Эстер 1 - Аллагьасул Калима

Ваштие гьабураб тамихӀ

¹ Гьаб лъугьа-бахъин ккана Ахашверошил зманалда. Гьиндустаналдасан Эфиопиял – щвезегӀан нусиялда къоло анкьго вилаяталда тӀад парччахӀлъун вукӀана гьев Ахашверош.

² Доб заманалда Шушан абулеб шагьаралда бугеб хъалаялда букӀана парччахӀасул тах.

³ ПарччахӀлъун вахъун лъабабилеб соналъ гьес жиндирго киналго чӀухӀбузе ва чукъбузе гӀуцӀана кӀудияб сухӀмат. Гьенире ахӀана Персиялъул ва Мадаялъул аскаразул бутӀрул, чӀухӀби ва вилаятазул сардарал.

⁴ Нусиялда ункъого къоялъ гьоркьоса къотӀичӀого бихьизабуна гьес жиндирго парччахӀлъиялъул гуч, бечелъи, ва жиндирго къадру-къиматалъул кӀодолъи.

⁵ Хадуб Шушан хъалаялъул кинабго халкъалъе парччахӀасул кӀалгӀаялъул ахикь гӀуцӀана квана-гьекъей; мискинал-бечедал батӀа гьаричӀого, тӀолабго гӀаламалъе гьабуна анкьил сухӀмат.

⁶ ХъахӀал ва канчӀхъахӀилал, хирияб харайдул гьарурал пардавалги ригъун къачӀан букӀана ах. Гьел пардавал, хъахӀал ва билбагӀарал кваралги цӀан, рухьун рукӀана мармаралъул хӀубазда тӀад рарал гӀарцул горазда. Меседил ва гӀарцул тахбакӀал лъун рукӀана порфир, мармар, гьулимаргъал ва цоги батӀи-батӀияб хирияб гамачӀ гӀодоб бекьун къачӀараб азбаралда.

⁷ Чагъир гьекъолеб букӀана батӀи-батӀиял, цояздаса цоял берцинал меседил щурмазухъе тӀун ва гьеб парччахӀасул чагъир гьесул сахаватлъиялда рекъон гьарзаго тӀолеб букӀана.

⁸ Жив-жив чияс жиндиего бокьарабгӀан гьекъолеб букӀана гьеб, щайгурелъул, парччахӀас жиндирго вазирзабазе буюрухъ кьун букӀана халкъалъул щивав чиясе бокьарабгӀан чагъир тӀеян.

⁹ ПарччахӀасул кӀалгӀаялда, парччахӀасул лъади Ваштицаги гӀуцӀана руччабазе сухӀмат.

¹⁰ Анкьабилеб къоялъ гьекъон кепалда вугев парччахӀ кӀалъана гьесда цере хӀалтӀулел анкьго ахтабазда, – гьезул цӀарал рукӀана Мегьуман, Бизтан, Харбон, Бигьтав, Авагтан, Зетар ва Каркас.

¹¹ ПарччахӀлъиялъул тажги ботӀрода лъун Вашти бика жинда цее ячеян буюрухъ кьуна гьес – халкъалда ва чӀухӀбузда гьелъул берцинлъи бихьизабизе – гьей кутакалда гьайбатай гӀадан йикӀиндал.

¹² Амма парччахӀасул чӀужу Ваштица инкар гьабуна парччахӀас ахтабаздаса кьураб буюрухъалда рекъон гьесда цее ячӀине. Гьебмехалда кутакалда ццин бахъана парччахӀасул ва битӀахъе гьалаглъана гьев.

¹³ Гьес гьеб иш жиндирго расму-къанун лъалел гӀакъилзабазда данд бана – парччахӀасул гӀадат букӀана гьабулеб жо киналго гӀакъилзабазда дандбан гьабулеб.

¹⁴ Гьесул бищун цереселлъун рукӀана Каршен, Шетар, Адматан, Таршиш, Мерес, Марсена ва Мемухан – гьел анкьалго Персиялъул ва Мадаялъул чӀухӀбузул ихтияр букӀана бокьараб мехалъ парччахӀасда цере рачӀине ва парччахӀлъиялда жаниб бищун цӀикӀкӀараб кьадруги букӀана гьезул.

¹⁵ ПарччахӀас ахтаби гьоркьор ккун лъазабураб амру тӀубазабичӀей Ваштида, къануналда рекъон, щиб гьабизе кколебин цӀехана парччахӀас гьезда.

¹⁶ ПарччахӀасда ва чӀухӀбузда цеве вахъун гьадин кӀалъана Мемухан: «Цо парччахӀасда цее гурейги, киналго чӀухӀбузда ва парччахӀ Ахашверошил киналго вилаятазул тӀолалго халкъазда цее гӀайибияй йиго Вашти бика.

¹⁷ Гьанже киналго руччабазда лъазе буго гьелъ гьабураб жо ва „живго парччахӀ Ахашверошица жиндихъе Вашти бика ячеян буюрухъ кьедал, гьелъ инкар гьабуна ячӀине“, – янги абун, росабазул тӀокӀалъ адаб-хӀурмат гьабиларо лъудбуз.

¹⁸ Гьанже Ваштица гьабураб рагӀарал Персиялъул ва Мадаялъул къадру-къимат тӀадегӀанал руччабазги гьединго абила киналго парччахӀасул чӀухӀбузда ва росабазухъ гӀенеккиларо, цинги дагӀба-рагӀи ва инжитлъи гӀемерлъила.

¹⁹ Гьединлъидал, парччахӀасе къабуллъани, биччанте гьес тӀокӀаб хисизе рес гьечӀеб ва Персиялъулгун Мадаялъул къануналдаги хъвазабураб, парччахӀ Ахашверошида цее Вашти ячӀине гьукъараб буюрухъ кьезе. Гьелъул бикалъиялъул цӀарги цоги, гьелдаса тӀокӀай чӀужугӀаданалъе кьезе биччанте парччахӀас.

²⁰ Гьеб парччахӀасул буюрухъ гьесул кӀудияб парччахӀлъиялда киса-кибего лъазабун хадуб, тӀолалго руччабаз адаб-хӀурмат гьабизе буго жидерго росабазул, бечедал-мискинал батӀалъи гьечӀого».

²¹ Гьеб рагӀи рекӀее гӀуна парччахӀасе ва гьесул чӀухӀбузе, ва Мемуханица абухъе гьабуна гьес гьеб иш.

²² ПарччахӀлъиялъул тӀолалго вилаятазде, щибаб халкъалъухъе, гьезул жидерго мацӀазда ва гьезул жидерго хъвай-хъвагӀаязда рекъон, ритӀун ана кагътал. «Бихьинчи вукӀине ккола жиндирго хъизан-рукъалъул бетӀерлъун», – абун хъван букӀана гьел кагътазда ва жиб-жиб мацӀалда ахӀун лъазабуна гьеб.