Yakobus 1 - Suha' Masero

Kara salama'na Yakobus

¹ Pano di ingkämmua' peänä'anna yato ang sampulo derua änä'na Israel, ang tisembu' pano di bohto senga'. Hao mai di Yakobus, sabua'na Puang Alataala anna Puang Yesus Kristus, Dehatanta. Salama'kua' mating.

Kapampetahpa'ang yaling di pesändä'

² Ingkämmua' solasohongku, ke nalambi'koa' ma'kahupa-hupa pesändä', pasihapangngi mesa kakehongko'ang käyyäng,

³ aka' ungnginsammia' ungngoatee yatoo mendahi pesändä' pano di kapampetahpa'ammua' anna malai umpakende' kamatohoang inaha yaling di kalaemua'.

⁴ Pamatoto' loloi yato kamatohoang inaha yaling di kalaemu lambi' keboa mapia, anna malai umpasundung anna umpamatoto' kapampetahpa'ammua' lambi' dang aha la ungkakuhangngia'.

⁵ Ponna aha tau yaling di alla'-alla'mua' ang dai nainsang aka ang la nababe ungngoloi pesändä', ya' la umpalau kakeaka'ang dai' di olona Puang Alataala, ang si mebea sibaha kamarota'ang sitonda unnä' inahanna, anna nabeai yato ang napalau.

⁶ Ampo' mampetahpa' liu menge napalau, dai la bata-bata inahanna, aka' tau ang bata-bata inahanna sihapanne' bombang ang nabuhhu' lusau lutama pepahi.

^7-8 Aka' yato tau ang ma'derua inaha anna dai tontong pembabena dai la napemitai la untahimbo aka-aka yaho mai di Dehata.

Kapemase-maseang anna katomakakaang

⁹ Ingkämmua', solasohongku ang memase-mase, sipäto'koa' la masannang lolo aka' napaohko'mokoa' Puang Alataala yaho di ongeang matande.

^10-11 Anna dioa' dio to makaka, la kahsi tumokoa'. Noakoa' dio bunga-bunga la malahso tomande', aka' ponna mapana'mi allo, la ullahso lohpo lambi' dondongngi bunganna, ya' pa'da tubunne' kamalekeanna. Noa tuntone' pano di to makaka lella'ke' umpakende' katomakakaanna, pihsananna pa'da asang tomande'. Dahi pano di dioa' to makaka, la kahsimokoa' aka' dipamahempo'mingkoa' inahammu.

Kamatohoang yaling di pesändä'

¹² Kahsine' tau ang matoho ungngoloi pesändä', aka' ke patalong yaling yato di pesändä', ya' la untahimbong tanda kapataloang, dianto katuhoang ang lambi' sapano-panona, ang puha nadandi Puang Alataala pano di tau ang mangkalemui.

¹³ Ke ahai tau nahoa pesändä' dai mala la naoatee, ”Nasändä'iä' Puang Alataala.” Aka' Puang Alataala dai mala nasändä'i kakarakeang, anna datoi aha la sule yaho mai pesändä' pano di hupatau.

¹⁴ Ampo' simesa-mesa tau nasändä'i toboe' pampemalanna ang karake ang manse'de' umbabe kakarakeang.

¹⁵ Ya' ponna patalong yato pampemalanna ang karake, ungkeboaming dosa. Pihsananna tuhtuang matamang yato dosa ungkeboaming kamateang.

¹⁶ Ingkämmua' solasohongku ang kukalemui, daungngakuia' nabulitu' pihki' ang naoatee: yato pesändä' yaho mai di Puang Alataala.

¹⁷ Aka' ingkänna pebea ang mapia anna sundung sule yaho mai di Puang Alataala ang umpaaha kamabayaang yaho di langi'. Dianto ang tontong lolo, dai noa kalihayo ang tirende leleng.

¹⁸ Aka' pa'elo'na lambi' naängkä'ingkea' mendahi änä'-änä'na ungngolai yato bahtakara katahpa'ang, lambi' malaingkea' mendahi tau ang handang napakäyyäng yaling di alla'-alla'na pampadahinna.

Menna-menna bansa' unghingngi Bahtakara Dehata anna napembabeing la ullambi' behe

¹⁹ Ingkämmua' solasohongku ang kukalemui, pengkakalehai manahpaia' ungngoate pano di simesa-mesa tau pahallu si'da-si'da tau bansa' ma'pehingngi, la undakai tula'na anna datoi la maromi' keaha'.

²⁰ Aka' yato tau ang si keaha', ya' dai si maroho pembabena situhu' pa'elo'na Puang Alataala.

²¹ Dianto anna pahallui ditibe ingkänna kakarakeang, yato ang mai'di liu yaling di kalaeta. Anna tatahimboi sibaha inaha malunä' Bahtakara Dehata ang napatitanang yaling di inahanta, aka' dianto ang ma'kuasa umpasalama'ingkea'.

²² Anna pahallukoa' bansa' umpembabeing aka ang tiuki' yaling di Suha' Masero, dai bansa' supu ma'pehingngi. Aka' ke bansa'koa' supu ma'pehingngi, umpasalanduangkoa' kalaemu.

²³ Pano di tau ang bansa' supu umpehingngii Bahtakara Dehata ampo' dai napembabeing, dipasihapang tau ang ungkalimpängngi lindona puhanna modahammeng.

²⁴ Puhai umpahandang kalaena, le'ba'mi. Ya' nakalimpängngi siarang umba noa hupanna.

²⁵ Ampo' menna-menna bansa' umpellaya'i manahpa atohang ang setonganna, bahtu' ang dioatee Kaheba Mapia, anna dai nakalimpängngi yato ang puha napehingngii ampo' napembabe loloing, ya' la nabehe Puang Alataala yaling di ingkänna pembabena. Atohang yatoo dai aha kakuhanganna anna ma'kuasa ullahpa' hupatau yaling mai di kakuasaanna dosa.

²⁶ Ponna aha tau unsangai kalaena mesa tau ang tuhu'-tuhu'ang yaling di peada'ang, ampo' dai undakai tula'na, tau yatoo umpasalanduang kalaena, aka' labu' yato lupunna tama di kapeada'ang.

²⁷ Ponna ke ungkalemuiingke änä' biung sibaha balu bahine yaling di kamasuhsaanna, anna undakaiingkea' kalaeta andana nakärähko'ingkea' lino, dianto kapeada'ang ang masero anna dai aha kakuhanganna di hao di olona Puang Alataala Ambeta.