Kolose 1 - KUNYANYA VUVU YƆ

Aya Kuxwaxwa ni yɛ Ɖase Kudodo o

¹ Mɛ Paulo gi menu Kristo Yesu yɛ ɔnɔ kpɛkpɛ ɛ, gani Aya kupɛpɛ onu, ni blɔ onemi Timoteo, blɔ kwiŋwlimi keplekpaa lia ya;

² ɛki banɔdradra ba ní Kolose ni benemi ba gi benu baʋaziŋa ba ní Kristo me e: atɔ Aya blɔ Ɔka ni Ɔkaɛ Yesu Kristo baki mlɔ lipomepɛpɛ ni kusuyɔ!

Paulo axwa lɛ edo Aya ɖase

³ Kuzeedo Aya gi onu blɔ Ɔkaɛ Yesu Kristo yɛka ɖase e lipoe kakaa, xegi kwixwa Aya ní mlɔ litukpo e,

⁴ lɛ ese linu si kwinu mlɔ onu ní mlɔ kaʋaziŋaa ní Kristo Yesu me, ni mlɔ kunɔlɔɔ kí Aya yɛ banima pɔ́.

⁵ Kaʋaziŋa ni kunɔlɔ uliɔ gi kwidɔ ní kudeonudidi uliɔ ɔ, gi bɛbla ɛplɛ ɛki mlɔ ní lifunu ne e, gi kɔ onu mlenu lipoe lɛ ɛ, gi mlenu anukwarɛɛ liboe le e, gi linu Liboe Gbã nɛ ɛ,

⁶ gi liba mlɔ klɔ kinɛ ɛ. Ŋwisi kiliɛ gi lilɛ ní kelea mɛ pɔ ɛ, Liboe Gbã nɛ liibu libi, lɛ liine onugu, ŋwisi kiliɛ ɛ, gi liibitɛ ní mlɔ kusi i, dɔni liwe lɛ klɔ gi mlenu le e, xe mlenu Aya yɛ lipomepɛpɛ nɛ ni lɛ anukwarɛɛ petee ese e.

⁷ Mlɛkpasi lɛ ɛdɔni Epafra, blɔ ɔxwɛwa ɔhanuglɔ dimɛnɔ ɛ, gi izeesumu Kristo ni yɛ ɔna petee e, gi ɔlɛ ní blɔ linyi ne me e, kɔ.

⁸ Ɔniliɛ klɔ kee apani asi blɔ ní mlɔ kunɔlɔɔ gi Aya yɛ Ɔfuɛfuɛ nɔ ɛki mlɔ su u.

⁹ Lɛ loso e, dɔni liwe lɛ klɔ gi kwinu liboe lɛ ya ni mlɔ su i, kúmɔni Aya kuxwa ní mlɔ litukpo o, lɛ kuzeeʋi si Aya ɔki si mlete yɛ kupɛpɛɔ ni tɔ yɛ Ɔfuɛfuɛ nɔ ɔki mlɔ kuboete ni kuboesenu kakaa tɔ mlete kidiliɛ gi apɛ si mlabitɛ ɛ.

¹⁰ Kwixwa Aya si mlaatani ligbã́ nɛ kuze kiliɛ gi Ɔkaɛ apɛ́ ɛ, lɛ mlabitɛ kidiliɛ gi kiku yɛ aŋu i, ní kude kakaa onu. Lɛ kwiʋi Aya si mlaawa axwɛ gbã kakaa a, lɛ mlatsi i, lɛ mlaate Ye ɔsã nɔ ɔ.

¹¹ Tɔ Aya aakpɛ mlɔ kigagla gani kigaglaɛ liɛ gi kidɔ ní yɛ kusudraa mɛ ɛ, atɔ mlaatani kulɛɛ ni igyi dodo, ni litɔplɛplɛkese kese ní kidɔ kakaa mɛ.

¹² Kwiʋi si mlaakɔ isami udo Ɔka Aya ɖase, gi aaki si mlamɔ ɔ ɔŋakɔ ní kidiliɛ gi abla aki yɛ banima a, ní Aya yɛ kaʋaŋaa, gi kenu kuklekle me e.

¹³ Lɛ ese linu si ebu blo ní litumu ne kigaglaɛ ese, lɛ akɔ blɔ amanɔ ní Yebi dimɛnɔɛ yɛ kaʋaŋaa mɛ ɛ.

¹⁴ Lɛ yɛ atsa liʋɛ nɛ ní blɔ litukpo o, xe bɛkɔ blɔ eboe zimizi na ɛkyɛ blɔ ɛ.

Kristo Ɔnɔɛ ni Yɛ axwɛwawa la

¹⁵ Kristo gi kuzɛɛmɔ ɛ, yɛ onu Aya gi ɔnɔnɔ ɔʋímɔ ɔ, yɛ kilɛ́lɛɛ mɛ. Yɛ onu obi tɔpu yɛ, gi amɔ kigagla a, ní kidɔ kakaa gi Aya abitɛ ɛ aʋa.

