Filemón 1 - Dupade Uruode

¹ Páblo uyu uje yurúsãre yurusarane cárta ome ua, Filemón á. Enga yoquijõrai Timotéo cháta raja yu ome yocurusarane unojo to. Bamo uje ore suru yibai gu Jesucrísto adode. Mu ua u to uje bátaja Dupade iroquéode aja yoque to. Jecute yijnórango ua.

² Enga Jesús anguresórone uñane ore gajneque yocurusarane unojo to uje ore chamáta ñane aja baguíjnai to ome Dupade uruode. Jé aja yoquijõra Ápia, yoquijõrai Arquípo ore to rĩ. Uje Arquípo uté cho yoque enga chejna raja dagaidode Dupade iroquéo to.

³ ¡Yipésupú ga Yocai Dupade, Yocangarádejnai Jesucrísto ore chatapísaja uaque enga ore chisi ome pajesereringai ome uaque to jõ!

Páblo chatata Filemón átegoningáne

⁴ Jecucha ga yujnusina ua uje yicatecã́ri Dupade, enga yacãre uté gai ome badode.

⁵ Uje bajnomei e chise yu uje banguretapise Yocangarádejnai Jesús. Enga bajnorapise bojode Dupade anguresóño to.

⁶ Yiraja uje bojode ayoréo uñane ore chirate ua aja banguretigai ome Dupade to. Enga yicatecã́ri Dupade ome udore ore jnese ujetiga diga ore chirajapise to Jesucrísto gueranone cucha omío jnese ome danguresórone uyoque.

⁷ Uje yimo bajnoraquédatéode ome ore jnese enga yirasiguipise yu. Enga yujnusi yu ome cuchade. Mu que gusu yu go, mu Dupade urasapísode ore jnese ore irasique raque to ome badode udore enga ore jnusi rángome Dupade adode to.

Páblo chijócha Filemón ajei údi ome esclávo casica uje i tu Onésimo

⁸ Bamo uje Crísto iroguipísode apóstol uñai uyu. Jecute yajnei turásu ujetiga jĩraque berási yiroquérigo.

⁹ Mu yajéode que u yuru bajade ucode go uje yijnorapise ua gu. Enga yajéode upúsu ujetiga yijócha bajei údi. Baraja uje e choquíjna yu enga ore suru yibai tiji soldádode iguíjnai iji ne, mu yibai tu Jesucrísto.

¹⁰ Jecute yijócha bajei údi ome basa casica Onésimo uje babé oré ome nanique. Uje uté e changureta Dupade to enga cho ujetiga yabipísi u uté iji yijogadi uné soldádode iguíjna.

¹¹ Yiraja uje angoninguite parique Onésimo ica enga que agutíñame go. Mu Dupade e chécãre uté adode enga ca gusu ua ujetiga agutíñarásome, mu yagutíñame to iji uné.

¹² A yirógapo Onésimo aja ua jne rĩ. Ujetiga di iji uaque enga ca ajuseque jne. Chamáñaje yijnorapise Onésimo gu.

¹³ Yajéode u jórogu ujetiga jé charásiji yari iji ne, enga chatarása cuchade aja yu iji soldádode iguíjnai uje qué yo yiba pujnomé ueradi quigode uje garani tu Dupade. Enga chorase ujetiga jé ua u basai tuté ujetiga cháta cuchade aja yu iji ne.

¹⁴ Mu que yajéode u ujetiga yijnárasa yimenuringuei aja ua ujetiga be yipotigádode cucha. Mu yipotapísa ujetiga bajéode jé u yajéode to. Jecute a ca yaquĩ́ra Onésimo iji yari jne ujetiga jé ca bajépiso to.

¹⁵ Ísenga Dupade ajéode u diríca ujetiga basai Onésimo chayome ua. Gaidi tu gu ujetiga chatire babai ome úringai Dupade anguresõre, enga cháji bari iji deréjnane jnese.

¹⁶ Jé ũré uje ayoré pisaque Onésimo, mu que gusu ayoré pisaque, mu yocujo Jesús anguresõre to. Bamo uje yijnorapise Onésimo, mu be ga ajnorapise gaté to. Chamáñaje que gusu uje Onésimo isasṍri tu ua, mu e bojo Yocangarádejnai anguresõre to.

¹⁷ Ujetiga jé ũré uje bo bajõrápisi iji yu, enga be yuruode jne enga ca ajuseque Onésimo. Enga cho yu ujetiga yisírase ua enga que ajuseque yu.

¹⁸ Ujetiga basai Onésimo atique gajnaréngaja ua diríca, jeoga írigo déji bari enga ango yu enga a yo oré jne.

¹⁹ Páblo uyu uje yurúsãre yurusarane eruéode udore ome yijmainie. Enga yurusarane quigode u uje a yo boré ome Onésimo írigo jnese ujetiga déji bari. Mu yujnusina ua ome udore: cho ujetiga béode déji yari to. Chamáñaje bangureta Dupade nanique gu yatatagode Dupade urúo ome ua.

²⁰ Jecute Filemón á, bebi yuruode unojo uje bojo Yocangarádejnai anguresõre yu gu. Enga yujo Crísto anguresõre ua to, jecute ãro yujnusiétigade ome Onésimo, enga atire pininaquei yibai.

²¹ Enga yurúsarome ua gu uje que potigayaquérique déji yu ome báringai angoninguite guesaguipise. Yirajapise uje a ca gusu yuruode jne ujetiga apésu aja quigode, mu datéringa jne ome bapesute arégode ome Onésimo dirome.

²² Bamo uje yangureta yui ujetiga Dupade doi uacacatecãraitigade ome yu, enga chorei yu iji uaque ujetiga yimóngopo ñane rĩ. Jecute apésabu yijogatique iji baguíjnai ujetiga dimane ome yu ujetiga diga yĩri iji uaque.

Páblo urusarane eruei tu uje chatata dajorane salúdode ome Filemón to enga chisíome dacacáninga omone ome

²³ Epáfras déji yari iji soldádode iguíjnai uné, enga uté bai tu Jesucrísto to. Enga yiguíjna bei ome uté to.

²⁴ Enga yiguíjna bei ome yijorane Márcos, Aristárco, Démas, Lúcas ore rĩ, uje udore ore cháta raja yu to ome yigaidode Dupade iroquéo.

²⁵ ¡Yipésupú ga Yocangarádejnai Jesucrísto chatapísaja uaque jne, jõ! Amén.