Лука 1 - Инжил

1 бетӏер Байбихьи

^1-2 Нилъер агьлуялда гьоркьор Аллагьас тӏуразарурал ишазул хӏакъалъулъ къисаби, байбихьудаса бахъараб гьеб кинабго жидеда бихьарал ва Аллагьасул Рагӏиялъе жидеца хъулухъ гьабурал гӏадамаз рицухъе хъвазе гӏемерав чияс хӏалбихьана.

³ Гьединлъидал, бетӏерчӏахъаяв Теофил, дидаги лъикӏ бихьана, авалалдасанго цӏех-рех гьабун, тартибалда кинабго дуе хъвазе.

⁴ Гьаб цӏалараб мехалъ дур ракӏчӏела дуда малъанщинаб жо хӏакъаб букӏиналда.

Закарияе вас гьавизе вуго

⁵ Гьерод Ягьудиялъул ханлъун вугеб заманаялда вукӏана Абиял тухумалъул чилъун кколев Закария абулев цо кашиш. Гьесул чӏужуги йикӏана Гьарун аварагасул наслуялъул гӏадан. Гьелда цӏарги букӏана Элисабет.

⁶ Гьел кӏиялгоги рукӏана Аллагьасул вализаби. Бетӏергьанасул тӏолабго амру-нагью ракӏбацӏцӏадго тӏубазабулаан гьез.

⁷ Амма гьезул лъимал рукӏинчӏо. Элисабет йикӏана лъимер гьабуларей гӏадан. Гьел рукӏана гӏолохъанлъиялдаса арал гӏадамал.

⁸ Гьале гьанжеги гьезул тухумалде ирга щола Мукъадасаб Рокъоб хъулухъ гьабизе.

⁹ Кашишзабазул гӏадаталда рекъон, можоро тӏамидал, Закарияде тӏаде ккола, Аллагьасул Мукъадасаб Рокъове жаниве лъугьун, махӏгьуинаб нахул кьеккен гьабизе.

¹⁰ Нахуда цӏа бакулев гьев вугеб мехалъ, киналго хутӏарал гӏадамал рукӏана къватӏирехун чӏун какал ралел.

¹¹ Кьеккеналъул кӏкӏуй тӏад беролеб хирияб бакӏалъул кваранаб рахъалде Бичасул малаик рещтӏана гьебмехалъ Закарияхъе.

¹² Малаик вихьараб мехалъ, Закария вихха-хочун лъугьана ва кутакалда хӏинкъана.

¹³ Малаикас гьесда абуна: – Мун хӏинкъуге, Закария, Аллагьас къабул гьабуна дур гьари-дугӏа. Дур лъади Элисабетица дуе вас гьавизе вуго. Яхӏя лъе дуца васасда цӏарги.

¹⁴ Дуе талихӏги рохелги босун бачӏина гьес, цогидал гӏемерал гӏадамалги рохила гьев гьавиялдаса.

¹⁵ Аллагьасда цебе кӏодолъи щвела гьесие, чагъирги цогидаб жаги гьекъеларо гьес, эбелалъул ургьив вугеб мехалъго Илагьияб Рухӏги лъугьина гьесулъе.

¹⁶ Исраилил лъималазул гӏемерисел жидерго Бетӏергьан Аллагьасде руссинарила гьес.

¹⁷ Иляс аварагасул хӏалкӏолъигун ва къудратгун Тӏадегӏанасдаса цеве вачӏун, эбел-инсулги лъималазулги ракӏал цоцалъ журазарила гьес, къосун Аллагьасде мугъ рехаралги тӏадруссинарила муъминазул гӏакъиллъиялде. Тӏадегӏанав вачӏиналде къачӏала гьес хӏадур гьабураб халкъ.

¹⁸ Гьебмехалъ Закарияца малаикасда гьикъана: – Сундалъунха дида гьеб лъалеб? Дунги ригь арав чи вуго, дир чӏужуги гӏолохъанго гьечӏо.

¹⁹ Малаикас гьесие жаваб кьуна: – Дун вуго Аллагьасда цеве вугев Жабрагӏил малаик. Гьес дун витӏана дуда кӏалъазе ва дуда рохел бицине.

²⁰ Жиндир болжалалда тӏубазе бугеб дица бицараб рагӏиялда мун божичӏелъул, гьале дур кӏал-мацӏ кквела ва гьеб иш тӏубазегӏан кӏалъазе кӏвеларо дуда.

²¹ Закария къватӏиве вачӏиналъухъ балагьун чӏун букӏана халкъ гьебмехалъ. Щайдай гьев Мукъадасаб Рокъов жанив кватӏаравилан хӏикмалъун рукӏана гӏадамал.

²² Къватӏиве вачӏараб мехалъ, Закарияда кӏвечӏо гьезда кӏалъазе. Гьезда бичӏчӏана Мукъадасаб Рокъоб жаниб гьесие Аллагьасул илгьам лъугьараблъи. Гьелдаса хадуб, килщаз ишанал гьарун гурони, кӏал бичӏун тӏокӏаб рагӏи абичӏо Закарияца.

