Hebr 1 - KUNYANYA VUVU YƆ

Aya apani aki blɔ gani Yebi ye aʋa

¹ Ni kana mɛ ɛ, Aya egu kunugu yo epoe glegle nì gani bede glegle aʋa aki blɔ baka tsitsi ba gani yɛ beboedoplɛ ba aʋa.

² Pɔ̀ ní ewe gɔgɔa la ya mɛ ɛ, egu kunugu aki blɔ gani Yebi ye aʋa a. Yɛ Aya akya si ɔŋa kidɔ kakaa aʋa, lɛ yɛ onu ɔniliɛ gi yɛ aʋa Aya aga a, xe abitɛ kelea a.

³ Aya Yebi ye yɛ onu Aya yɛ kusudraa gì kwidɔ ní Aya yɛ kuklekleo me e, lɛ yɛ kee onu Aya yɛ kizezee me tutu gi yɛ aki kelea kalɛ gani yɛ liboe le kigaglaɛ mɛ ɛ. Lɛ gi akɔ isu ya akɔ aki Aya a, ŋwisi bidɔ pɔʋi pɔʋi kinɛ ɛ, xe eplo eboe zimizi na azanɔ pɔ́ ɛ, odi ni Aya yɛ kigaglaɛ petee kɛ kaŋawla mɛ ní lifunu ne.

Aya Yebi ye emu asani Aya yɛ baxwɛdzɛ ba

⁴ Lɛ loso Aya abitɛ yɛ si emu asani Aya yɛ baxwɛdzɛ ba petee ŋwisi kiliɛ gi linyii nɛ ɛ, gi aki yɛ ɛ, liŋa kedzi sani ba enyi na petee.

⁵ Lɛ ese linu si Aya yɛ baxwɛdzɛ ba mɛ owoli bɛsi edi si, “Mobi wonu, omono liwe le medzi wɔ Ɔka a”? Xe asi yɛ dzɛ si i, “Mɛ maadzi Ɔka ki yɛ, lɛ yɛ fɛ ɛ, aadzi mɛ obinyime e”?

⁶ Lɛ xegi Aya edzini yebinyime e gi ɔlɛ ɛ, xe ableke bebu kidɔ kakaa, amani kelea mɛ ɛ, Aya apani si, “Lilɛ si Aya yɛ baxwɛdzɛ ba petee bakpɛ litukpo kese aki yɛ.”

⁷ Lɛ Aya apani ní yɛ baxwɛdzɛ ba su si, “Aya abitɛ yɛ baxwɛdzɛ ba ŋwisi liwɔ lɛ kinɛ ɛ, lɛ abitɛ yɛ banɔsumu ba ŋwisi kifu binemi kinɛ ɛ,”

⁸ lɛ apani ní Yebi ye su si, “Aya wɔ kaʋaŋaa kiaze tsinɔ kanɔmɛ anɔmɛ. wɔaŋa wɔakɔanɛ ma aʋa ní kude gyɔgyɔ aʋa.

⁹ Wɔdimɛ ni eboa la gi ɛgyɔ; lɛ wɔ́dimɛ ni eboe nyani nyani i. Lɛ loso Aya wɔ Aya, akya wɔ xe aki wɔ ozekɔ gi emu isani izekɔɛ lɛ klɔ gi aki wɔ ahanuglɔ ba, lɛ wɔmɔ̀ isami gi Aya asra kumu yɔ aki wɔ ɛ.”

¹⁰ Apani kyɛ si, “Oo Ɔkaɛ, wɔ wɔbitɛ kesea dɔni okpese klɔ, lɛ lifunu ne linu wɔ iwla onu axwɛwawa.

¹¹ Bidɔ bɛ ya petee bɛ onu biaza, pɔ̀ wɔkɔ ɛ, wɔaze tsinɔ; lɛ bɛpɔ́ biahá ŋwisi kusa kinɛ ɛ,

¹² Wɔaklɔʋi bɛ ŋwisi kiliɛ gi bizɛklɔʋi liwu kinɛ ɛ; lɛ wɔatsrɛ ʋɛ ŋwisi kiliɛ gi bizɛɛtsrɛ basa koko kinɛ ɛ. pɔ̀ wɔkɔ ɛ, nite ko wɔlɛ, lɛ wɔ agɔ la onu atráza a.”

¹³ Aya yɛ ɔxwɛdzɛ woli Aya asɛ edi si, “Ze ní mɛ kaŋaa mɛ, kɔzɛna ni lipoe lɛ gi maakɔ wɔ ahwafianɛ ma kpɛ ní wɔ kuklise o?”

¹⁴ Lɛ ege Aya yɛ baxwɛdzɛ ba benu u? Ba petee aní ifuɛfuɛ gi izesumu Aya a, xe izɛɛkpɛ lɛ si izɛɛpɔni banama gi biamɔ kubúbú na a?