Ester 1 - Dupade Uruode

Eduguéjna cuchábi Asuéro pésu daninaquédatérigo ome darógode ore nanique

¹ Yatatagode udojo tocade jnese nanique uje pérsiagosode, médiagosode ore eduguéjnai chojmára nanique ga eduguéjna cuchábi uté i tu Asuéro. Ga Asuéro gajnepídi erãpe querúpise nanique. Chamáñaje pérsiagosode, médiagosode ore cho dajnéngu punirone jnese nanique uje ore déji ore unirone Índia, Etiopía ore ujai. Ga 127 punirone udore nanique uje udore unirisórone ore chopise deduguéjna cuchábi iji Asuéro uté to.

² Ga ore eduguéjnai uje i tu Asuéro idaipísi jé u ore idai Súsa nanique. Ga uté ujode eduguéjna ore cháta rágaja deduguéjnai Asuéro iji idai uté to jnese nanique.

³ Enga ore eduguéjna cuchábi uté guejnanie siquerei gadiógome úringai eduguéjna nanique, enga pota pésu daninaquédatérigo ome dojode eduguéjna, darógode ore. Ga tibidi dajõrápisode dojo eduguéjna, jé aja iróquegatéode ore rĩ, jé aja pérsiagosode, médiagosode ore isoldádode eduguéjnapisode. Ga tibidápoi eduguéjnane jnese to rĩ iji dajnepídi erãpe údode jnese uje punirone udore 127 ore nanique. Enga jiépisi ibidigode nanique uje pésu daninaquédatérigo ome ore.

⁴ Gaidi tu gu jeta ore tija átedatéode to. Ga jé u nanique uje Asuéro ibidigode dojo eduguéjna ore chajire ipesute ueradéjnane, ugúcha dipeséode ore enga chajuque ore agutedie nanique uje ueradípiso damone cucha jnese. Mu que pésu dire chojmarai ome daninaquei uté nanique, mu ininaquei guejnane guedosi chojmára iji ti nanique ome ore uje ore nóna deduguéjna cuchábi uté iji daninaquei tuté.

⁵ Mu uje e ore chejna yojningane guedosío udore iji gari nanique, ga jé u uje ibidique bajade ore chajníja dedáyode jnese. Ga jé u uje tibidápoi darasapísode iji dedai Súsa údode jnese. Ga chapúsa ore aja jnese ga chojninga: "Ajnáñoji ne, yurasade uaqué. Jeoga ataque uaque, jeoga gajnareque uaque, mu abáchoi yu iji yininaquédatéi tudé jnese." Ga pésu daninaquédatéi tuté iji daguíjna cuchábi ajé gatócoro uje poridie, pojnánguenie piéjna ejode gu. Enga guejnane dire gare iji ti ome daninaqué ejoi tuté nanique.

⁶ Iji ore atigai jogadi uté ga iguíjna piagode déji ore ejode uje umarejnápiso ga ore chanire borapéode aja piagode pijnanone uje póroropise uñai, jé utata uneroque uñai, jé utata nanganataque uñai ga ueradípiso jnese. Ga ore cho cutade iji cucarané nanganatáguedie uje cucaranenie udire i tu mármol. Ga ore pésu borapéode angoroinie ome guebeque póroro nanganatágode ore uje i tu pláta ga jé ore chimate ga ore na carubi taja dapesudedie udire jójo, jójo iji cutádedie ujai iji piagode jnese iji ore gai. Ga ore charipi umarejnájnane déji atigai jogadi uté to uje ore pésu ome óro, plátapisedie ore. Enga cucarané ĩrararenie dépoji iguíjnai údi rĩ ga ĩrararãcho mu iráradie cãra rome ñane ga ueradépisei iráradie jnese.

⁷ Ga ore chisi ome dajotade víno ome darasade ore jnese. Ga ore jotade píode cãra rome ñane mu jé óropise jnese. Ga ore chóji jope mu ore chinire, ga jĩraque ore chĩretápo ore jopidode rĩ. Ga ore chojninga: "¡Caniranguipise yoquibidisṍri ome yoque to! ¡Eduguéjna cuchábejna gu!"

