Yakobo 1 - KUNYANYA VUVU YƆ

¹ Keplekpaa lia kɛdɔ ní mɛ Yakobo ɔniliɛ gi izeesumu Aya ni Ɔkaɛ Yesu Kristo kɔ ɔ. Mapani mlɔ amade liɔfɔ ni taʋa la gi ɛlɛ eku kelea petee me e.

Kukenidi ni kufekedi bɛ onu kulɛ́lɛɛ

² Mɛ benemi ba, isami iku mlo xe kufekedi ede ede ɛba mlɔ bede ʋa mɛ ɛ,

³ lɛ ese linu si mlete si xe mlɔ kuziŋaa kwiŋa aʋa ní kufekedi uliɔ ya elue me e, libasɛ si mlaatani kɔ onu kulɛɛ.

⁴ Mledi lɛ aʋa si mlɔ eboe la onu kulɛlɛɔ kwigbani mlɔ ɛtsinɔ ní ɔtɔ, tɔ mlakígleʋe e, tɔ mlaatsì, atɔ mlana ní kidɔ kakaa mɛ.

⁵ Pɔ̀ xe kuboete kúma ní mlɔ mɛ ɔtɔ awla ɛ, ɔniliɛ klɔ oʋi Aya tɔ aaki yɛ, lɛ ese linu si Aya izɛɛkɔ ɔnɔ kakaa faã ni lipomepɛpɛ.

⁶ Pɔ̀ xe eʋi i, lilɛ si ɔzɛ ɔŋa tɔ ɔkidi kede kura. Lɛ ese linu si ɔniliɛ gi eedi kede e, ɔlɛ ko ŋwisi axu la gi liwɔ lɛ lifu iklanɔ kinɛ ɛ.

⁷ Ɔniliɛ klɔ, ɔkigyoedi si yɛ amɔ kididɔ dɔni Ɔkaɛ klɔ ɔ.

⁸ Onu onyime begyodi tiaʋa onete gi oʋíli ní yɛ bede ʋa ni yɛ kiboebitɛ mɛ ɛ.

⁹ Lilɛ si isami iku ɔsɔlisɔli liɛ klɔ gi onu opiplinete e, xe Aya emuni ye e,

¹⁰ lɛ oxonete ɔsɔlisɔli yɛ fɛ, ɔmɔ isami xe Aya epleni ye e. Lɛ ese linu si oxonete yɛ ligbã́ nɛ liaza ŋwisi liŋwafu mɛ ose kufùfù kinɛ ɛ.

¹¹ Liwo le lizeetu nì lɛ kuhuhu gaglaa, kuzɛɛkani siwa sɛ, kɔ sɛ bifùfù ʋe biwɔli nite me si sɛ kupedi yo kwizizi i. Nite ke onyime oxonetee fɛ aazizi gi eekyi awla ní yɛ axwɛ na su u.

Kufekedi ni kukenidi kúdɔ Aya kɔ ɔ

¹² Isami iku ɔniliɛ klɔ gi aalɛ ní yɛ kuziŋa aʋa a, xe ɔlɛ kufekedi me e, lɛ ese linu si xe aŋa kufekedi uliɔ ya aʋa ɛ, aazɛ ŋwisi yɛ liʋɛ tsatsa kinɛ ɛ, ligbã́ɛ nɛ gi Aya aka aplɛ ɛ, aki banama gi bɛlɔ yɛ ɛ.

¹³ Xe kufekedi uliɔ ya elu kwiba ɔnutɔ aʋa ɛ, ɔkipani si, “Aya eefeke ye edi i.” Lɛ ese linu si bátratani Aya kufekedi nì eboe zimizi i, lɛ yɛ ɔtutɔ fɛ, óʋifeke ɔnɔnɔ odi i.

¹⁴ Pɔ̀ kufekedi kuzɛɛba ɔnɔ aʋa, xe yɛ ɔtutɔ bapɛ́pɛ nyani nyani ʋa bemeni ye e, xe behe ye zɛkpɛ kufekedi yo me e.

