Filemón 1 - A Txꞌan Biblia Yin Kꞌanjobal 1989

Is yichbanil carta Pablo

¹ Ayin Pablo in ti', preso wayji yujc'al chi wak' nabal Cristo Jesús. Ajun juẍtak Timoteo wetok, cax chi jaontok co carta ti' ayach Filemón. Camc'ulnebil ach juj, yujtol jet mulnajwomal co ba yin mulnajil Dios.

² Chi wal c'apaxtok bay eb creyente chi wajbaj ba bay atut, yetok bay janab Apia, c'al bay juẍtak Arquipo, yujtol chi yak' yip yin yet Dios jetok.

³ Yak'okabc'al co Mam Dios c'al Jajawil Jesucristo is watx'c'ulal c'al is junc'ulal ayex bay tu'.

Is camc'ulal Filemón

⁴ Caw wal chi wal yuj diosalil bay Dios oj, yet chin txajli,

⁵ yujtol chi wab a k'umal cayti', tol caw wal ayoc Cham Jajawil Jesucristo yin a c'ul. Ay ab a camc'ulal yin, c'al yin masanil eb yuninalxa Dios.

⁶ Ay eb chi yaoc c'ul yin Cristo oj, yujtol chi yil eb tol ayoc yin a c'ul. Lanan in k'anon bay Dios yuj eb, yet watx' chi nachaj el yuj eb, tol a Cristo Jesús chi ak'on masanil tzet watx' ayon.

⁷ Caw wal chin tzaloj oj, yujtol ay ab a camc'ulal bay tu'. Caw wal chi wi' in mimanc'ulal oj cayti', yujtol ach ti' wuẍtak, caw wal chak' tzalojbok c'ul eb creyente bay tu'.

A tzet max k'an Pablo yuj Onésimo

⁸ Ayin ti', chekbej in Cristo. Yuj tu', ay walon wet ach wak'on pural yin tzet yowalil chonej.

⁹ Palta c'am chach wak' pural. A ti wet tol chin k'an favor ayach, yet watx' chi txecloj el a camc'ulal. Ayin Pablo in ti', icham winak inxa. Preso pax wayji tinani' yujc'al chi wak' nabal Cristo Jesús.

¹⁰ Chin k'an favor ayach yuj Onésimo,*fn* nak axca tol max oc in c'ajolok, yujtol max cha' nak Cristo wuj yul preso ti'.

¹¹ A yet yalantok, c'am jabok yopiso nak ach yak'on serbil. Axa tinani xin, caw wal chi oc yopiso nak oj, cax chi oc yopiso nak wuj.

¹² Yuj tu', ti chin chek pax nak ayach. Matawal cha cha' apnok nak. Axcaok tol ayin chin apni, caytu' chot a chaon apnok nak.

¹³ Manak in, chi wochej chi ayji ec' nak wetok cayti' yuj in yak'on serbil. Axcaok tol ach chin ul ak' serbil yul preso ti'. Ilab tol preso wayji, yujc'al chi walil k'anejal yet colbanilej.

¹⁴ Palta c'am chi yal in c'ul chi babji wak'on trato yetok nak, masantac'al chi wab ayach. Yujtol chi wochej tol yin wal a c'ul chi eli, cax chak'on favor ayin yetok nak, cax man yinok ak'bil pural chach wutej.

¹⁵ Yel toni, max el nak entak jun tiempoal; palta yamita caytu' chi yunej, yet watx' chi ayjixac'al ec' nak etok junelnej.

¹⁶ Manxa mosejalok chi yun yayji ec' nak entak tinani'. Mimanxa yelapnok nak yul a sat. Ilab juẍtakxa nak, caw camc'ulnebil nak wuj. Yelokab cha camc'ulnej nak yet ok apnok nak ayach. Man asannejok yujtol jet animail nak, xan ok a camc'ulnej, palta yujtol juẍtakxa co ba yetok nak yin Cham Jajawil.

¹⁷ Ta caw jetbi co ba cha na', cha apnok nak entak junelxa. Axcaok tol ayin chin a cha' apnok entak, caytu' chot a chaon apnok nak.

¹⁸ Ta ay junok mul nak max oc ayach, ma jec nak max oc xin, tz'ibejcantok wiban.

¹⁹ Ayin caw Pablo in ti' ok wak' pax jec nak tu' ayach. Yuj tu' xan tix in bi chin tz'ibejtok ayach ti'. Ojtakxa tol axca tol ay c'apax a jec ayin, yujtol ayin max wal abej, xan max a cha' Cristo.

²⁰ Yuj tu' wuẍtak, tutun creyente achxa, xan ak' wal jun favor ti' ayin. Yujokab Cristo xan chak' tzalojbok in c'ul.

²¹ Chi waltok juntzan ti' ayach, yujtol wojtak tol yikemc'al chot a ba. Wojtak tol man asannejok tzet chi waltok ayach ok ekej oneni, palta ok ec' yiban eken onen juntzanokxa tzet yetal.

²² Chi wal c'apaxtok ayach, tol cha say jabok bay chi wak' in posada bay tu'. Ta ok el yin c'ul Dios ok in tok ayex tu', axcata' che yut e k'anon yin txajil.

Max toj is cawil c'ul Filemón

²³ Chi yatok juẍtak Epafras cawil a c'ul. Ay c'apax oc preso wetok, yujc'al tol chi jak' nabal Cristo Jesús.

²⁴ Chi ya c'apaxtok eb wet mulnajwomal cawil a c'ul, a ton Marcos, Aristarco, Demas, c'al Lucas.

²⁵ Yak'okabc'al Cham Jajawil Jesucristo is watx'c'ulal ayex bay tu'.