²³ Мукъадасаб Рокъоб хъулухъ гьабизе тӏадаб заман лъугӏидал, Закария жиндирго рокъове тӏадвуссана.

²⁴ Цинги Элисабетил ургьибе лъимер ккана, ва щуго моцӏалъ, къватӏи-рокъое яхъинчӏого, яхчун чӏана. Гьелъ абулаан:

²⁵ – Гьале, Аллагь гурхӏараб мехалъ, дие гьес гьабураб лъикӏлъи, лъимер гьечӏолъиялъул бугьтан гӏадамазда цебесан дида тӏаса ине.

Жабрагӏил малаикас Марямида рохел бицуна

^26-27 Анлъабилеб моцӏалъ Аллагьас Жабрагӏил малаик витӏана Галилея улкаялъул Назарет шагьаралде Давудил наслуялъул Юсупилан цӏар бугев чиясе абурай цо ясгӏаданалъухъе. Гьелда цӏар букӏана Марям.

²⁸ Гьелъухъе вачӏун Жабрагӏил малаикас абуна: – Йорчӏами, Аллагьасул баркат рещтӏарай яс! Бетӏергьан вуго дуда аскӏов.

²⁹ Малаикас гьедин абидал, йихха-хочун лъугьана гьей, ва гьел рагӏабазул магӏна щибдайилан йикӏана.

³⁰ – Хӏинкъуге, Марям! – ан абуна гьелда малаикас. – Бичасул рахӏмат насиблъана дуе.

³¹ Гӏенеккея, дур ургьибе лъимер ккела, ва дуца вас гьавила. Гӏиса абун лъела дуца гьесда цӏарги.

³² Цӏакъ кӏудияв чи вахъина гьесул. Тӏадегӏанав Аллагьасул Василан абила гьесда. Жиндирго эмен Давудил тах кьела Аллагьас дур васасе.

³³ Абадиялъего вукӏина гьев Якъуб аварагасул халкъалъул Парччахӏлъун, ва гьесул Парччахӏлъиялъе ахирго букӏине гьечӏо.

³⁴ – Росасецин инчӏей дие гьеб кин лъугьунеб? – ан гьикъана гьесда Марямица.

³⁵ Малаикас абуна: – Илагьияб Рухӏ рещтӏина духъе. Бетӏергьанасул хӏалкӏолъиялъул накӏкӏул парчаялъ яхчила мун. Гьединлъидал Аллагьасул Васлъун рикӏкӏина гьеб Илагьияб Лъимер.

³⁶ Лъимер-бетӏер лъугьунарей гӏадамилан рикӏкӏуней йикӏарай дур гӏагарай чӏужу Элисабетги, гьанже гӏолохъанго гьечӏониги, лъимаде йиго. Анлъабилеб моцӏ буго гьеб ккаралдаса.

³⁷ Аллагьасда хӏалкӏолареб жо щибго букӏунарелъулха!

³⁸ Гьебмехалъ Марямица абуна: – Гьале, дун Бетӏергьанасул лагъ! Дуца абухъе ккезе биччанте дие! Цинги малаик Марямида аскӏоса нахъе ана.

Марям Элисабетихъе гьоболлъухъ уна

³⁹ Гьел къоязда Марям гӏедегӏун ана Ягьудиялъул мугӏрузда бугеб шагьаралде.

⁴⁰ Закариял бакӏалде щведал, гьелъ Элисабетие салам кьуна.

⁴¹ Марямил салам рагӏарабго, гьебсагӏат Элисабетил ургьиб лъимер кӏанцӏезе лъугьана. Илагьияб Рухӏалъул цӏуна гьей.

⁴² – Руччабазулъ бищунго баркат кӏудияйлъун лъугьана мун, – ан ахӏун гьаракь гьабуна Элисабетица. – Баркат кӏудияблъун лъугьана дур ургьиб хулараб лъимерги.

⁴³ Дир Тӏадегӏанасул эбел къавулъе ячӏинегӏанасеб даражаялъул гӏаданищха дун!

⁴⁴ Гьале дур салам рагӏарабго, бохун кӏанцӏезе лъугьана дир ургьиб лъимер.

⁴⁵ Бетӏергьанасдасан дуде бачӏараб ругьел тӏубазе бугелъул, гьелда божарай мун гьардарай гурищ.

Марямица Аллагьасе рецц гьабула

⁴⁶ Марямица ахӏана: – Аллагь кӏодо гьавизе лъугьун буго гьинал ракӏ.

⁴⁷ Гьес дун хвасар гьаюлин бохун буго дир рухӏги.

⁴⁸ Дун пакъирай лагъалда Бичасул бер речӏчӏидал, Баркат бугей гӏаданлъун гӏаламалъ рикӏкӏина дун.

⁴⁹ Жиндир цӏар мукъадасав къудратав Бетӏергьанас Кӏудаб даражаялде яхине гьаюна дун.

⁵⁰ Гӏибадат гьабуразул наслабазда гурхӏана.

