Иоаннил тӀоцебесеб кагъат 1 - Аллагьасул Калима

1 бетӀер ЧӀаголъиялъулаб рагӀи

¹ Авалалдасанго букӀараб, нижеда рагӀараб, нижерго беразда бихьараб, ниж жиндихъ ралагьараб, нижеца жинда кверал хъвараб ЧӀаголъиялъулаб РагӀул хӀакъалъулъ хъвалеб буго нужехъе.

² Абадияб гӀумру загьирлъана, ва нижеда гьеб бихьана, ва нижеца гьелъие нугӀлъи гьабулебги буго. Нужеда лъазабулебги буго Инсуда аскӀобги букӀараб, нижееги загьирлъараб гьеб абадияб гӀумруялъул хӀакъалъулъ.

³ Нижедаго бихьаралъулги рагӀаралъулги хӀакъалъулъ нужедаги лъазабулеб буго, нижги нужги цо агьлулъун лъугьине бокьун. ХӀакълъунго нилъ руго Инсулги ва гьесул Вас ГӀиса МасихӀилги агьлу.

⁴ Нижер рохел гьарзалъизе бокьун хъвалеб буго гьаб кагъат нужехъе.

Нилъ Нуралда гъоркь хьвадулел руго

⁵ Аллагь Нур вугин ва гьесулъ бецӀлъи гьезего гьечӀин абун МасихӀидасан рагӀараб хабар гьале нужедаги лъазабулеб буго.

⁶ Гьесул агьлу бугиланги абун нилъ бецӀлъуда хьвадулел ругони, нилъеца абулебги гьабулебги гьересилъиларищ?

⁷ Аллагь Нуралъулъ вугев гӀадин, нилъги Нуралда гъоркь хьвадулел ругони, гьебмехалда цо агьлулъун лъугьуна нилъ ва Аллагьасул Вас ГӀисал биялдалъун чурула нилъер киналго мунагьалги.

⁸ Нилъеда мунагь гьечӀилан нилъеца абулеб бугони, гьеб букӀина нилъго нилъецаго гуккилъун. Гьебмехалда хӀакъабщинаб букӀинищ нилъер рекӀелъ?

⁹ Гьесда цере нилъеца нилъерго мунагьал рехсани, рагӀи кьучӀав ва ритӀухъав Аллагь тӀасалъугьуна, гьес нилъ кинабго квешлъиялдаса рацӀцӀад гьарула.

¹⁰ Мунагьго гьабичӀилан нилъеца абуни, Аллагьас гьереси бицунеб бугин аби кколагури гьеб. Гьебги ккола гьесул РагӀуе нилъер рекӀелъ бакӀ батичӀолъи.