə́ pətɔsə

¹⁵ ńjî ńgə́ pó sáʼ əsáʼ ŋwu ntsəmə, ə́ ghɛd pó pətsəm pó wǔ əsáʼ ńté mənu pó kə ghɛd nə́ tsɔʼə tə pɔ́g Əsê, ə́ pɨ kə́ té mənu mə́ chígə́ nə́ ḿbə́g páʼ pətəpɔ́gsê, ngaŋə́ghɛlə təpɔŋ pó kə tsáb nə́ ńté yə́!”

¹⁶ Pɨ pɨ́d pɨ pó zá ŋ́ŋwuntə̂ ḿbəənə̂ fɛ̂ fid nə́ pɨ pipə ndaʼə; pó faʼə̂ lə́ mənu mə́ təpɔŋ páʼ mbɨ əzɔ̈b sóŋ nə́ ńgə́ pó faʼə̂. Pó tóʼkə nkɔn əzoobə́, ḿbəənə̂ ńdɔg ətsáb pipə əshîʼnə ə́fɨgə̂ pɨ ə́wə́, ńjî ńgə́ pó zɨ́ ndú ə́faʼ məmɔ́b mənuə.

Əkwantə pópə Məntəgə́

¹⁷ Lə́, pəlimə́ mə maŋ kɔŋ nə́, kwúmtə nə́ mənuə ándó məntú mə́ Mmaʼmbî əwɛ̂n Yeso Klisto mə́ nə fiʼtə̂ nə́ á wə́ənə́ á ntsɛɛmbi lə́.

¹⁸ Pó kə fiʼtə̂ áwɨ́ ńgə́, “Ndwigtə əlě mbî ə́ yǐ yǐ lə́, pɨ pətsə́ pə́ fɛ́d páʼ pó yǒ nə́ ńnyegnə̂ áwə́ənə́, lə́ pɨ pó zoŋ nə́ məmɔ́b mənu páʼ mbɨ əzɔb lɔ nə́, mənu Əsê a kě nə́ kɔŋ pô.”

¹⁹ Lə́ pɨ pó shamkə̂ nə́ əliʼə́, pɨ pó zoŋ nə́ pə́ mənu mbɨ əzɔb ə́ sóŋ nə́ ńgə́ pó faʼə̂, pó kě Ajwǐəsê túg pô.

²⁰ Lə́, ńgɛn nə́ pɨ, pəshunə́ mə maŋ kɔŋ nə́, ghɛn nə́ nə́ mbiə á mə́ kwíŋkə nə́ mbɨ əzɨ ńdaŋə̂ á mə́m mbimə́ əzɨ ə́ pyádnə nə́ ŋ́ŋwaʼ lə́. Chaʼtə̂ nə́ Əsê nə́ mətɨ mə́ Ajwǐəsê,

²¹ ńdɔʼkə̂ məmbɨ mə́ənə́ á mə́mə akɔŋnə Əsê, ndzaŋ pɨ tə́ nə́ ḿbyáabə Mmaʼmbî əwɛ̂n Yeso Klisto ńgə́ a yǐ fɛ̂ áwɨ́ nə́ nchîmbî ə́ mɛdnə̂ nə́ ngǎ mɔʼə́ á mə́mə akóolə́mə́lə́ŋə ajíə.

²² Nəələ̂ akóolə́mə́lə́ŋə á mbô pɨ páʼə atûə azóobə́ á koʼlə̂ nə́;

²³ chwádkə nə́ pətsə́ ńdaŋ nə́ mə chúb nə́ ághóobə́ á mə́m mógə́. Ńgɛn nə́ pətsə́ nɨd nə́ akóolə́mə́lə́ŋ ńdzoŋ ḿbegə̂ apɔ́g ə́wə́, lə́ ḿbə́ ḿbá tə ḿbeenə̂ atsəʼ pó wê nə́ zɨ́d ńté ńgə́ ndɔtí mbɨ əzɔb ə́ ghɛd zə́ələ́ jibə̂.

Achaʼtə́sê ä Ŋáŋkə Əsê

²⁴ A mbô yí páʼ a chî nə́ təmbɔʼ a kɨ́ʼtə gho ńgə́ kɔ gho wǔəə, ə́ pɨ lɔgə̂ gho yǐ nə́ gho tə kɔntə pó akɔŋnə á mbi yí páʼ nəgháʼə a chî nə́ ə́wə́,

²⁵ á mbô ndaʼ Əsê páʼ a pə́ nə́ Nchwádkə əwɛ̂nə, ńdaŋə̂ á mə́m Yeso Klisto Mmaʼmbî əwɛ̂n, ńgə́ nəgháʼə, nəfoonə, mətəənə, pópə atséebə mətɨ chîə á mbô yí ə́fɛ́lə ándó mbî nə ńdáʼ nə́ ńchúʼ, ḿbeg əghâ nə́ ə́wɨ́, tə mbî ə́ láʼ měe! Amɛn.