⁵¹ Гучаб гьесул къуваталъ чӏухӏарал къезарула, Гьезул квешал къасдалги къинарула киналго.

⁵² Бетӏергьанас пахруял тахидаса рехула, Пакъирал, кӏодо гьарун, тӏадегӏанлъизарула.

⁵³ Ракъаразе Аллагьас къваригӏанщинаб кьола, Бечедал рачахъула, щибго жоги кьечӏого.

^54-55 Дол нилъер умумузда абун букӏараб куцалъ, Ибрагьимил лъугьарал киналго наслабазда Абадул абадиялъ гурхӏилин кьураб рагӏи Ракӏалде щун, Аллагьас жиндирго лагълъун кколеб Исраилил халкъалъе кумек гьабуна гьанже.

⁵⁶ Гьениб лъабго моцӏги бан, Марям тӏадюссун жиндирго рокъое ана.

Яхӏя гьавиялъул хӏакъалъулъ

⁵⁷ Къо тӏаде щвараб мехалъ, Элисабетие вас гьавуна.

⁵⁸ Аллагь гурхӏун гьелъие лъимер гьабун бугин рагӏараб мехалъ, гьелда рахьи базе рачӏунел рукӏана Элисабетил мадугьалзабиги гӏагарал чагӏиги.

⁵⁹ Микьабилеб къоялъ васасе сунат гьабизе рачӏарал чагӏазе бокьана, инсудаго гӏадин, васасда цӏарги Закария лъезе.

⁶⁰ Гурин, васасда цӏар Яхӏя лъезе кколилан абуна Элисабетица.

⁶¹ Гьез гьелда абуна: – Нужер гӏагарал чагӏазда гьоркьов гьединаб цӏар бугев чи гьечӏо гури, – ян.

⁶² Цинги, квераз ишан гьабун, Закарияда бичӏчӏизабуна васасда щиб цӏар лъезе дуе бокьун бугебилан.

⁶³ Цо хъарщиги бачӏинабун, Закарияца гьелда тӏад хъвана: «Васасда цӏар Яхӏя лъезе ккола», – ян. Киналго гӏажаиблъана гьебмехалъ.

⁶⁴ Гьеб лахӏзаталда Закариял кӏал ричӏун бачӏана, мацӏалдаса гарацӏ бичун ана ва Аллагьасе рецц гьабун кӏалъазе лъугьана.

⁶⁵ Мадугьалзабазул рекӏелъеги кутакаб хӏинкъи лъугьана гьебмехалъ, Ягьудиялъул киналго мугӏрузда тӏибитӏана гьелъул хӏакъалъулъ хабар.

⁶⁶ Гьеб рагӏанщинас, гьелъул пикру гьабулаго, абулеб букӏана: – Щив чидай вахъина гьадав васасул? Хӏакъикъаталдаги Бичасул хӏалкӏолъи букӏана гьесулъ.

Закарияца Аллагьасе рецц гьабула

⁶⁷ Яхӏял эмен Закария Илагьияб Рухӏалъул цӏуна, Аллагьасдасан рачӏарал гьадинал рагӏаби абуна гьес:

⁶⁸ – Исраилил халкъалъул Бетӏергьан Аллагьасе рецц гьабилин, Нилъехъе вачӏун гьес нилъ тархъан гьаридал.

⁶⁹ Гьес жиндирго лагъ Давудил кьолбодасан нилъее кьела Нилъ хвасар гьаризе къудрат бугев чи.

⁷⁰ Некӏо заманаялда жиндирго аварагзаби ритӏун, Гьес нилъее рагӏи кьун букӏана:

⁷¹ Нилъер тушбабаздаса ва нилъ рихаразул квердаса Жинца хвасар гьарилилан,

⁷² Нилъер умумузда гурхӏилилан Ва мукъадасаб къотӏи тӏубазабилилан.

⁷³ Нилъер умматалъул эмен Ибрагьимие гьес гьа гьедун букӏана, Тушбабазул квердаса хвасарлъун,

⁷⁴ Хӏинкъичӏого тӏубараб гӏумруялъ

⁷⁵ Ритӏухъго ва бацӏцӏадго Жиндие тӏагӏат гьабизе изнуги ресги букӏинабилин.

⁷⁶ Мунги, дир лъимер, рикӏкӏина Къудратав Аллагьасул авараглъун, Тӏадегӏанав Масихӏидаса цеве вахъина мун, Гьесие нух къачӏазе

⁷⁷ Ва, мунагьал чурун, нуж хвасарлъилилан Халкъалда лъазабизеги.

^78-79 Аллагь гурхӏун, гьес нилъее зодисан рогьел рещтӏинабила, Хвалил бецӏаб рагӏдукь ругезе канлъи букӏине, Ракълиде рачунеб нухги бихьизабила нилъеда.

⁸⁰ Яхӏя кӏудияв гӏолев вукӏана, гӏакълу цӏубалеб букӏана. Исраилил халкъалда цеве вахъинегӏан гьес гӏумру гьабуна гӏицӏаб авлахъалда.