Иоанн 1 - Инжил

1 бетӏер Байбихьи

¹ Бищунго цебе букӏана Рагӏи. Рагӏи Аллагьасда аскӏоб букӏана. Рагӏи букӏана Аллагьлъунги.

² Бищунго цебе гьеб Аллагьасда аскӏоб букӏана.

³ Гьеб Рагӏудалъун бижана кинабго. Бижарабщиналъул щибниги бижичӏо гьеб гьечӏого.

⁴ Гьелъулъ букӏана чӏаголъи. Гьеб чӏаголъи букӏана гӏадамазе Нурлъун.

⁵ Гьеб Нур бецӏлъуда кунчӏун буго, бецӏлъиялда гьеб Нур киданиги къезабизе кӏвечӏо.

⁶ Гьале Аллагьас витӏун вачӏана Яхӏя абулев чи.

⁷ Гьев вачӏун вукӏана халкъалда цебе гьеб Нуралъе нугӏлъи гьабизе, гьесухъги гӏенеккун, киналго гьелда божизелъун.

⁸ Яхӏя живго Нур вукӏинчӏо, гьев вачӏун вукӏана гьеб Нуралъе нугӏлъи гьабизе.

⁹ Гьеб ккола дуниялалде бачӏараб хӏакъаб Нур. Гьелъ гвангъизавун вуго щивав чи.

¹⁰ Гьеб Нур бачӏун букӏана гьелдалъун жиб бижараб дуниялалде, амма гӏаламалда гьеб лъачӏо.

¹¹ Жиндирго халкъалъухъе вачӏун вукӏана Нурлъун вугев чи, жиндирго халкъалъ гьев къабул гьавичӏо.

¹² Амма жив къабул гьавуразе ва жинда божаразе гьес рес кьуна Аллагьасул лъималлъун рукӏине.

¹³ Лъилниги биялдасан, лъилниги черхалдасан яги бихьинчиясул гьаваялдасан лъугьарал лъималлъун рукӏине гуро рес кьураб, Аллагьасул лъималлъун рукӏинейин.

¹⁴ Рагӏи инсанлъун лъугьана, баркаталъул ва хӏакъабщиналъул цӏурав инсанлъун лъугьун, нижеда цадахъ чӏана. Нижеда бихьана гьесул кӏодолъи – Инсул цохӏо вугев Васасул кӏодолъи.

¹⁵ Гьесул хӏакъалъулъин Яхӏяца бицунеб букӏараб. Яхӏяца ахӏулеб букӏана: «Дида хадув вачӏунев дидаса гӏемерго тӏадегӏанав кколилан дица бицунеб букӏарав чи вуго гьев. Дидасаги цеве вукӏиндалин гьев тӏадегӏанав вугев!»

¹⁶ Гьесул баркаталъул гьарзалъиялъин баркаталда хадубги баркат щвараб нижее.

¹⁷ Къанун Мусахъ битӏун бачӏана Аллагьас, баркатги хӏакъабщинабги Масихӏ Гӏисадасан загьирлъана.

¹⁸ Аллагь киданиги лъиданиги вихьичӏо, амма кидаго Инсудаса ватӏалъуларев цохӏо вугев Васасдалъун вихьизавуна гьес живго.

Яхӏя аварагас жиндиргоги Гӏисалги бицунеб буго

¹⁹ Иерусалималдаса ягьудияз кашишзабиги левиталги мун щивилан гьикъизе ритӏун рачӏараб мехалъ, жиндирго хӏакъалъулъ нугӏлъи гьабун,

²⁰ гьес инкар гьабичӏо, гьев мукӏурлъана – жив Масихӏ гурилан мукӏурлъана Яхӏя.

²¹ Гьедин батани, Иляс аварагищха мунилан гьикъана гьез. Гурилан жаваб кьуна Яхӏяца. Мун аварагищилан гьикъараб мехалъги гурилан абуна гьес.

²² Ахиралда гьез гьикъана: – Щивха мун? Ниж дуда аскӏоре ритӏарал гӏадамазда щибилан нижеца бицинеб? Дуцаго щивлъун мун рикӏкӏунев?

²³ Яхӏяца жаваб кьуна: – Дун вуго, Ишая аварагас абухъе: «Бетӏергьанасе нух къачӏайилан авлахъалда ахӏдолев вугев чи!»

²⁴ Гьел рукӏана фарисеяз ритӏарал гӏадамал.

²⁵ Гьез гьикъана: – Мун Масихӏги гурев ватани, Илясги гурев ватани, аварагги гурев ватани, гьал гӏадамал лъадалъ ччун щайха дуца гьазул мунагьал чурулел ругел?

²⁶ Яхӏяца жаваб кьуна: – Дица нуж, мунагьал чуризе лъадалъ ччун рахъун, рацӏцӏад гьарулел руго, амма халкъалда гьоркьов вуго цо Чи. Нужеда лъаларо гьев.

²⁷ Дида хадув вачӏунев вуго гьев. Гьесул хьитил рухьен бичизецин мустахӏикъав гьечӏо дун.

²⁸ Гьеб гара-чӏвари ккана Иордан гӏурул доб рахъалда бугеб Бетаниялда. Гьенир лъадалъ ччун рахъулел рукӏана Яхӏяца гӏадамал.

