Jueces 1 - Arabela

Supuetana Judaacuajinio caneno pueya miaquejosacari na paraa

⁸ Jiyacaritij, supuetana Judaacuajinio caneno pueyari na paraa Jerusaleen tiaca tiuquitiaquiaari na miaquejosocoriquiano. Tii quijiaca taucuaca miaquejotuquiaari na nijiniaquetucuaja mueruuta puetunujuanaari. Na nuhuaji, cuno tiaca catijiatatuquiaariiri.

⁹ Naa na miitiuniu nuhuajitij, nojoriiri Cananeo jiyanishano taucuaca miaquejoquiaari tii na tuhuananuhuacua quijiacani, Neegueb jiyanishano jiyajiniajuhuaj, cariiquia jiya jamatujiniano.

¹⁰ Socua pacutetuquiaari miaquejonu Hebroon tiacajinia quijiaca Caneneo jiyanishano taucuacaari. Cuno Hebroon tiacaari coteenu Quiriat-arba sesaraca quijia. Naa shocojotatuquiaari cuno jiuujianaraca Hebroon tiacajinijinio camarucuaari. Nioori nojori sesaca quijia: Sesai, Ahimaan, Talmainio.

Otoniel niquitiosaanu maaji necorano na miaquejonuucua na cama paraa

¹¹ Na nuhuaji, Debir tiacajinia quijiaca na paraa miaquejotuquiaarijaariuhuaj. Cuno Debir tiacaari coteenu Quiriat-seefer sesaraca quijia.

¹² Nojori tiuquitiaaquishacarijia Debir tiaca, nojori paraa tiacani, Calebri jiyacari neyatu Acsa shiiniotaree. Naa sequeree narta Israel pueyari: “Teyano pa maanujinijinioteja pa paraa shocotanutaniya miaquejonu na tiacajinijini, janiyari na niquitionutaniya necorano quiyatu Acsani.”

¹³ Otoniel puerojosano pueya maanuuri nojori paraa shocotaquiaari miaquejonu cuno Debir tiacajiniji. Nio Otonielni, nojuajaari Quenaz niyanu. Quenazri Caleb tarajanu quijia, jiyareta na nuhuajishana. Naacuatej, Calebri neyatu Acsa niquitioree Otoniel.

¹⁴ Acsa jaara Otonielcua tiuquiquiaari, Otonielri shiniujiurii na que na masenura jiya nojori cuhuariquiara na cuariyataja. Acsa tiuquishacari na que Calebcua, na burro nijiniji roseseeri. Na que niquishacari nojuaja, na nequesotareeri: —¿Casaacuateja cucua tiuquishaareeni sanaa?

¹⁵ Neyatuuri na que riucuaree: —Quiaacuajaari tari cua niquitiorucuaa Neegueb cariiquia jiya jamatu. Tii pacaretacojua na samo nacacataja cua niquitiorenoj. Naacuatej, Calebri neyatu niquitioquiaari tuhuananuucua pacaretacojua samo nacaca, na jamatujinia pacaretacojua samo nacacajuhuaj.

Supuetana Judaacuajinio caneno pueya, supuetana Benjamiincuajinio caneno pueya miaquejosacari na paraa

¹⁶ Tariucuacaanu, Moisees niquiocua queecuajinio caneno pueyani, puetunu nojorijianaari na tiacajiniji pacuquiaari. Cuno taucuaca tiaca teje na camaruhua shiriquiquiaaricuajani, naa sesaraca quijiaari: “Queraatia mani quijia tiaca.” Cuno pojoriiri na tiacajiniji quiaquiaari supuetana Judaacuajinio caneno pueyata. Cariiquia Judaa jiya jamatujinia quitiushiiri cuno Judaa pueya jiyajiniaja. Cunoori Arad tiacajiniji pananu muetasamaji muenecaacuara. Cuno pojoriiri Quenita jiyanishano taucuaca quiriquiase. Naacuatej, nojoriiri tii quitiushiiquiaari cuno jiyajinia quijiaca taucuacata.

¹⁷ Jiyacaritij, supuetana Judaacuajinio caneno pueyari tarajanu Simeooncuajinio caneno pueya cojiquiaari na miaquejonura cuno jiyajinia quijiaca nojori paraa Cananeo taucuaca, taa tari nojori pocoojoquiaaricuajani. Naacuatej, nojoriiri Sefat tiacajinia quijia Cananeocuaca miaquejoquiaari puetunujuanaa. Nojoriiri tojetaarucuajanaa niyarequetaquiaari cuno Sefat tiaca. Nojoriiri saniniuujia cuno tiaca sesojoquiaari Hormaa.

¹⁸ Saniniuujia supuetana Judaacuajinio caneno pueyari maja na naata miaquejonu quiquiaari nio tiacacajinia quijiaca nojori paraa: Gaza, Ascaloon, Ecroonnio. Naajuhuaj, majaari nojori naata camaruuniu quiquiaari tiacaca shocua quijia jiyaca.

¹⁹ Pueyasojuanaari supuetana Judaacuajinio caneno pueya cojiquiaari na taanuunura cuno jiyaca tuhuananuhuajiniji tii quijiaca taucuaca. Saniniuujia maja cutaraari nojori naata quiquiaari miaquejonu cuno tuhuananuhua jamatujinia quijia nojori paraa. Cuno jiyajinijinio nojori paraa cutaraari hierrojiniji shipinijiosano caballohua jayotasano rucuanejotajaru jiitiajaca cutara.

²⁰ Moiseescuajaari tari nojori sequequiaari, nojori jaara na paraa miaquejore na tiacajiniji, Caleb cuaara niquitiosaaria Hebroon tiacaraca jiya. Narta pueyari na niquitiotuquiaari. Calebri saniniuujia puereetuuca jiyaconaja jiuujianaraca Anac niquiohua taanuuquiaari nerano tapueyocuaca niquitiotusano jiyajiniji.

²¹ Supuetana Benjamiincuajinio caneno pueya saniniuujia, nojoriiri maja na taanuutunu quiquiaari Jerusaleen tiacajinia quijiaca Jebuseocuaca. Naacuatej, cuno Jebuseocuacaari quiarijia mariyataa quitiuyajaa Jerusaleen tiacajinia supuetana Benjamiincuajinio caneno pueyata.

Supuetana Joseecuajinio caneno pueya miaquejosacari Betel tiacajinia na paraa

^22-23 Naajuhuaj, supuetana Joseecuajinio caneno pueyari Betel tiacajinia quijiaca na paraa tiuquitiaquiaari na miaquejosocoriquiano. Cuno tiacaari nio sesaraca coteenu quijia “Caaniuji cuhuataja.” Cuno tiaca nojori tiuquitiaaquishacarijiyojua, nojorijinijinio manujunaa jiyaramiquitiuquiaari nojoriicuaji coteenuuri. Pueyasoori naa nojori naacujua puetunu nojori miishanojiniajanaa.