Иоанние Аллагьас загьир гьарурал ишал 1 - Аллагьасул Калима

1 бетӀер ГӀиса МасихӀидалъун загьирлъарал ишал

¹ КватӀичӀого ккезе бугелъул хӀакъалъулъ жиндирго лагъзадерида лъазабизе Аллагьас ГӀиса МасихӀидалъун загьир гьарурал ишазул бицунеб буго гьаб тӀехьалда. Гьесги гьел ишал, малаикги витӀун, жиндирго лагъ Иоанниеги загьир гьаруна.

² Иоанница нугӀлъи гьабула жиндаго бихьанщиналъе – Аллагьасул рагӀиялъе ва МасихӀ ГӀисаца загьир гьабурабщиналъеги.

³ Гьардарал гурелдай Аллагьасдасан рещтӀараб гьеб калам рагӀун цӀаларавги, гьелъухъ гӀенеккаралги, жидеца гьеб каламалъул амруял тӀуразаруралги. Гьаб тӀехьалда бицунеб бугебщинаб лъугьине заман щолеб бугелъулха!

Саламалъул рагӀаби

⁴ Асия улкаялда ругел иман лъуразул анкьабго жамагӀаталде Иоаннил рахъалдасан салам. Жив хӀакъав, абадияв, даимав Аллагьасул, гьесул тахалда цеве вугев анкьавго кӀудияв малаикасул

⁵ ва ритӀухъав нугӀлъунги вугев, хваралъусаги тӀоцеве вахъунев дуниялалъулго ханзабазул парччахӀ ГӀиса МасихӀил баркатги саламги лъеги нужеда. Гьесие нилъ рокьула, жиндирго биялдалъун нилъ гьес нилъер мунагьаздаса рацӀцӀад гьаруна,

⁶ жиндирго Инсул – Аллагьасул кашишзабилъунги лъугьинарун, гьес нилъ жиндирго парччахӀлъиялде рачана. Абадул абадиялъ даимлъаги гьесул хӀалкӀолъиги къудратги! Амин.

⁷ Гьале, накӀкӀаздаги рекӀун, вачӀунев вуго гьев. Киназдаго вихьила гьев, гьесда хеч къазабураздагицин вихьила. Дуниялалъул киналго халкъал гьесухъ гӀодила. Гьедин букӀина. Амин.

⁸ Дун Алипги Яги вугилан, Авалги Ахирги вугилан абулеб буго Жив хӀакъав, абадияв, даимав Аллагьас – Къудратав БетӀергьанас.

ГӀадамил Лъимада релълъарав чи

⁹ Дун вуго, ГӀисадехун цолъун, нужеда цадахъ гӀазаб-гӀакъуба хӀехьезе сабру бугев ва гьелдалъун Аллагьасул парччахӀлъи насиблъизе бугев нужер вац Иоанн. Аллагьасул рагӀи тӀибитӀизабуралъухъ ва ГӀиса МасихӀие нугӀлъи гьабуралъухъ тамихӀалъе дун витӀана Патмос абулеб чӀинкӀиллъиялде.

¹⁰ ТӀадегӀанасул къоялъ Илагьияб РухӀалъ асар гьабуна дие – мугъзада нахъасан ахӀулеб рагӀана:

¹¹ «Дуда бихьулеб бугеб жо тӀанчазда хъвай ва иман лъуразул анкьабго жамагӀаталде: Эфесалде, Смирнаялде, Пергамалде, Тиатираялде, Сардисалде, Филадельфиялде ва Лаодикеялде битӀе».

¹² Дун нахъехун вуссана, дида рагӀулеб бугеб гьаракь лъилали лъазе. Нахъехун вуссиндал, дида бихьана анкьго меседил чирахъ.

¹³ Гьел чирахъазул бакьулъ вугоан ГӀадамил Лъимада релълъарав чи. Гьесда тӀад букӀана хӀатӀазде щвараб гӀаба ва карандасан борчун букӀана меседил рачел.

¹⁴ Квас кинигин хъахӀаб букӀана гьесул ботӀрол рас. Бералги цӀалъун кенчӀолел рукӀана.

¹⁵ ЦӀадаб биунеб бугеб мазгаралда релълъун рукӀана хӀатӀал. Лъадал кӀудияб чвахелоялъул гӀадинаб букӀана гьаракьги.

¹⁶ Гьесул кваранаб хъатикь букӀана анкьго цӀва. Гьесул кӀалдиса къватӀибе бачӀунеб рагӀиги релълъунаан кӀибалаб ва рекӀараб хвалченалда. Къалъул гӀужалда бакъ гӀадин гвангъун букӀана гьесул гьумерги.

¹⁷ Хварав чи гӀадин, гьесул хӀатӀазда цеве гӀодов ккана дун, гьесда бер чӀварабго. Кваранаб кверги дида тӀад лъун, гьес абуна: «Мун хӀинкъуге. Дун тӀоцевесевги ахирисевги вуго.

¹⁸ Дун чӀагояв вуго. Хун вукӀарав дун гьале абадул абадиялъего чӀаголъун вуго. Дихъ буго хвалилги хварал ругеб бакӀалъулги кӀул.

¹⁹ Дуда бихьизабурабщинаб – гьанже ккарабги ва хадуб ккезе бугебги – хъвай дуца.

²⁰ Дир кваранаб хъатикь дуда бихьулеб анкьго цӀваялъулги анкьго меседил чирахъалъулги балъголъи гьадинаб буго: анкьго цӀва ккола иман лъуразул анкьабго жамагӀаталда вугев чапар, анкьго чирахъги ккола гьеб анкьабго жамагӀат».