Ipilu 13 - Ata New Testament

Nenge tasexelanenge ngato'o

¹ Ioxe, ngingi tavivingesi ane, laso ngaxolu ngasexelangenge ulai axonesi.

² Xe loxo taasila ixali la kalakalangenge uasi so ngavu'u­line'i. Aitengasinge ukisi noxi'a xo se'i mivu'uline'i taasila la mika­lavoi lexe tamitemamo, la uasi, ane'i ta'angelo ane.

³ Xe tange­ngixa'a tavivinge ikalavusu a loxo ngingi menge ngaxolu ngakalavusu ne. Xe ane'i ane taxilili ilosi'a tu'umaxu la tangengixa'a a loxo ngingi ngatavulenu tu'umaxu no vasimenge kalumo.

⁴ Xe no anu ngiou no anu taula'i la ngataxanu laixe mo ngailanu mi nuni'u no anu uasisi. Xo tamitema so ilixo nuni'u mo ane'i ane so ixola'u taula'i la Mosinge utilo­vosi'a mo ukoline'i.

⁵ Nga'umengengi so ngaxolu lala­vulusi no anu isuisu so lamoli. Mi ma'ia ngeno'u mukalu la opo­ngengi u'osasou xo Mosinge molu muvi­kala lexe, “Eni axiunu tumali­loinge uasi mo apilixingengi so ngaxolu ta'oloxola uasi.”

⁶ Laso nenge ta'ume xo ma'ia, tavikala aloxo 'o, “Tatananenge anu mosou su'ulisilo laso eni a'ume uasi. Xo tamitema i'oxonu mi ma'ia noxilo?”

Nenge tamaila so tamulinu Iesua uasi

⁷ Mo aloxo 'o. Ngaxavutalane'i ane'i ane mi'uli laxungengi ne, ane'i milanu vaikalaou Mosinge noxinge. Xe ngaxavutalanu xolu­xoluxa'a xo muxalixu nene'axu lailaixe. Laso ngaunexa'a no anu lopala noxi'a.

⁸ Ilixo noxou Iesua Kalaisiti anu iou vilesisi tatei xe vaimomo 'o, la anu uxolu axonesi kaluxusou uasi.

⁹ Laso loxo ngalomusou votovoto iouiou alavua la ngapilixingengi so ulapungengi mamu. Anu laixe so oponenge utuluou iaiamasi xo anusi u'oxonu pakia'inge. Xo ane'i se'i la i'au'au no anu vaivaikalasou la'ilali ia ixalisou su'uli no anu lavuloto axone uasi.

¹⁰ Ioxe, noxinge 'o la tanixu lapesou susu noxinge a uxolu. Ia ane'i ane ixaxai no anu tasou Mosinge so lialia 'osio, la vote'i so ino'u temanu tanixu noxinge ne uasi.

¹¹ Xo loxo pilisiti tatila u'oxonu ilixo so usu'asou susu la u'unalaixu sialuxu misoposi no anu ngiou noxou Mosinge u'isalili. Ia loxo vasimolu misoposi ne la ilavusou i'elaxu noale no anu kemu noxi'a Ta'isilaeli.

¹² Xe noxou Iesua la mupilixinu vasimolu so sialuxu ula mo so uxalixa'a tamitema malemalenga. Mutavu­lenu navunavu axone, la noale no anu aitengaxu taoni kalumo.

¹³ Laso ane, nenge masi loxo talai noale no anu kemu kalumo so tapita no anu maila e mutavulenu ne.

¹⁴ Xo nenge taoni vile no lialia so uxolu avile uasi. Nenge oponenge u'oxoxu taoni ane taxalisou ili'i.

¹⁵ Laso utotomu no anu ualasou Iesua la ta'itinu Mosinge ualasou. Xo loxo tavikala laixesou Mosinge no anu ananenge axone la tapilixinu mi vile noxou ane u'osasou.

¹⁶ Mo kalakala­ngenge so nga'oxonu alauna uasi. Xe loxo tamitema isoti no anu mi vile la ngasu'uline'i. Laixe so nga'oxo axone xo ngingi a ngapilixinu mi vilela noxou Mosinge e u'osasou ane.

Talomuxa'a ane'i ane so isaxila'inge

¹⁷ Ngalu'engengi noxi'a tatiatila­menge ne mo ngalomuxa'a xo ane'i so i'oxo latolosou xoluxolu so ulengengi. Mo xaixai noxi'a ne ia'aloxu noxou Mosinge ili'i so utilovosou. Laso ngalomuxa'a mo so i'osasou xaxai no taingengi ne. Ngalosi'a tu'umaxu no anu uasi xo loxo 'o io ngaxalisou su'uli laixe uasi.

¹⁸ Xe loxo nexi 'o, ngapilixinexi noxou Mosinge. Xo nexi talavu lexe tanexi uai laixe no iou, ia oponexi ututulu lexe mimi mukalusi ta'oxonu, la no anu vote'i laixesi.

¹⁹ Mo atama noxinge lexe xavingengi no anu linga so u'oxonu vote'i so eni apalea axali noxinge.

²⁰ Eni apilixingengi noxou Mosinge e mosou xoluxolu lala­vulusi. Anu mutulusou Iesua anu Tatananenge no anu soli. Iesua ne anu mupilixinu sialuxu so ulotone'i tasipisipiou mo usosovosou konita­laki ane kaluxusou uasi. Mutulu­sou laso Iesua muxali Itema Tila so usaxila'a tasipisipiou ne.

²¹ Apili­xingengi noxou Mosinge xo anu a ulosinge mimi lailaixe so xoluxolu noxinge u'isalili no anu masaxa noxou. Xe mi ma'ia laixe no iou la anu upolonu noxou Iesua Kalaisiti so u'avutinoxu noxinge. Laso avikalangengi manina aloxo 'o, nenge ta'itinu ualasou Kalaisiti ulai ulai kaluxu uasi.

Vaikala kaluxusou

²² Ioxe, atama noxinge lexe ngalomuxu pelototo no anu lapasi ekaukavunu 'o xo alapunu veveni malaxo uasi.

²³ Mo amasaxau so ngalavu lexe ane'i mipilixinu vivinge Timoti mula no anu lakalavusu. Loxo anu upalea uxali noxilo la noxou talai noxinge ne.

²⁴ Ngalemolu aso noxixe noxi'a tatiatila noxinge mo noxi'a tami­temaou Mosinge u'isalili mukalusi. Ane'i tamitema so Itali 'o ivikala aso noxinge kalumo.

²⁵ Iaiama noxou Mosinge a uxolu noxinge ne. Anu anesi.