Azusuki 1 - Uzuwakpani u Savu n Cishingini; n aba'in a na a Zagbai a Uzukpani u Kuku

Yesu u yaꞋin ayin amangere

¹ Tiyofilo, ana n ɗanakai nu a katagarda ka cau, n ɗana ta̱ ra̱ka̱ ili i na Yesu u gita̱i kuyaꞋan n kuyotsongusu,

² ali a kanna ka na a ɗikai ni a kubana gaɗi. Kafu a ɗika yi, u ka̱na̱i kuneke azusuki† a na u zagbai kadanshi ka̱ ni n utsura wa Ayinviki a̱ Ka̱shile.

³ Ana u kuwa̱i ɗa u ɗenga̱i, ɗaɗa u yotsongi ka̱ci ka̱ ni we le a̱ ubuta̱ kakau, u yaꞋan ta̱ ili kakau n a̱bunda̱i i na i kudana wi ta̱ n wuma. U yongoi n ele ayin amangere, ɗa u yaꞋin kadanshi ko tsugono tsu Ka̱shile.

⁴ Ana wi a kulyaꞋa n ele, ɗa u nekei le kadanshi ku utsura, u danai, “Vanai na a Urishelima† sai ayin a na Esheku a̱ va̱ a̱ suki ili i na u yaꞋin kadanshi. Ciɓai, n dana ɗa̱ ta̱ ili i nam pa n ayin a ɗe.

⁵ Yahaya u yaꞋanka ta̱ uma kusumbu ka akucina m mini, amma n ayin kenu a na a̱ kuta̱wa̱, i ta̱ a kuyaꞋanka ɗa̱ kusumbu ka akucina n Ayinviki a̱ Ka̱shile.”

Yesu u bonoi a̱ Ka̱shile

⁶ Ana azusuki a gasai n Yesu,† ɗa a̱ ka̱na̱i kece yi, “Vuzagbayin, gogo na ɗa vo kubonoko aza a Israila n tsugono ci le kpamu?”

⁷ Ɗa u danai le, “U gaꞋan i yeve kanna ko ayin a nan lo a na ili i kuyaꞋan ba. Sai Ka̱shile endeꞋen ɗa ki n utsura u kuyeve ili i nan lo.

⁸ Amma Ayinviki a̱ Ka̱shile† i ta̱ a̱ kuta̱wa̱ wa̱ ɗa̱, ka̱ta̱ e neke ɗa̱ utsura. Ka̱ta̱ i dana yaba dem ukuna u va̱ a Urishelima n Yahuda. Yi ta̱ a kudana uma a Samariya n aduniyan dem.”

⁹ A ayin a na u kotsoi kadanshi ka nan lo, u geshe ba, ɗa a ɗikai ni a kubana gaɗi ele ta na a kinda, ali ɗa eleshu a palai ni, o doku e ene yi ba.

¹⁰ Mukumitoni n ni n shamgbai lo a kinda gaɗi, ɗa ta na uma e re a yawai lo ɗevu n ele nu ntogu ma̱ a̱ri.

¹¹ Ɗaɗa uma a a danai le, “A̱ɗa̱ uma a̱ Ga̱lili, yi ɗa̱i i zuwai ɗa i shamgbai na a kinda gaɗi? Yesu vu na i yevei a ɗikai a kubana gaɗi va, ta kpamu u kubono nannai tsu na u lazai.”

Vuza na u ɗikai ulinga u Yahuza

¹² Azusuki a, ele ɗe a Kusan ku Zaitun ana ili i nan lo i yaꞋin, ɗa a lazai o bonoi a Urishelima a̱ ubuta̱ u na wi nu nwalu kenu, ali adambu ka̱kpa̱n ke te (1,000)

¹³ Ana a uwai a̱ likuci ya, ɗa a kumbai a̱ kunu ku zuva, a̱ ubuta̱ u na i ida̱shi. Uma a na i ɗe, ele ɗa Biturusu, n Yahaya, n Yakubu, koɓolo n Andarawu, n Filibu, n Toma, ta ɗe feu Batalamawu, m Matiyu, n Yakubu maku ma Alfa i, aza a na i ɗe feu koɓolo ele ɗa Sima vuza na e ci ɗeke Ziloti, n Yahuza maku ma Yakubu.

