Коринфиязухъе тӀоцебесеб кагъат 1 - Инжил

1 бетӏер Саламалъул рагӏаби

¹ Гӏиса Масихӏил тӏаса вищарав чапарлъун вукӏине Аллагьасе жив бокьарав Павелил ва диналъул вац Сосфенил рахъалдасан

² Коринфалда ругел иман лъуразул агьлуялде – Гӏиса Масихӏидалъун рацӏцӏалъаразде, жиндирго халкълъун лъугьине Аллагьас тӏаса рищаразде, цинги киса-кибего нилъерги гьезулги Тӏадегӏанав Гӏиса Масихӏие тӏагӏат-гӏибадат гьабулелщиназдеги.

³ Нилъер Эмен – Аллагьасулги Тӏадегӏанав Гӏиса Масихӏилги цӏоб ва салам лъеги нужеда.

Аллагьасе рецц!

⁴ Масихӏ Гӏисадалъун гьес нужеде баркат рещтӏинабуралъухъ дица кидаго Аллагьасе рецц гьабула.

⁵ Гьесдалъун Аллагьас нужер кинабго каламги бечелъизабуна, кинабго гӏакъиллъиги цӏикӏкӏинабуна,

⁶ Масихӏил хӏакъалъулъ нижер нугӏлъиги ритӏухъ гьабуна.

⁷ Гӏиса Масихӏ вачӏинегӏан ралагьун чӏун ругел нужелъ камураб гьунар хутӏун гьечӏо гьанже.

⁸ Нилъер Тӏадегӏанав Гӏиса Масихӏ рещтӏараб къоялъ нуж рацӏцӏадго хутӏизе гьесин ахиралде щвезегӏан нужер ракӏкъвакӏизабилеб.

⁹ Жиндирго Васгун – нилъер Тӏадегӏанав Гӏиса Масихӏгун – цолъизе нуж тӏаса рищарав Аллагь ритӏухъав вуго.

Иман лъуразда гьоркьоб рикьи ккун буго

¹⁰ Нилъер Тӏадегӏанав Гӏиса Масихӏил цӏар бахъун гьарула, вацал, дица нужеда, нуж киналго цоцалъ рекъа-решон рукӏайилан. Рикьи ккезе биччаге – нужер пикруги гӏакълуги цойиде буссинабе!

¹¹ Хлоял рукъалъул агьлуялдасан дида рагӏун бугелъулха, вацал, нужеда гьоркьоб рикьи ккун бугилан.

¹² «Дун Павелил рахъ ккуравилан», «дун Аполлосил рахъ ккуравилан», «дун Кефал рахъ ккуравилан», «дун Масихӏил рахъ ккуравилан» – щивас батӏа-батӏаго абулеб рагӏула нужеца.

¹³ Масихӏ викь-викьунищха вугев?! Павелищха нужее гӏоло хъанчида ван хвезавурав? Павелиде иман лъезейищха нуж лъадалъ ччун рахъарал?

¹⁴ Аллагьасе рецц буго, Криспги Гайги хутӏизегӏан, нужер цогидал дица лъадалъ ччун рахъичӏелъул.

¹⁵ Диде иман лъезелъун дица лъадалъ ччун рахъанилан лъицаниги абиларо.

¹⁶ (Стефанасги гьесул рукъалъул агьлуги лъадалъ ччун рахъана дица, цоги щал лъадалъ ччун рахъаралали ракӏалда гьечӏо.)

¹⁷ Гӏадамал лъадалъ ччун рахъизе витӏичӏо дун Масихӏица. Рохалил хабар бицине витӏана. Гӏакъилал ва пасихӏал рагӏабаздалъун бицунеб гьечӏо дица гьеб Рохалил хабар, – Масихӏ хъанчида ван хвей гӏадада ккелаан гьебмехалъ.

Аллагьасдасан бугеб «гӏантлъи» гӏадамазул гӏакъиллъиялдаса къуватаб буго

¹⁸ Хвалде унезни чӏобогояб чӏандалъун рикӏкӏуна хъанчида ван хварасул хӏакъалъулъ хабар. Нилъее – хвасарлъулезе – гьеб буго Аллагьасул къудрат.

¹⁹ Тӏухьдузда хъван бугелъул: «Гӏакъилазул гӏакъиллъиги къинабилеб Дица, Цӏодоразул цӏодорлъиги яризабилеб Дица».

²⁰ Кив вугев дов гӏакъил? Кив вугев дов гӏалим? Кив вугев гьаб гӏасруялъул дагӏбачи-къацандухъан? Гьаб дуниялалъул гӏакъиллъи гӏантаб жо букӏин загьир гьабичӏищ Аллагьас?

²¹ Аллагьас жиндирго гӏакъиллъиялдалъун гӏаламалъе хӏукму къотӏана, дуниялалъул гӏакъиллъиялдалъун гӏаламалда Жив лъазе виччаларилан. Гьесие бокьана иман лъурал гӏадамал Рохалил хабаралъул «гӏантлъиялдалъун» хвасар гьаризе.

²² Жугьутӏаз мугӏжизат-гӏаламат тӏалаб гьабулеб буго, греказги гӏакъиллъи-гӏалимлъи балагьулеб буго.

²³ Нилъецайин абуни гӏаламалда лъазабулеб буго хъанчида ван хвезавурав Масихӏил хӏакъалъулъ хабар. Жугьутӏазе гьеб буго гӏасилъи, греказеги гьеб чӏанда буго!

²⁴ Аллагьас тӏаса рищаразе – жугьутӏазеги греказеги – гьеб буго Масихӏидалъун загьирлъараб Аллагьасул къудратги Аллагьасул гӏакъиллъиги!

²⁵ Аллагьасдасан бугеб «гӏантлъиги» гӏадамазулалдаса гӏакъилабин, Аллагьасдасан бугеб «загӏиплъиги» гӏадамазулалдаса къуватабин!

²⁶ Аллагьас нуж жиндихъего ахӏараб мехалъ нужго рукӏараб куц ракӏалде щвезабе. Гӏакъилалин рикӏкӏунел гӏадамал гӏемерищ нужеда гъорлъ рукӏарал? Гӏемерищ рукӏарал къадру-къимат бугелги къо-асс бугелги?

²⁷ Гӏакъилал инжитго къезаризейин Аллагьас гӏаламалда гӏантабилан кколеб жо тӏаса бищараб. Къуватал инжитго къезаризейин гьес гӏаламалда загӏипабилан кколеб жо тӏаса бищараб.

²⁸ Къадру гьечӏебги ярагьунаребги, ай гьезего гьечӏилан рикӏкӏунебаб тӏаса бищана Аллагьас, гьаб гӏаламалъ гӏадахъ босун бугеб жо гьезего гьечӏеблъун лъугьинабизе.

²⁹ Гьединлъидал Аллагьасда цеве веццаруге щивниги.

³⁰ Аллагьасин нуж нилъее гӏакъиллъилъун лъугьарав Масихӏ Гӏисагун цолъизарурал. Масихӏица нилъ ритӏухълъизаруна, рацӏцӏалъизаруна, тархъанлъизаруна.

³¹ Гьединлъидал, Тӏухьдузда хъван бугеб куцалъ: «Веццаризе бокьарас Бетӏергьан вецце!»