Tito 1 - KUNYANYA VUVU YƆ

¹ Kɛdɔ ní mɛ Paulo gi menu Aya yɛ ɔnɔsumu u, ni Yesu Kristo yɛ ɔnɔ kpɛkpɛɛ klɔ, Aya akya mɛ lɛ atsisi mɛ si mizɛɛpɔni Aya yɛ banɔkyakya ba tɔ baziŋa asanɔ ani tɔ benu anukwarɛ liɛ gi izɛɛki si biaze ligbã nɛ kiliɛ gi Aya apɛ ɛ ese asanɔ,

² anukwarɛɛ liɛ gi onu ɔtɔ kudidi ki ligbã moblo le e. Aya gi ɔʋísɛ asia ɛ, yɛ aka aplɛ aki blɔ dɔni kana mɛ ke,

³ lɛ ní yɛ lipoe trɔtrɔ lɛ aʋa ɛ, Aya blɔ ɔnɔbu ye ebu liboe le abasɛ mɛ. Lɛ Aya akpɛ mɛ si mipani liboe le su u.

⁴ Mɛɛŋwlimi ki Tito, Mɛ ɔtutɔ mɛ obi ní kuziŋaa gi kulɛ ní blɔ awla mɛ ɛ. Tɔ Aya blɔ Ɔka ni Kristo Yesu blɔ Obúbú ye ɔki wɔ lipomepɛpɛ ni kusuyɔ ɔ.

Paulo aki Tito axwɛ ní Kreta

⁵ Kidiliɛ gi kɛ loso masɛ ní wɔ su ní Kreta ɛ, kɛ kinu si tɔ wɔakpɛ eboa la gi ɛgɔ ní la ikpɛ kɔ ɔ, ni tɔ wɔadu banɔtsitsi ba ní baʋaziŋa ba onu ní ɔma kakaa mɛ, ŋwisi kiliɛ gi mabasɛ wɔ ɛ,

⁶ kesetata kakíze ní baʋaziŋa ba ɔnɔtsitsi ye su u, ɔdzɛ tole ko lilɛ si ɔgbanɔ, lɛ yɛ bebi ba fɛ ɛ, lilɛ si beze baʋaziŋa lɛ bakípani ní basu si bénu banɔ yɔyɔ loo si benu banɔ gi baʋíbù banɔ ɔ.

⁷ Agi ɔhalɔ onu ozeze yɛ odi ní Aya yɛ axwɛ na onu loso e, líma si kunutsatsa kutɔtɔ kuze ní yɛ su u. Okíze ɔnɔ gi izɛɛtrɔ ɛki banɔ ɔ, loo izeyeʋi isu kise ise, loo ɔdaŋwɛmu, loo ɔnɔ gi izɛɛbitɛ agaglaboe e, loo ɔnɔ gi yɛ kimbi kizɛɛzã a, xe izɛɛŋa kibɔ ɔ.

⁸ Boŋu i, lilɛ si oze ɔnɔ gi izɛɛzi bababa ba, tɔ ɔdimɛ ni kidiliɛ gi kipɛ ɛ. Ɔŋa isu aʋa, tɔ ɔlɛ ní kude gyɔgyɔɔ aʋa a, ɔdra, tɔ ovu isu ya.

⁹ Ovu anukwarɛ liboe le me gaglaa kiliɛ gi bɛbasɛ lɛ ɛ, tɔ ɔka ní lɛ aʋa si lisrɔ ni batrɔtrɔ ʋa a. Gani lɛ aʋa ɛ, aatani banɔgɔgɔ ba kigagla kukpɛ ní anukwarɛ bidɔbasɛbasɛ mɛ, ani tɔ aabu kesetata basɛ ní banama gi bɛyɔ kedu ní lɛ su i, si bɛta kese.

¹⁰ Lɛ ese linu si banɔ glegle balɛ, gi bɛyɔ kedu ni liboe le su u, banama gi bizeebú onugu me e, li veve le banama gi bizeemeni banɔgɔgɔ ba ni Yudanɛ ma ikɔ lɛ ɛ.

¹¹ Lilɛ si betsí kudeonu aki ba lɛ ese linu si, beezizi kupe zizi gi bɛɛbasɛ bidɔ ɔ gi líma si babasɛ ɛ, kɔkpɛ ba kibɔ pɛpɛ̀ loso.

¹² Kretanɛ gi onu ba ɔtutɔ ba oboedoplɛ ɛ, edo anukwarɛɛ gi apani si i, “Kretanɛ ma ɛ, bizɛsɛ asia lipoe kakaa, benu baga dovo, basranɛ ni baŋazinɛ.”

¹³ Liboe lɛ gi oboedoplɛ liɛ apani i, linu anukwarɛ; lɛ loso e, ká aŋu mɛ ki ba mɔmɔɔmɔ, tɔ beze ní kuziŋa gbã mɛ

¹⁴ atɔ bakínu Yudanɛ ma kudzídzi ni isã gi idɔ ní banama a, gi bekyi kede kpɛ anukwarɛ ɛ klɔ.

¹⁵ Kidɔ kakaa su kidra ɛki banama gi ba tutɔ bɛdra ɛ, pɔ̀ kididɔ su kídra ɛki banama gi bezizi isu ya a, xe baziŋa ɛ, lɛ ese linu si ba begyodi ʋa ni ina nɛ mɛ ɛ, iinyani kooko.

¹⁶ Bizeegyo le edi si betè Aya, pɔ̀ ba kiboebitɛ ɛ kiibasɛ kooko si béte ye. Bizeevu banɔ ɛkpɛ lipo me lɛ baʋínu kutu u, lɛ báma kidɔ gbã kubitɛ mɛ ɛ.