Taitu 1 - Uzuwakpani u Savu n Cishingini; n aba'in a na a Zagbai a Uzukpani u Kuku

Kuɓa̱yuwa̱

¹ Mpa ɗa Bulusu. Mpa kagbashi ka̱ Ka̱shile kaꞋa, mpa kpamu vuzavusuki ɗa vi Yesu Kirisiti Kishi. Ka̱shile ka̱ suku mu ta̱ n tuka̱ n kuneke ku ka̱ɗu wa aza a na u zagbai. Ɗa kpamu u suki mu n yotsongusu le e yeve ili i mayun i na i kuyotsongu le uteku u na o kuyongo, ka̱ta̱ Ka̱shile ka pana uyoꞋo u le.

² Ili i mayun i nam pa i neke le ta̱ a̱ɗu a̱ ida̱shi a wuma u babu uteku, u na Ka̱shile ka yaꞋankai le uzuwakpani kafu kugita̱ ka aduniyan. Ka̱shile ta na ka ci yaꞋan aꞋuwa ba.

³ Gogo na ana ayin a shanai, ɗa wu uta̱ka̱i Arabali a Singai a nam pa e keteshe, ɗa a̱tsu ci a kusala a ɗa u yaba dem. N kadanshi ka̱ Ka̱shile Kishi ka̱ tsu, ɗaɗa u zuwai mu n yaꞋanka yi ulinga u nam pa.

⁴ Taitu, mi ta̱ a kuɗanaka wu katagarda ka nam pa. Avu maku ma mayun maꞋa a̱ ubuta̱ wu uneki u ka̱ɗu u tsu. Ka̱sa̱kpa̱ Ka̱shile Esheku a̱ tsu n Yesu Kirisiti Kishi, e neke wu kasingai† m ma̱ta̱na̱.

Ulinga u Taitu a Karita

⁵ N ka̱sa̱kpa̱ wu ta̱ o kotogu ka Karita adama a na vu kotso ulinga u na ci yaꞋin ɗe, ka̱ta̱ vu zagba nkoshi m gba̱ra̱-gba̱ra̱† ma̱ A̱Ꞌisa̱ a aza o Kutoni a̱ likuci dem uteku u na n danai nu vi yaꞋan.

⁶ Mokoshi ma̱ gba̱ra̱ u yotso ta̱ wo okpo babu ili i na a kushikaka yi, adama a na u yongo ta̱ ɗe mayin. U yaꞋan vuza vu vuka vi te, ka̱ta̱ kpamu u shamgba n vuka vi ni endeꞋen. Muku n ni feu, n yaꞋan aza o Kutoni a na a iwain ili i kavama, ɗa i a kuyongo n wuma u singai ɗa i kpamu babu ugbawansuvu.

⁷ Mokoshi ma̱ gba̱ra̱ a̱yi ɗa vuza vi kelime vu ulinga u Ka̱shile. U yaꞋan babu ili i na a kushikaka yi adama a nannai ka̱ta̱ u yaꞋan vuza va̱ a̱ra̱ɗi ba, ka̱ta̱ kpamu u yaꞋan vuza vu wupa gogoꞋo ba. U yaꞋan kosoꞋi ka̱ ma̱ra̱ ka̱u ba. U yaꞋan vuza vu vishili ba, ka̱ta̱ kpamu u yaꞋan vuza vu ucigi vi ikebe ka̱u ba.

⁸ Wo okpo vuza na u kuciga omoci a kpaꞋa ku ni, ka̱ta̱ u ciga kakuna ka singai ayin dem. U yongo n ugboji, ka̱ta̱ u yaꞋan ili derere. U yaꞋan kpamu n wuma u ciɗa u na Ka̱shile ka cigai, ka̱ta̱ u fuɗa kadana ka̱ci ka̱ ni mayin.

⁹ U ka̱na̱ n utsura kuyotsongusu ku mayun ku kadanshi ka̱ Ka̱shile. Ka̱ta̱ u yaꞋan ulinga n kuyotsongusu ku singai ku nam pa, u yaꞋanka uma kadanshi ko odoki, ka̱ta̱ u ɓarangu aza a na i a̱ vishili n kadanshi ka̱ Ka̱shile.

¹⁰ U yaꞋan nannai, adama a na uma i ta̱ lo n a̱bunda̱i a na o goyoi kuyotsongusu ku mayun. Uma a nam pa a ci yaꞋan ta̱ kadanshi ka kavama ayin tutu n a̱ ya̱nsa̱i uma. A̱ ka̱tsuma̱ ka nlum n nam pa, aza a̱ a̱bunda̱i e le a tsu kpakalaka ta̱ kudana uma ra̱ka̱ a kiɗa avaja. Uma a nam pa a laꞋa ta̱ aza a na a buwai n kawasasa.

¹¹ U yotso ta̱ vu sa̱nka̱ le kuyaꞋan kadanshi. A zuwa ta̱ ɗe iꞋuwa i uma i ka̱sa̱kpa̱ uye u mayun n kuyotsongusu ka aꞋuwa ku le. A ci yaꞋan ta̱ nannai adama a na a yaꞋan ikebe n uye u gbani-gbani.

¹² Vuma vi yoku, keneki kaꞋa o kotogu ka Karita u yaꞋan ta̱ kadanshi ka uma a nam pa, u danai, “Uma a Karita ra̱ka̱ aza a aꞋuwa a ɗa. Nnama m gbani-gbani n ɗa, a ciga ulinga ba, sai kulyaꞋa n a̱bunda̱i.”

¹³ Na va mayun ɗa. Vu ɓarangusu le n utsura, adama a na vu zuwa le o okpo aza a utsura a̱ ubuta̱ wu uneki u ka̱ɗu u le.

¹⁴ Ka̱ta̱ kpamu a̱ ka̱sa̱kpa̱ kupana iteꞋe ya Ayahuda, ka̱ta̱ kpamu a̱ ka̱sa̱kpa̱ kutono wila̱ u uma a na a̱ shirikpa̱i kadanshi ka mayun kucina̱.

¹⁵ Ili dem yi ta̱ ciɗa a̱ ubuta̱ u uma a na a̱ɗu e le i ciɗa. Amma ili i ciɗa yi lo a̱ ubuta̱ u uma a na a̱ la̱nga̱sa̱i ka̱ci ke le, ɗa i babu uneki u ka̱ɗu ba, adama a na a̱ɗu e le n kusheshe ku le kpamu i ta̱ n a̱shinda̱.

¹⁶ Uma a nan lo a ci ɗika ta̱ an e yevei Ka̱shile, amma o goyo yi ta̱ adama a uteku u na i o kuyongo. A tsu pana ba, una̱mgbi u le u tsu sa̱nka̱ le ta̱ kuyaꞋan ili i singai. Yaba dem u tsu goyo le ta̱.