Júdas 1 - Dupade Uruode

¹ Júdas uyu uje yurúsarome uaque. Uje Jesucrísto iroi u yu enga Jacóbo jõrai upo yu rĩ. Yurusarane gajnengórone u uaque jnese uje Yocai Dupade jé ajegaite uaque uje pota jeta gajneque uaque nanique. Enga uacarodisṍri u uacangureni Jesucrísto.

² Yajéode u ujetiga arajáyo Dupade osongaquéode, icaniratiguéode, guerani pajesereringa ore enga irágu uacajéode ome udore.

Júdas chacate ore ujetiga ca ore tangári jnani urupatáquechoquíode

³ Yijorane uaque á, uacarajáyo uje yijnóra uaque. Enga yajéode urásu diríca ujetiga yurúsarome uaque enga yo quique Dupade isocade ome yocúringane piquetaque. Mu uje yimo uje pacadisõre tágode chacája uacajade enga yécãre yajéode. Jecute a yurúsarome uaque ujetiga apúyoja uacanguretigade iji Dupade uruode. Dupade u gu uje chisi ome daruode ome darasapísode uyoque enga que Dupade chécãre daruode quitique go. Enga changureta yógome daruode ujetiga yĩraraco gai.

⁴ Jnanione uñane ore cháta raja yoque uje chiese ate ujñapetaque ore, mu sijnaque ore. Enga ore chacate yoque ujetiga yipéco yoquipotigué gajnaréngone jnese. Uje chiese paraque Dupade ome yoque enga chidota re ome cuchade jnese. Enga ore chotigase Dupade, uje yocasuté uguru u mu. Enga ore chotigásapo Yocangarádejnai Jesucrísto to rĩ. Mu purusãraque ore quique obiréjnai iji Dupade uruode nanique iji taningai. Enga ore quique obiréjnai u Dupade ujuyaquédatéi.

⁵ Ísenga e arajáyo, mu a yingopome uaque jne rĩ, uje Yocangarádejnai Dupade chijnime israélgosode ore jnese iji egíptogosode ore gari nanique. Mu unojo quigade enga jé guejnangápo dotigayasórone ore jnese rĩ iji udore ore ujade uje que ore changureta uruode.

⁶ A e arajáyo to jõ Dupade utocaidode gaté unirísoño uñane adode. Uje ore chetaque dáringane Dupade irócho ga ore cha Dupade iroquéode. Jecute Dupade suru udore ore gai iji ijnangununie ajei. Enga chigaru ore ome ojnaquérorigui uje a ca eruénique cuse, jé aja dire iyiejnai tuté ujetiga Dupade chajire ore adode aja quigode jnese.

⁷ Yirajágo to uje sodómagosode, gomórragosode, jé aja guidai ajámone gosode iji ore dosadode ore gajnúone u Dupade irógode udore ore to nanique. Uje ore cha pisoca omone nanique uje jnanione moji dacotépisedie gari, enga ore doi pisoca gajnaréngone ome dojode jnanío uje ore cho dacoté iji ore. Mu a ore chejnárengui jóroque dajnéone pujuyaquéo iji gajño pioi jne, uje pioi uté que chise deruénique. Jé arec ujetiga yicoi jnese enga yaquírango yoc ome pisoca gajnaréngone udore ujetiga ca pujuya yoque to jne iji gajño pioi.

⁸ Adi jé u to ome jnanione udore ore iji deréjnane unojo to. Que ore áyipieraque jnoji cucha gajnaréngone. Uje que ore chedu dacotéraque ome re enga jé ore ipesute dabai iñoñaringuéone. Ore chetágapo Dupade iroquéode rĩ. Enga ore chujñieta Dupade idai jogosórone cucha jnese to rĩ.

⁹ Uje Moisés toi nanique ga Dupade utocaidipísi gaté unirísõre Miguel, Satanás ore botare ñane. Ga ore ibotaquéode gajnengórone u Moisés ajnoquéode. Uje ore jnari Moisés ajnoquéode gu ujetiga udore uñeque jno udore údi. Mu Miguel uté chuse daruode guio ome Satanás enga que pojna go. Mu arecujaidie chojmára ome Satanás nanique enga chojninga: "A Yocangarádejnai chaquĩ́ra ua jne."

¹⁰ Mu jnanione iji deréjnane unojo ore dojnóngaja cuchade, mu que ore chiraja dadojnóngamánone udore cucha quigode. Ore gajnúone u cuchisode uje ore gaidode u dajéode quigode ome cuchade gatuaque. Jecute jnanione udore ore ipesute dagajnarétigade ome dapotiguéode cucha.

¹¹ Iyieja Dupade ujuyaquei yui ome jnanione udore ore. Chamáñaje ore adode jé cho jnani bajai Caín adode gu. Ore isocai jé upo jnani bajai Balaam adode to nanique, uje ore ajegaidedie u pláta docoidé bisidéguedie, jecute ore chicai udore yúode ome Dupade adode. Mu a ore qui u pitoringai to. Adi jé u ome jnani bajai Coré nanique uje tagu Dupade uruode aja enga toi uje Dupade urugaite.

