Yuda 1 - KUNYANYA VUVU YƆ

¹ Keplekpaa lia kɛdɔ ní Yuda gi onu Yesu Kristo yɛ ɔnɔsumu ye ni Yakobo yenemi yɛ klɔ ɔ, ɛki banama gi Ɔka Aya axwa a, gi alɔ ɔ, xe balɛ ní Yesu Kristo yɛ kukakpɛkpɛɔ mɛ ɛ.

² Atɔ Aya ɔki mlɔ yɛ asigagadidi, kusuyɔ ni kulɔlɔ ní kisrɛsrɛ mɛ.

Eboa la gi ɛtra gbani Asia na badɔbasɛ ba ɛkpɛ ɛ

³ Mɛ baʋia veve ba, gi mazekeni edi si miŋwlimi i iki mlɔ ní kubúbú liɔ gi kulɛ ní blɔ awla ní likpɔkpɛkpɛ mɛ kyɛ ɛ, mamɔ si, liziã si miŋwlimi tɔ mikpɛ mlɔ kigagla atɔ mlaŋwlɛ mlɔ kuziŋaa gi Aya aki banama a, gi bɛzɛ yɛ aʋa ɛɛŋa ɛ, litukpo.

⁴ Lɛ banɔatɔ gi ba kuzizi yo su bɛŋwlimi plɛ koko e, bɛza eku ní mlɔ kusi ní kikpokpo me gi mléte e. Benu banɔ gi béte Aya a, ba bɛtsrɛ blɔ Aya yɛ lipomepɛpɛ nɛ liboe le tɔ biamɔ kude tɔ biawa ba kihasi ye, lɛ bɛnada Yesu Kristo blɔ Ɔʋadi ye ni Ɔkaɛ.

⁵ Lɛ gi mlete la ya petee fɛ ɛ, mapɛ si miplɛ aŋu iiki mlɔ si Ɔkaɛ ebu yɛ banima adɔni Egipte, pɔ̀ lɛ kede e, ezizi banama gi bázɛ yɛ aʋa aŋa ɛ.

⁶ Aya yɛ baxwɛdzɛa ba gi béze ní kigaglaɛ liɛ gi Aya aki ba ese e, pɔ̀ xe bɛsɛ ní ba izeklɔ ɛ, bɛkpɛ ba litumu ne me gi bɛkpɛ ba bibɔ kɔtsinɔ kanɔmɛ anɔmɛ mɛ ki litsixwaxwa ní Liwe ʋidi le aʋa a.

⁷ Nite me ke Sodom ni Gomora kɔpɔni ima sisami i nɛ gi iklani ba kyɛ ɛ, bɛyurɔ isu ya ɛki adzɛboe ni enyimeboe ni anyaniboe kakaa elu. Benu liŋwitsɛ aki banama gi betrámɔ kutuhehe ni kifu mobloe me e.

⁸ Nite ke banɔ ba ya gi bizɛɛza balila ʋa a, bizɛbitɛ eboe zimizi ni ba tutɔ ba bisugya ʋɛ, lɛ begbe kutununu ikí Aya xe bizezizi Aya yɛ baxwɛdzɛ ba ní lifunu ne su i.

⁹ Aya yɛ baxwɛdzɛ ba ɔka Mixael kura kyɛ ɔ́mani onugu ní ozimizi ye su, lipoe lɛ gi yɛ ni ozimizi ye behe eboe ní ɔniliɛ gi yɛ linu si ɔzɛ Mose yɛ okpo ye e su. Mixael ókeni ódi si yibu ozimizi ye lipɔ nì kukpini, kipani ko apani si “Ɔkaɛ ɔká aŋu mɛ ɔki wɔ.”

¹⁰ Pɔ̀ banɔ ba ya kɔ ɛ, bizekɔ kukpini iiki kidɔ kakaa gi kɛ ese gi bénu i, lɛ ŋwisi liŋwafu mɛ baga gi baʋíbu litukpo me kinɛ ɛ, bizɛbitɛ kidɔ kakaa gi kiba ba begyodi ʋa mɛ ɛ, gi kɛ ese benu i, lɛ bidɔ bɛ klɔ ʋa ke bizɛki si bizɛkyrɔ.

¹¹ Baba ki ba! Bɛga Kain yɛ kugakli yɔ mɛ. Kɔkpɛ kibɔɛ loso e, bɛta kese ŋwisi Baalam kiniɛ, lɛ bɛyɔ kedu ya ní Aya su, lɛ bɛkyrɔ ŋwisi Kora kiniɛ.

¹² Banɔ ba ya benu kinyani ní mlɔ kunɔlɔɔ kɔ likpɔkpɛkpɛ lɛ bidɔ mɛ ɔŋa klɔ gi bɛŋa bidɔ mɛ kuyemose e. Benu beʋesigbanɔ gi ba tutɔ isu ya ko bɛganɔ ɔ. Balɛ ko ŋwisi aplɛ gi liwɔ lɛ lifu i klanɔ ɔ, pɔ̀ aʋídɔ dzeni i. Balɛ ko ŋwisi ise gi iʋiyo esebi liwewe ní la liyopoe le aʋa a. Ise gi bɛkpaʋi ni lɛ igu ne e, xe itse petee e.