¹⁵ Kɔ yɛ kupɛ́pɛ nyani nyani yɔ gi kuli yɛ ɛ, kwimani kuzimizi, lɛ xe kuzimizi yo kwisrɛ ɛ, kɔ kɔ fɛ kwimani kutse.

¹⁶ Mɛ benemi balɔlɔ nɛ ba, mlakíki tɔ ɔnɔnɔ omeni mlo o!

¹⁷ Kidɔkɔkɔ gbã kakaa ni kidɔflɔflɔ kakaa kidɔ ní lifunu ne, lɛ kiple edɔ ɛdɔni Aya kɔ ɔniliɛ gi yɛ abitɛ lifunu ne kuklekleo o, gi oʋítsrɛ ŋwisi kuklekle ní litumu kinɛ ɛ.

¹⁸ Gani yɛ ɔtutɔ yɛ kupɛ́pɛ mɛ ɛ, akɔ anukwarɛ liboe le apɔ blɔ, tɔ kuze batɔpu ní yɛ bidɔbitɛbitɛ ʋɛ petee kusi.

Kututata ni Liboe le aʋa kubitɛbitɛ

¹⁹ Mɛ benemi balɔlɔ nɛ ba, lilɛ si mlaplɛ aŋu lɛ ya aʋa, Ɔnɔ kakaa ɔkɔsi ní liboe le kununu yo me, pɔ̀ ɔplɛ litɔ kese xe aapani i, lɛ ɔplɛ litɔ kese xe aayeʋi isu u.

²⁰ Lɛ ese linu si Ɔnɔ yɛ kusuyeʋi kuʋíkɔ si babitɛ Aya yɛ kupɛ́pɛ dradra aʋa a.

²¹ Lɛ loso mlayurɔ ligbã́ kluklu ni litukpo me gagla kakaa. Mlepleni isu ya akpɛ ní Aya ese tɔ mlazɛ yɛ liboe le gi akpɛ ní mlɔ ina nɛ mɛ ɛ, gi lɛ liatani mlɔ kubu i.

²² Mlakímeni isu gani yɛ liboe le tètè kununu me ko o, boŋu i, mlakɔ lɛ akpɛ axwɛwawa mɛ.

²³ Ɔniliɛ gi izenu liboe le e, xe ɔʋíwa lɛ su axwɛ ɛ, ɔlɛ ko ŋwisi onyime ɔtɔ gi izedi azinzi yɛ mɛ ɛ, xe izɛmɔ isu ya kiliɛ gi ɔlɛ kinɛ ɛ.

²⁴ Lɛ xe edi isu ya mɔmɔmɔ ɔ, xe asɛ ɛ, kɔ edze yɛ kilɛlɛɛ kyɔŋ.

²⁵ Pɔ̀ ɔniliɛ gi izɛtapo ɔsã flɔflɔ lɔ edi mɔmɔmɔ ɔ, gi izɛki banɔ ɔwlamɔmɔ ɔ, xe izexo lɔ kutu i, xe óʋinu lo ko o, xe aadze lo o, pɔ̀ izɛkɔ lɔ ɛkpɛ axwɛwawa mɛ ɛ, ɔniliɛ klɔ Aya aakrira ní yɛ axwɛwawa la mɛ.

²⁶ Xe ɔnutɔ egyoedi si yɛaflɔ ní kusɔli mɛ ɛ, pɔ xe ɔ́ŋa yɛ kinemi ye aʋa ɛ, emeni isu lɛ yɛ kusɔliɔ kunu kupluplu u.

²⁷ Kusɔli uliɔ gi Aya, blɔ Ɔkaɛ akɔ si kwidra a, xe kesetata káma ní kɔsu i, kɔ kunu si, tɔ mledi bebi ba gi ba bapɔnɛ ba betse e, ni batrɛtrɛ ba bedze ba aʋa, ní ba ɔzia nɔ mɛ, ani tɔ mlebu isu adɔni kelea mɛ kuzimizi kakaa mɛ.