Даниял 1 - Аллагьасул Калима

Даниял ва гьесул гьалмагъзаби Вавилоналъул кӀалгӀаялда

¹ Егьояким Ягьудиялъул пачалъун вахъун лъабабилеб соналъ, Вавилоналъул пача Навуходоносорица Иерусалималде тӀаде гьужум гьабуна ва шагьар сверун ккуна.

² БетӀергьанас Ягьудиялъул пача Егьоякимги Аллагьасул Рукъалъул гӀемерисел тӀагӀелалги гьесул ихтияралде кьун тана. Навуходоносорица Шинар улкаялде росун ана гьел тӀагӀелал ва жиндирго аллагьзабазул рокъор хазина цӀунулеб бакӀалда лъуна.

³ Вавилоналъул пачаяс жиндирго чукъбузул бетӀер Ашпеназие буюрана пачабазул тухум-кьибилалъул ва чӀухӀби-хӀакимзабазул хъизаназда гьоркьоса чанго гӀизраилав тӀаса вищеян

⁴ – щибгӀаги гӀузру гьечӀел, гьайбатаб сипаталъул, цӀали-хъваялъе ва гӀелмуялъе гьунар бугел, пачаясул кӀалгӀаялда хъулухъалъ рукӀине санагӀатал гӀадал. Гьезда вавилониязул мацӀ ва гьезул адабият малъеян лъазабуна.

⁵ Пачаяс буюрана тӀаса рищарал гӀолилазе щибаб къоялъ жиндицаго кваналеб гӀадаб квен-тӀех ва тӀаса бищараб чагъир кьеян. Лъабго соналъ гӀелмуги малъун, хадур гьел жинда цере рачеян лъазабуна гьес.

⁶ Гьезда гьоркьор рукӀана Даниял, Хананиягь, Мишаэл ва Азариягь – киналгоги Ягьудал къавмалъул васал.

⁷ Ашпеназица цӀарал хисун, Даниялида – Белтешацар, Хананиягьида – Шадрах, Мишаэлида – Мешах, Азариягьида Авед-Него абун цӀарал лъуна.

⁸ Амма Даниялица хӀукму гьабуна кинаб батаниги хъубаб кванда жиндица кӀал хъваларин – я пачаясул квен кваналарин, я гьесул чагъир гьекъеларин. Цинги гьес Ашпеназида гьарана динияб къануналда рекъон жив хъублъизавулеб квен кваначӀого тезе изну кьеян.

⁹ Аллагьас Ашпеназил рекӀелъ Даниялидехун гурхӀел-рахӀму батизабуна,

¹⁰ ва гьес Даниялида абуна: «Дун дир бетӀерчӀахъаяв пачаясукьа хӀинкъула; гьес жиндицаголъидал бихьизабун бугеб нужеца кваназе кколебги гьекъезе кколебги. Цогидазда данде ккун, нуж хӀалакъго ругеблъи гьесда бихьани, щиб цинги гьабилеб? Нуж сабаблъун пачаяс дир бетӀер къотӀилагури!»

¹¹ Гьебмехалъ Ашпеназица Хананиягьил, Мишаэлил, Азариягьил ва жиндирго тӀалаб-агъаз гьабизе тарав чиясда кӀалъана Даниял:

¹² «Бегьулеб батани, нижер, дур лагъзадерил, хӀалбихьи гьабе: нижее цохӀо лъимги пастӀаналъул нигӀматги гурони кваназе кьоге анцӀго къоялъ.

¹³ Хадуб нижер гьумер пачаясул квен-тӀех кваналел гӀолилазулалда данде ккве. Дудаго бичӀчӀила цинги дурго лагъзадерие щиб гьабизе кколебали».

¹⁴ Ашпеназ гьелда разилъана, ва гьезул хӀалбихьи гьабиялъе анцӀго къо цӀана.

¹⁵ АнцӀго къо ун хадуб, пачаясул квен кваналезулалдасаги гьезул гьурмал жанир цӀун берцинлъун ратана.

¹⁶ Гьелдаса хадуб гьезие босун бачӀараб пачаясул квенги чагъирги нахъе босулаан гьев чияс, ва гьелъул бакӀалда гьезие пастӀаналъул нигӀмат кьолаан.

¹⁷ Ункъавго васасе гъваридаб лъай-гӀакълуги, гӀелму босизе пагьмуги кьуна БетӀергьанас. Даниялие, гьелда тӀадеги, макьаби къотӀизе, балъголъаби рихьизе ва гьезул магӀна бичӀчӀизе рекӀел цӀодорлъиги кьуна.

¹⁸ Пачаяс цӀараб заман рагӀалде щведал, Ашпеназица гьел Навуходоносорида цере рачана.

¹⁹ Пача гьелгун гара-чӀварана ва гьесда бихьана киналго васазда гьоркьоб, гӀелму-лъаялъул рахъалъ, Даниялида, Хананиягьида, Мишаэлида ва Азариягьида бащадав щивго гьечӀолъи. Гьединлъидал, гьел тӀаса рищана пачаясул хъулухъалъе.

²⁰ Щибаб суалалда хурхунги, сундул хӀакъалъулъ пачаяс цӀеханиги, гьезул гӀакълу-лъай ва бичӀчӀи буголъи анцӀго нухалъ цӀикӀкӀараб букӀана пачалихъалда ругел тӀолалго балъголъи лъалел чагӀазда ва сихӀручагӀазда данде ккун.

²¹ Ханасул кӀалгӀаялда хъулухъчилъун Даниял вукӀана Кир пачалъун вахъун тӀоцебесеб соналде щвезегӀан.