Iburu 1 - Ebe-No-Pfuasẹ Ishobọ Onogbọ

Ungmemhi oyi Ẹshinẹgba ni o rọte obọ oyi Omiọli bhale

¹ Agbọ-nẹdẹ, ebubu ẹghẹghẹ ali odẹ ọdọda Ẹshinẹgba ọ te ri emekẹguele nu ititawa ngme.

² Ama omiọli ni ọ zẹ ni ọ le ugu emhikpa ọ ke rọ nu awa ngme ogbẹlẹ ikpukhokho ni awa la memena. Obọ oyọli ọ gbo rọte ma agbọ

³ Lọli ọ ri ufumhi oyi Ẹshinẹgba khasẹ. Eri ọ gbo li abi Ẹshinẹgba ọ li tee. Lọli ọ ri ungmemhi ni o tsua ekpabọ oyọli mu agbọ nya mhọli. Abi ọ rọ khuẹsẹ awa olamhẹ-a sẹ, ọ shitọ ukiẹkiẹ obita na Eghiele oyi Ẹshinẹgba ni ọ mhọli ekpabọ ni o funẹ nya.

Ufumhi oyi Omi Ẹshinẹgba

⁴ A ri ọni omiọli fu dọsẹ igẹni abi eva ni Ẹshinẹgba ọ rọ na li o li fu dọsẹ oyẹwẹ.

⁵ Agẹni ọnọghuo Ẹshinẹgba ọ tigbe liẹ ọli, “Omimhẹ u khi amo mhi te khi Itẹ?” Ali ọnọghuo o gbolo ọli; “Mhi ya khi Ita ẹ, yẹyẹ u khi Omimhẹ?”

⁶ Ama abi Ẹshinẹgba ọ rọ ya ghie Omiọli ọghuo kpe je elemhi agbọ, ọọ, “Igẹni eyi Ẹshinẹgba nya e mema nyẹsẹ ukhomhi ga li.”

⁷ Abi ọ rọ ọ ngme ingme oyi igẹni, ọọ, “Ọ ma igẹni eyọli abi akpekpeli, ọ ma eni ẹẹ ga eyọli abi ẹlẹmhi erẹ.”

⁸ Ama abi Ẹshinẹgba ọ rọ ọ ngme ingme oyi Omiọli, ọọ, “Ẹshinẹgba u khi! Omhẹsẹ oyẹ, agbọagbọ o ya la ọ. Ipfuasẹ ali igẹsikia u rọ ya ke mhẹsẹ na ẹgbọ eyẹ.

⁹ Ipfuasẹ u nono, ingmobe ọa ghọle ẹ, irarighọ Ẹshinẹgba u khi! Ẹshinẹgba ọyẹ, ọ she rẹ fu dọsẹ etu-ẹ, itobọ khi ọ ri oili oghẹlẹ to ẹ ukhomhi.”

¹⁰ Ọ gbolo liẹ, “Yẹyẹ Ọnọmhuẹ, rọte igbaekẹle, u te ma agbọ. Abọ eyẹ u rọ ma ukhuli.

¹¹ Wẹwẹ nya e ya pfua, ama yẹyẹ u kiele ẹ la ọ. E ya taa abi itsua ni a sọ.

¹² U khili wẹ abi ide, e ya ọghiẹ abi a liẹ ọghiẹ itsua ni a sọ. Ama abi u li u kiele ẹ li, agbọ oyẹ ọa tigbe ya mhọli ukpẹsẹ.”

¹³ Agẹni ọnọghuo Ẹshinẹgba ọ tigbe liẹ ọli, “Shitọ mhẹ ukiẹkiẹ obita omhẹsẹ, ramhi ni mhi rọ ya ri ebe ẹ mele ukpẹkhomi akphawẹ-nga oyẹ-a?”

¹⁴ Ọa khi iyẹmhẹ eni ẹẹ ga Ẹshinẹgba igẹni nya e khi, ni Ẹshinẹgba ọọ ghie e ke ga eni e ya le ugu imiepfuese?