¹² Enga gajnareque ore adode to iji uacajade, mu que ore chajéngome raque go ome dapesute gajnaréngone udore. Uje uacamátayo uágaja ñane ome uacagápidóde, mu jnanione udore ore chacája uacajade iji udore to. Ga ore cana dabáyode, enga ore chĩreta dacadie, mu que ore áyipieraque déji uacuñeque go. Ore gajnunie upo gue abujadie rĩ uje que yotique tṍraji, mu emi chubúchu aja quedéjnane. Udore ore gajnunie upo poridie rĩ uje que ore áraque cuse iji sequeréraque. Ore gajnua upo poria te rĩ uje gosi chijnime iji jogadi enga erode ore tṍraja quedéjnane, enga jogadi u uje toi.

¹³ Ore cho yote quedéjnai ijocayataque ibisógode aja dajesúode uje ebié chicáji gaté. Enga ore ate gajnarenguipísode gajnunie u ebiedie udire. Enga ore chopo guédodie rĩ uje que ore chicapóji daquiguébeode to rĩ. Mu Dupade e pésu ore quigode, ga ore quique obiréjnai u ijnangunu cuchábedie, enga a ore charidi u uté jne iji deréjnane jnese.

¹⁴ Jnani bajai Adán ujnacare bajade ore quigaminore gatéode 6 iji Adán, Enoc ore ujade nanique. Enga Enoc uté chatata Dupade uruode quigode ome ore nanique ga uruode ojningane u jnani urupatáquechoquíode udore ore jnese. Enga Enoc chimo denominone to nanique ga chatata quigode enga chojninga: "Yimo Yocangarádejnai enga tṍraji guéode, enga nóna darása gateminórone ore enga uásejnapise ore.

¹⁵ Enga gaidode u dajiritigade ome ore jnese ujetiga chiroque ore aja ore úringáringo pujuya. Yojningane u pisijnaringuéone ipesusórone udore ore jnese uje ore chejna rángaja date gajnaréngone gatuaque, jé aja daru gajnarenguipísode to rĩ ome Yocangarádejnai uté."

¹⁶ Jnanione udore ore chachóguina cuchade ome raque. Ore dojnóngapója dojode ayoréo rĩ. Que ore chucué dojode ayoréo ueratigárique, mu ore ucuegode u dahueratigade ome raque. Enga ore chisipise dabáyode ome dojode ayoréo. Aringácachoquí ore to uje ore uruode ueracho ome dojode ayoréo, mu ore ajegaitígo u ore guẽrapáitigo cucha.

Júdas cho dojode Dupade anguresóño ore quique

¹⁷ Mu, yijorane uaque á, ajnusináño Yocangarádejnai Jesucrísto iroguipísode apóstoles uruode ome yoque.

¹⁸ Uje ore chojningame yoque nanique: "A jnaníringo di jne iji erámone eruei yui ujetiga ore chujñieta Dupade uruode, adode ore jnese. Enga a ore gaidode u dapotigué ayoréode gatuaque uje ore chejna rángaja date gajnarenguipísode."

¹⁹ Enga udore ore gaidode u ujetiga ore chajuque uacajéode ome ñane. Chamáñaje ore gaidode u dapotigué ayoréode quigode gu, enga íjnoque Dupade Ujopié Espíritu Sánto adode iji ore ajéode.

²⁰ Mu yijorane uaque á, apéso ga apúyoja uacanguretigai uje Dupade gueranome uaque gu. Ujeta acatecãchoi Dupade ga abichoi Dupade Ujopié Espíritu Sánto enga a chátaja uaque jne ome uacacatecãraitigade.

²¹ Jé ca acayoi quedéjnane ome Dupade ijnoraquédatéi. Mu arochópise Yocangarádejnai diringai yui. Chamáñaje diri uté u gu ujetiga chingo dosõraquéode ome yoque, enga chisi ome pucuecaringué eyúgojmai ome yoque jne.

²² Ujetiga bojórique ayoré chotigase Dupade uruode enga bo enga abágui enga o quique ome Dupade uruode. Socaseti uté cha dotigayaquéode udore.

²³ Acueyoi uacasocáringome uacojode ayoréo to uje ore qui tu gajño pioi ujetiga aquetáyo udore ore to ome daqui gajño pioque. Enga cho jetiga ajnicho udore ore iji gajño pioi ajei. Osṍcho ore, mu ajuso uaqueo ome ore ate gajnaréngone. Etachopise ore ate gajnaréngone jnese ujetiga ca apéso to.

Júdas ininaquei u unojo ome Dupade ome úringai pujnuéngaisṍre

^24-25 Yoquiquetangóri etotiguei déji ujetiga chirote uaque enga ca acóraño aja pisijnaringuérique, jé aja ujetiga chicha uágaja dari iyiejnai iquei. Enga a ca diquiyaque uacayoguérique jne iji iquei, mu a pininaquédatéi irágu uacajéode. Dupa ugurui tu Yoquiquetangóri uté, enga áyipierãque ugurui upo uté rĩ. Jecute yicoi enga yicotágo Dupade uje chiqueta yoque gu Jesucrísto adode ome yoque. Uje Dupade ingoningájnai u cuchadatei. Enga cuchadatépo imenuringuei, ujopié ore jnese rĩ. ¡Ga jé tiógara ome uté ujetiga picotaque iji taningai, jé iji deréjnane unojo to, jé iji deréjnane jnese to rĩ iji yoquiquei dirome! Qui jé upúsu. Amén.