«Гьале дов Аллагьасул Кьегӏер»

²⁹ Нахъисеб къоялъ Гӏиса жиндаго аскӏове вачӏунев вихьидал, Яхӏяца абуна: – Гьале дов – гьаб гӏаламалъул мунагь тӏаде босун къурбанлъун лъугьине бугеб Аллагьасул Кьегӏер.

³⁰ Дида хадув вачӏунев дидаса гӏемерго тӏадегӏанав кколилан дица бицунеб букӏарав чи вуго гьав. Дидасаги цеве вукӏиндалин гьав тӏадегӏанав вугев!

³¹ Дида лъалароан гьав, Исраилил халкъалъе гьав загьирлъизе гӏоло, гьел лъадалъ ччун рахъун рацӏцӏад гьаризе вачӏун вуго дун.

³² Яхӏяца нугӏлъи гьабун абуна: – Дида бихьана зобалаздасан Илагьияб Рухӏ, миккидул сураталда боржун бачӏун, гьесухъе рещтӏунеб ва гьесулъ хутӏулеб.

³³ Дида гьебмехалдаги лъачӏо гьев. Амма лъадалъ ччун рахъун гӏадамал рацӏцӏад гьаризе дун витӏарас дида абуна: «Илагьияб Рухӏ жиндихъе рещтӏунев ва жиндихъ гьеб хутӏулев чи вихьила дуда. Гьев ккола Илагьияб Рухӏалдалъун гӏадамал чуризе вачӏарав чи».

³⁴ Гьеб дида бихьана, гьединлъидал дица нугӏлъи гьабулеб буго гьав Аллагьасул Вас вукӏиналъе.

Гӏисал тӏоцересел муридал

³⁵ Нахъисеб къоялъ Яхӏя жиндирго кӏиго муридасда цадахъ вугеб мехалъ,

³⁶ цевесан унев Гӏисахъги валагьун, гьес абуна: – Гьале Аллагьасул Кьегӏер.

³⁷ Гьеб рагӏидал Яхӏял кӏиявго мурид Гӏисада хадур ана.

³⁸ Нахъехун вуссун валагьарав Гӏисада гьел жиндаго хадур рачӏунел рихьана. – Нужее щиб къваригӏун бугеб? – ан гьикъана Гӏисаца гьезда. Гӏисада гьезги гьикъана: – Я, Рабби! («Мугӏалим» абураб магӏна буго гьеб рагӏул.) Дур чӏей, яшав киб бугеб? – абун.

³⁹ Жинда хадур рачӏани лъалин нужеда гьебилан жаваб кьуна Гӏисаца. (Сагӏат ункъо тӏубараб заман букӏана гьеб.) Гьел Гӏисада хадур гьесул бакӏалде ана ва тӏубараб къоялъго гьенир чӏана.

⁴⁰ Яхӏяца бицаралъухъ гӏенеккун, Гӏисада хадур аразул цоясда цӏар Андрей букӏана. Гьев вукӏана Симон Пётрил вац.

⁴¹ Тӏадвуссун щваравго, Симонги валагьун, Андрейица бицана нижеда Масихӏ ватанилан. (Грек мацӏалда Христосилан абула гьесда.)

⁴² Гьес Симон Гӏисахъе вачана. Гьесухъ валагьун Гӏисаца абуна: – Мун вуго Иоаннил вас Симон. Дуда цӏар букӏине буго Кефа (грек мацӏалда Пётр).

Филиппги НатанаэлгиГӏисада хадур уна

⁴³ Нахъисеб къоялъ Галилеялде ине хӏукму гьабуна Гӏисаца. Гьес Филипп валагьана ва жинда хадув вачӏайилан абуна.

⁴⁴ Пётрги Андрейги гӏадин, Филиппги Бетсаида шагьаралдаса вукӏана.

⁴⁵ Натанаэл валагьун, Филиппица абуна Мусал къануналдаги цогидал аварагзабазул Тӏухьдуздаги жиндир хӏакъалъулъ хъван букӏарав чи ватанин жидедаян. Гьев вугин Назареталдаса Юсупил вас Гӏиса.

⁴⁶ Назареталда сахав чи вахъуневищилан абуна Натанаэлица. Мунго а дов вихьизеян абуна гьесда Филиппица.

⁴⁷ Натанаэл вачӏунев вихьараб мехалъ Гӏисаца абуна: – Гьав вуго дов унго-унгояв жугьутӏав, жинца киданиги хӏилла-рекӏкӏ гьабуларев.

⁴⁸ – Дуда дун кисан лъалев? – ан гьикъана Натанаэлица. – Филиппица мун витӏилалдего инжиралъул гъотӏокь гӏодов чӏун вихьана дида мун, – ян абуна Гӏисаца.

⁴⁹ Натанаэлица абуна: – Я, Рабби! Мун вуго Аллагьасул Васги, Исраилил халкъалъул Парччахӏги!

⁵⁰ Гӏисаца абуна: – Инжиралъул гъотӏокь вихьанилан дица абидалищ дуца диде иман лъураб? Гьелдасаги хӏикматал ишал гӏемер рихьила дуда.

⁵¹ Цоги Гӏисаца гьесда абуна: – Хӏакълъун абулеб буго дица дуда: дуда зобал кӏирикьулел рихьила ва гьенисан Гӏадамил Лъимадухъе рачӏунел-унел Бичасул малаикзабиги рихьила.