¹⁶ Lɛ ese linu si gani yɛ aʋa Aya abitɛ kidɔ kakaa, ní lifunu ne ni kesea aʋa, kidɔ kakaa gi bizɛɛmɔ ɔ, ni kidɔkakaa gi baʋímɔ ɛ, xe ekusigbo o loo bigagla, xe kukàŋaŋa, loo baʋaŋa a, bɛbitɛ kidɔ kakaa gani yɛ aʋa, lɛ bɛbitɛ ʋɛ ki yɛ ɛ,

¹⁷ lɛ Kristo ɔlɛ xe Aya abitɛ kidɔ kakaa a, lɛ ní yɛ mɛ ɛ, kidɔ kakaa kikpɛ likpɔ.

¹⁸ Yɛ onu litukpo le ki ɔnɔse lo gi onu ɔsɔli ha lɔ ɔ; yɛ onu okpese klɔ ni obi tɔpu yɛ gi bɛyɔnɔ ɛdɔni bekpo ʋa mɛ ɛ, tɔ yɛ aazɛ ɔtɔpu klɔ ní kidɔ kakaa mɛ.

¹⁹ Lɛ ese linu si liku Aya liŋu si, yɛ kidɔ kakaa kilɛ ní Kristo me e,

²⁰ lɛ gani yɛ obi ye aʋa ɛ, aavu kigũ ní yɛ isu ya ni kidɔ kakaa kusi, lɛ gani Yebi ye ikaɛ lɛ gi bɛ bali ní osetsase lo su me e, aamani kusuyɔ ní kidɔ kakaa ní kesea aʋa ni kidɔ kakaa ní lifunu ne kusi i.

²¹ Ní lipoe lɛ gi liza mɛ ɛ, mlekyi kede kpɛ Aya, lɛ mlɛbitɛ isu ya yɛ ahwafianɛ ní mlɔ begyodi ʋa mɛ kɔkpɛ mlɔ biboebitɛ zimizi ʋe loso,

²² pɔ̀ abla ɛ, Aya akpɛ mlɔ ni yɛ likpɔ gani Yebi ye kutseo ní osetsase lo su me, lɛ loso aki si mlalɛ ní yɛ aŋu mɛ ŋwisi banɔ dradra a, gi liŋwitɔtɔ lìma ní mlɔ su u, lɛ kunutsatsa kutɔtɔ kúma ní mlɔ su kinɛ ɛ.

²³ Mlaze ní likpɔkpɛkpɛ me ni Kristo xegi mlɛtrɛ lɛ aʋa a, xe mlalɛɛ ní mlɔ kuziŋaa mɛ ɛ, gi bedu mlo o, xe mleli i, xe bátratani mlɔ kuhwanɔ ɔ dɔni kudeonudidi uliɔ gi Liboe Gbã nɛ liki mlɔ mɛ ɛ. Lɛ ya linu Liboe Gbãɛ nɛ gi mlenu u, gi bɛpani si kidɔbitɛbitɛ kakaa a ní lifunu ne ese. Liboe Gbã ɛ nɛ ya lɛ ɔnɔsumu mɛ Paulo medzi.

Paulo yɛ axwɛwawa la ki ɔsɔli ha lɔ

²⁴ Abla ɛ, mizɛɛmɔ isami ní ɔzia nɔ gi matsanɔ ní mlɔ litukpo e su, lɛ mɛɛpɔnɔ tɔ míblono ní mɛ kisugyaɛ mɛ, kidiliɛ gi kigɔ ní Kristo yɛ ɔzia mɔmɔ nɔ mɛ ɛ, ní yɛ kisugyaɛ mɛ, gi kinu ɔsɔli ha lɔ ɔ.

²⁵ Lɛ medzi ɔsɔli ha lɔ ɔnɔsumu kɔkpɛ lixwɛ ɛ nɛ gi Aya aki mɛ ɛ, si mikɔ yɛ Liboe zizi nɛ kɔki mlɔ loso.

²⁶ Lɛ linu liboe lɛ gi bekpo edɔni kanaa mɛ ní blɔ baka koko ba lipoe le ke e; pɔ̀ abla ɛ, ebu le abasɛ Aya yɛ banɔ dradra ba.

²⁷ Aya apɛ si tɔ bete yɛ Liboe kpòkpò le lɛ kedzizɛzɛa gi kalɛ ni yɛ awla a aki banama gi bénu Yudanɛ ma a, gi linu Kristo o, gi yɛ ɔkpasi ní mlɔ mɛ ɛ, gi lɛ linu blɔ kudeonudidi i, si blɔ kyɛ kwiamɔ ɔŋakɔ ní Aya yɛ kusudra mɛ.

²⁸ Kwidra yɛ su si ɔnɔ kakaa gi kwibu lɛ mɛ ɛ, lɛ kwigba ɔnɔ kakaa a, lɛ kwibasɛ ɔnɔ kakaa a gani kuboete kakaa mɛ, tɔ kwiaki ɔnɔ kaka aalɛ ní Aya aŋu mɛ ɔnɔ zizi, gi ɔlɛ ni likpɔkpɛkpɛ mɛ ni Kristo e.

²⁹ Tɔ mitani lɛ kubitɛ ɛ, mɛɛŋwlɛ gani Kristo yɛ kigaglaɛ petee gi aki mɛ ɛ, xe kiiwa axwɛ na ní mɛ mɛ̀ ɛ.