¹⁴ Uma a nam pa a tsu gasa ta̱ ayin tutu, adama a na a yaꞋansa kavasa koɓolo. Aza o yoku a na i ɗe koɓolo n ele, a̱ma̱ci a ɗa, koɓolo n amgbu e Yesu m Meri† a̱na̱ku e le.

¹⁵ Ana a yaꞋin ayin e re, ɗa aza a uneki wa̱ a̱ɗu a yaꞋin oɓolo, ra̱ka̱ vi le i ta̱ ɗevu n uma amangatawun n kamanga (120). Ɗa Biturusu u ɗenga̱i a̱ ka̱tsuma̱ ke le ɗa u yaꞋin kadanshi.

¹⁶ U danai, “Aza a̱ va̱, kadanshi ka̱ Ka̱shile sai ka shana, ka na Ayinviki a̱ Ka̱shile a danai n ayin n a̱bunda̱i a na a lazai ɗe a̱ una̱ u Dawuda, adama a Yahuza vuza na u zuwai e remei Yesu.

¹⁷ Yahuza vu nam pa va, vuza tsu ɗa wi ishi, vuza na a zagbai u yaꞋan ulinga n a̱tsu.”

¹⁸ (Yahuza u ɗikai ikebe i na u ciya̱i adama a kawuya ka̱ ni, ɗaɗa u tsulai ubuta̱. Ta ɗe ubuta̱ u na ta na u yikpa̱i, ɗa u kuwa̱i ali ɗa ka̱tsuma̱ ka̱ ni ko ɓosoi sai ta na ciꞋin kulolo.

¹⁹ Yaba dem u panai ukuna u nan lo, ɗa ta na e ɗekei ubuta̱ u na Yahuza u tsulai va n kula ku kelentsu ke le, “Akaladama,” ɗaɗa Ubuta̱ wu Mpasa.)

²⁰ Biturusu u lyaꞋi kelime n kadanshi, “Wi ta̱ uɗani a Katagarda ki Ishipa, ‘YaꞋan kpaꞋa ku ni kokpo lekeɗi; babu vuza na u kuyongo punu.’ Wi ta̱ uɗani kpamu, ‘YaꞋan vuza yoku u ɗika ulinga u ni.’

²¹ “U gaꞋan ta̱ a zagba vuza yoku vu na u kubono una̱ u Yahuza. U gaꞋan ta̱ vuza nan lo u saꞋwa ta̱ kuyongo n a̱tsu.

²² U yeve kpamu ukuna u Yesu gbende a̱ kugita̱ ayin a na Yahaya u yaꞋankai Yesu kusumbu ka akucina, ali a kubana a kanna ka na a ɗikai Yesu wa̱ tsu a kubana gaɗi. Mayun ɗa a̱ ka̱tsuma̱ ke le vuza te vu na a zagbai u ɓolongu n a̱tsu ka̱ta̱ u fuɗa u dana ukuna u Yesu adama a uɗengi u ni a kasaun.”

²³ Ɗaɗa a yaꞋin kadanshi ka kuzagba uma e re, ele ɗa ta na Isuhu† Barasaba vu na e ci ɗeke Yusutu, m Mataya.

²⁴ Ɗa a yaꞋin kavasa adama a na a zagba vuza singai a danai, “Vuzavaguɗu, vi yeve ta̱ a̱ɗu a̱ tsu ra̱ka̱. Yotsongu tsu a̱ ka̱tsuma̱ ka aza e re a nam pa vuza na vu zagbai.

²⁵ Adama a na u shatangu ulinga u Yahuza, vuza na u ka̱sa̱kpa̱i tsu, ɗa u banai a̱ ubuta̱ u na u gaꞋin u bana.”

²⁶ Ɗaɗa a yaꞋin kazagba, kazagba ka ta na ka̱ yikpa̱i u Mataya, ɗa u doki le a̱ ka̱tsuma̱ ka azusuki kupa n vuza te.