FILEMON 1 - SULAT KNINO BENO ALEKOT

¹ Bae Filemon le anmepu nek bua nok kai! Au Nai Paulus, atoni pa'an o'of natuin Yesus Neno Anan ma hit bae Nai Timotius, amtui sulat i neu ko

² ma neu tolas knino le nabua anbi ho ume; me neu hit feto bi Apfia amsa, ma hit bae le anmepu matani nok kit, Nai Arkhipus.

³ Hai mifnekan so Uisneno hit Ama ma Usif Yesus Neno Anan anfe tetus ma halan nekaf neu ko.

Manekat ma palsait Nai Filemon

⁴ Hae-hae au onen toti, au tek ho kanam ma au toti alekot neu Uisneno.

⁵ Fun au nen ulali nak hom nek ale to Uisneno, ma hom palsai neu Usif Yesus.

⁶ Au onen toti, he nati' hit lasi nek bua on atoni apalsait napoitan lasi hine le naek a'nesi neu ale tetus le hit mu'i natuin hit tamesbok tok Neno Anan.

⁷ Au bae Nai Filemon! Ho lasi manekat nane anhalin kau ma anhatani kau! Ale to Uisneno anmalinan natuin ho.

Totis neu Nai Onesimus

⁸ Es nane te, on bae benu le palsait mese, au ube'i uplenat ko he mo'e sa' le mes ho mo'e mani.

⁹ Mes natuin au nek ko, al au toti ko. Au le i atoni mnasi mese ma leku i fe natam kau anbi o'of natuin Neno Anan Yesus.

¹⁰ Au, Nai Paulus, utiaba totis mese neu ko antom Nai Onesimus, au anah antuin Neno Anan.

¹¹ – Afi unun in kan tamaf ota neu ko, mes muni i in tam ota neu ko ma neu kau amsa.

¹² Au sonu in anfani neti neu ko leku i – in, le au nek ma umnau ani.

¹³ Au he utau in anbi i hen seka ko ma an tuthae kau leka au fe bi o'of natuin Beno Alekot na'ko Uisneno.

¹⁴ Mes au ka lomif he mo'e sa' leka ho fe kam lomif, he nati' le alekot nane kais ho mo'e mani onle nok a'seke, mes so nok nek lomif.

¹⁵ Oni natuin lasi nane in mabaitson nok ko neno tuk es, he nati' ho mupeni mufani in talan te nabal-bal.

¹⁶ Muni i in ka on fa ate anteni, mes in nesi na'ko ate. In on bae manekat natuin Neno Anan. In antam ota neu kau nes-nesi neu ko; in tam ota on ate ma on hit bae natuin Usif.

¹⁷ Kalu hom kiso kau on bae knino anbi palsait, amsimo mufani Nai Onesimus onle hom simo kau.

¹⁸ Ma kalu in nalukib ko ai natus sa'neu ko, maut he au sutai.

¹⁹ Leko nesi au tui ani sin anbi i. Au, Nai Paulus, of au baen ufek ale tusa sin – namneo ka nabe'i au umnaub ko ak ho es mutus neu kau, esle' ho aom –

²⁰ Es nane, bae, so hom tuntaku kau natuin Usif: Ma amhalin au nekak on bae manekat natuin Neno Anan!

²¹ Au tui ko sulat i nok afnekan, he nati' ho mo'e mutuin ale sa' le au toti neu ko. Au uhin, of ho mo'e nesin na'ko le au toti.

²² Onane amsa hi miloitan bale neu kau, fun au ufnekan he nati' Uisneno annen hi onen totis, oke te neki kau anfani neu ki.

A'at ma uab amsoput

²³ Nai Epafras, le nok kau anbi o'of natuin Neno Anan Yesus, ansonu uab alekot neu ko.

²⁴ Ma amsimo amsa uab alekot na'ko au bae sin: Nai Markus, Nai Aristarkhus, Nai Demas ma Nai Lukas.

²⁵ So Usif Yesus Neno Anan anfe tetus neu ki. Na'ko, Nai Paulus