⁸ Mu ore eduguéjna cuchábi que jnari ore ome dajotai mu chojningame darógode: "Jé ca ajnari ore ome yoquijotai. Ujetiga ca ore chóji, ga jé dóji ga ca ore chóji. Mu ujetiga gosi pota chójiapo rĩ ga asi ome ga chóji gatuaque. Yigaidi tu gu jeta ore irasiguipise raque jnese iji yocari iji de to."

⁹ Enga ore eduguejẽ́ cuchabé Vásti pésu daninaquei ome dabai ibidigode acotedie to iji ajé uñai iji uraque dabai iguíjna cuchábi nanique.

^10-11 Enga ore irasiguipise ñane jnese iji pininaquéode jogadi uté nanique uje guejnane dire gare iji ti nanique. Enga chise ore ininaquei erueminóri dire nanique ga yote pioi yuque ore eduguéjnai Asuéro uté. Ga jé u nanique uje chiroque darógode aja dacoté yui ujetiga ore di údi iji jnanione charidi. Ga chojninga: "Angoñome jne jetiga chacája dayo nanganatátique coróna jeta chicáji de." Gaidi u gu jeta jorane eduguéjna, urasapísode jnanío ore chajire acoté to. Chamáñaje omepise Vásti uaté gu. Enga irógode udore uje ore jno deduguéjnai uruode údi ome acoté ore íode u udojo nanique: Mehumán, Bízta, Harbóna, Bígta, Abágta, Zetar, Carcás ore.

¹² Ga ore eduguéjna cuchábi irógode ore doi nanique ga ore chingome uruode ome acoté, mu uaté chetaque dabai pijnane ga que nóna irógode ore aja jnanione charidi to. Mu ore eduguéjna cuchábi chudute uje acoté chetaque pijnane yui, ga ájningaránguipíse abai.

¹³ Ga jé u uje tibidi daróquegatéode uje irajataguipíso ore, jetiga ore chajire acoté isocade aja quigode, enga chojningame ore: "¿Ama yoqueduguéjna bajade ore urusarane cho rique quitígo a ujeta gosi acoté angoninguite paré ome abai uruode? Ga ango yu ga yiraja yáyipie quitique to ome yacoté." Chamáñaje peduguéjna cuchábode iji ore uniri Média-Pérsia uté quene ore pésu dáyipiedie ome cuchárique nanique ujetiga e pajirique dojode eduguéjna bajade ore áyipiedie iji darujna aode.

¹⁴ Ga eduguéjna cuchábi iróquegatéode udore gare ore iji yijmanai uñai ga ore íode u udojo: Carséna u uñai, jé basa ga Setar u uñai, jé basa ga Admáta u uñai, jé basa ga Társis u uñai to rĩ, jé basa ga Méres u uñai to rĩ, jé basa ga Marséna u uñai to rĩ, jé basa ga jõrai tupo Memucán to rĩ. Enga ore déji eduguéjna cuchábi iguíjna cuchábi gatuaque to nanique ujetiga ore cháta cuchárigo aja deduguéjnai Asuéro, enga eduguéjnapise ore to ga ore urasade média-pérsiagoso ore tangaripísi ore uruode quigode to.

¹⁵ Ga jé u uje ore eduguéjnapísi catecã́ri ore to ga chojningame ore: –Jé cajichope ore urusarane quigode ome yu to, yoqueduguéjna bajade ore. Uje yacoté Vásti chetaque yibijnane diríca, enga yipota jeta yiji yoqueduguéjna bajade ore áyipie bajedie quitígo to.–

¹⁶ Ga jé u nanique uje iroguipísode udore uñai uje i tu Memucán chajnai uruode iji dojode eduguéjna uñane iquei ga chojningame uraque deduguéjnai: –Que gusu ua uje yoqueduguejẽ́ cuchabé Vásti adode gajnaréngome ua. Mu gajnareque adode ome yoque jnese, ga chapuse ayoré gajnaréngone, ayoré atade uyógaja jnese. Uje que pisoca jeta yocacotéraque chetaque yoquibijnárique.