¹³ Balɛ ŋwisi kuni akpɔ ní axu la mɛ ɛ, gi ɛɛwa anyra na a, lɛ ba eyeyeboe la ɛɛfiʋi ŋwisi ɔfɔ ni kuni yo aŋu mɛ ɛ. Balɛ ko ŋwisi aŋwi gi ɛɛyɔ ní la ozeklɔ ɔ, xe ɛɛlila kinɛ ɛ, gi Aya abla ozekɔ akɔ ní litumu gluglu moblo le me e.

¹⁴ Henox gi onu Adam yɛ osobi gloele e, edo liboe aplɛ ní banɔ ba ya su si, “Dike Ɔkaɛ atrába nì yɛ baxwɛdzɛ dradra akpe akpe ʋa,

¹⁵ gi biaxwa litsi ni banima petee e, lɛ biabu banama petee gi bése Aya ɛ lipɔ, kɔkpɛ ba eboe zimizi ana gi bɛbitɛ ní kude uliɔ ɔ, gi kúma ni Aya yɛ kudeo onu u loso. Lɛ biabu enugumeboe ala gi banama klɔ ɔ, gi bizɛbitɛ eboe zimizi na ɛ, bɛpani manɔ ní yɛ su.”

¹⁶ Banɔ ba ya ɛ, benu banɔ gi bizɛɛtɛ̃ ɛ, xe bizebu banɔdzedze ba lipɔ ɔ; bizeezeni ba tutɔ ba bapɛ́pɛ zimizi ba kude; bizɛɛdɔ̀ isu ya, lɛ bizɛkpɔ̀ banima kiliɛ gi biamɔ kudeonu ki ba ɔtutɔ lɔ isu ya loso o.

Bagbágba ʋa ni batrɔtrɔ ʋa

¹⁷ Mɛ baʋia dimɛnɔ ba, mlaplɛ aŋu ní liboe lɛ gi blɔ Ɔkaɛ Yesu Kristo yɛ banɔkpɛkpɛ ba bɛpani aʋa a.

¹⁸ Bɛsi mlɔ si, “Ní ewe gɔgɔ la mɛ ɛ, banima biaba gi biakpɛ mlɔ kakpaa a, lɛ biazeni ba ɔtutɔ ba bapɛ́pɛ gi bamá ni Aya yɛ kupɛpɛ onu i kude.”

¹⁹ Banɔ ba ya ɛ, bizɛmani kulɛlɛ, gi balɛ ni batutɔ ba isu mɛ bapɛ́pɛ ʋa kude e, ɔkpɛ gi Ɔfuɛfuɛ nɔ ɔma ní ba mɛ loso o.

²⁰ Pɔ̀ mlɔ, mɛ baʋia dimɛnɔ ba ɛ, mlatre ní lɛ aʋa tɔ mlaʋɔ̀ mlɔ isu ya pɔnɔ ní mlɔ kuziŋa dradraa mɛ, tɔ mlaxwa Aya ní Ɔfuɛfuɛ Dradra lɔ mɛ.

²¹ Mleze ní Aya yɛ kunɔlɔɔ mɛ, gi mleepe blɔ Ɔkaɛ Yesu Kristo yɛ asigagadidi la a, gi la aamani mlɔ ligbã́ moblo le e.

²² Mledi baʋaziŋaa ba gi bápɛ si bɛɛzɛ liboe le e, asigaga,

²³ mlaʋa banɔ dzedze ba tɔ mlebu ba ní kifu yɛ mɛ, lɛ kí batɔ fɛ ɛ, mledi ba asigaga pɔ̀ mlabitɛ lɛ ni litɔplɛplɛkese kese ni lifu, tɔ mlakíki si ba ligbã́ zimizi ne e, lità eku ní mlɔ mɛ ɛ.

Aya Kuxwaxwa ni yɛ Kukpɔ̀kpɔ̀

²⁴ Ki ɔniliɛ gi yɛ ko aatani kuki si mlatrágleʋe e, xe aamani mlɔ kesemɔta ni isami ní yɛ kuklekleo aŋu mɛ ɛ,

²⁵ kí Aya tolee gi onu blɔ Obúbú ye e, gani Yesu Kristo, blɔ Ɔkaɛ aʋa ɛ, yɛ ko kwiakɔ kubùbù kɔ. Yɛ onu kigaglaɛ petee onete, lɛ yɛ ɛɛŋa kukusi yo ní kidɔ kakaa aʋa dɔni kanɔa mɛ kɔtsini kanɔmɛ! Atɔ liba lɛ mɛ.