¹⁷ Ga a yocacotedie chudute uaté ujnomei jnese uje babidi mu que doi babijnane. Ga a ore chiradája adode to jne ga a ore chojninga: "Yoqueduguéjna cuchábi Asuéro acoté que doi pijnane, ga a jé yiraco uaté to ga a ca yicoi yocabayode uruode to jne."

¹⁸ Enga yoqueduguejẽ́ cuchabé Vásti ujnomei a jĩraque chubu erámi jne. A cáma dejaque mu a baroguipísode uyoque yangácoi bacoté isocade iji yocacotedie pijnanone iji bajnepídi erãpe údode jnese. A yocacotedie cho cucha bisidéguiji baroguipísode uyoque to jne jeta ore chirate uaté, uje yocurasade média-pérsiagoso angarádejna yoque to mu. Ga a jé qui tu tome pajei dotáningane jne iji yoquiguíjnane ajéode jnese to.

¹⁹ Jecute yocósi te ome ua: ujetiga angome yoque ga a yurúsãco báyipiedie iji yoquigode darujna ao to uje eduguéjnane áyipiedie jogapíode u gu uje yurúsãco ore áyipiedie iji udore. Ga ósi tome barúrigo jne: "Jé arec jeta média-pérsiagosode ore eduguejẽ́ cuchabé Vásti ca chicapóji dabai iquénique jne rĩ." Mu be, yoqueduguéjná, ga acuepoi bacoté uñáraque rĩ jeta tangaripísi barúrigo, enga uaté goto cháji yoqueduguejẽ́ Vásti jogadi to jne. Bamo uje a yurúsãco udojo iji yoquigode darujna ao, enga e que toque jeta uñeque doi ga chĩropo báyipiedie udire quigode rĩ. Uje média-pérsiagosode jé yoquisocai tu uté gu, uje yurúsãco cuchade ga purusãracho ga que toque jeta pĩrongápo rĩ.

²⁰ Enga jé arec ujetiga aroque barógode ore aja barosadode jnese iji barasade ore ga ore jno bajnomei údi. Ga ore chajire yocurusarane barúo ome ore jnese ga ore chatata udore quigode iji ore iquéode. Ga jé u ujetiga chequedíe ore todo báyipiedie ga quene ore todo ga ore tangárapoi dabayode uyoque jne rĩ. Que gusu bojode eduguéjna yocacotedie, mu yocujode jnanío uñane ore acotedie a tangárapoi ore to jne rĩ. Ga jé u ujeta tijode chopo jnángome yoque to iji yoquiguíjnane to rĩ.–

²¹ Ga ore eduguéjna cuchábi uje i tu Asuéro, ujode eduguéjnapíso ore chachietáji Memucán áyipiedie. Ga Asuéro chojninga: –Ueradéjnapise báyipiedie quigode. A yipéco jne.–

²² Ga jé u uje eduguéjnai chiroque darógode aja ore idáyode yúode jnese iji dajnepídi erãpe uje punirone chise 127 iji uté gajnepídi erãpe uté nanique. Ga unirone udore unirisórone ore cãra daruode ome ñane nanique. Jecute uje purusãraque eduguéjnai Asuéro áyipiedie nanique ga ore chapúsa ore uruode aja jnese. Enga áyipiedie chósi tome ore: "Que toque jeta chequéraque tagu damanique uru quitígaja. Enga jnanione ore gajnei tu jeta pangarate ore uruode ome daguíjnai jogosórone ore, ga gajnei tupo jeta ore chedu catecã́ri ñane ome jnani tuté urasapísode uruode to rĩ iji uté iguíjnai ajei."