MARK 1 - Ao Naga C.L. Bible (BSI)

Yohan Baptitsübai Sayutsüngiba

¹ Tsüngrem Chir Yisu Khrista indang Osangtajung tetenzük.

² Isaia ainkari nung zülua aliba ama: “Ajiang ni kü tenyar ne jakdang yoker, shibai ne lenmang renemtsü.

³ Lisem lima nung kati ayimtena aliba ola. Nenoki Kibuba lenmang renemang; pa lentongbang metong metonga yangluang.”

⁴ Anungji Yohan Baptitsüba lisem lima nungi adoka, temenentem atoktsü asoshi temulung meyipa baptitsü indang sayutsüngia aru.

⁵ Aser Yihuda lima temeket aser Yirusalem nung alir ajak pa dangi ao; aser parnok temenen nangzüka, pai parnok Yordan ayong nung baptitsü.

⁶ Yohani ut-züng sü abena liasü, aser teperem nung shiküp ka agi nai, süngku aser arem ninang mojitzü pai achi.

⁷ Pai sayutsüngia ashi, “Kü dang nungi kanga agi tuluba ka kü sülen arudar, oda nibo mokrema lur pa tsüngsem lisü salatsüa metemsü.

⁸ Ni nenok tzü nung baptitsür, saka paibo nenok Tanela Temeshi nung baptitsütsü.”

Yisu Baptiba

⁹ Item anogo nungji Galil lima Nazaret yim nungi Yisu aru aser Yordan ayong nung Yohani baptitsü.

¹⁰ Pa tzü nungi adokdangji anüng lapoka Tanela posü ama alua pa dak atemba pai angu.

¹¹ Aser anüng nungi ola ka adoka ashi, “Na kü meimba jabaso, ne dak ni temulung achir.”

Yisu Atitangba

¹² Idangyongji Tanelai pa lisem lima leni arioktsü.

¹³ Aser lirnü tashi lisem lima nung Satani pa atitanga; pa arem shiruru den liasü; aser kotak tenyartemi pa anebalu.

Galil Lima nung Sayutsüngi Tenzükba

¹⁴ Tang Yohan pur külen, Tsüngrem Osangtajung sayutsüngia Yisu Galili aru,

¹⁵ aser ashi, “Mapangji tongogo, aser Tsüngrem Yimli ana nung aitogo, temulung meyipang, aser Osangtajung nung amangang.”

Angopur Pezü Ajaba

¹⁶ Galil tzüyim anasa süidang, Simon aser tenu Andria tzüyim nungji zütsük onya pai angu; kechiaser parnok angopurtem liasü.

¹⁷ Yisui parnok dang ashi, “Kü sülen arung aser ni nenok nisung apurtem kümdaktsüdi.”

¹⁸ Idangyongji parnoki pei zütsük toktsür pa sülen anitak.

¹⁹ Tatsüka or külen, Zebedi chir Yakob aser pa tenu Yohan parnok rong nung zütsük atepya pai angu.

²⁰ Idangyongji Yisui parnok aja aser parnoki pei tebu Zebedi rong nungji ayangertem den toktsür pa sülen anitak.

Temenen Tanela Agi Apuba Nisung Ka Anebtsüba

²¹ Parnok Kapernaumi ao; aser idangyongji amungnü Yisui sinagogi ia sayutsü tenzük.

²² Idangji pai sayuba nung parnoki süngmang, kechiaser pai tezülurtem ama masü, saka ain aketba nisung ka ama sayu.

²³ Idangjisa parnok sinagog nungji temenen tanelai apuba nisung ka liasü, aser pai yamai ayimtena ashi,

²⁴ “Onok ne den inyaktsü kechi aka, Nazaret nunger Yisu? Na onok samatsütsü aru asü? Na shiba-ar ni meteta lir, na Tsüngrem meyong Temeshisang.”

²⁵ Yisui pa dang metenokja ashi, “Mokorai liang, pa nungi adokang,”

²⁶ temenen tanela jagi pa ateptendaktsü aser tashi agi asa-a, pa nungi adok.

²⁷ Parnok ajak süngmang nung parnok o parnok na yamai jembitepa ashi, “Ya kechi tesüngmangtsü? Kechi tesayuba tasen ka? Pai temenen tanelatem danga ozüng agütsür, aser parnoki pa dang angar.”

²⁸ Aser idangyongjisa pa nüngsang Galil lima temeket ajaklen sangdonga ao.

Yisui Tashitak Tapu Jenti Anebtsüba

²⁹ Idangji parnoki sinagog toktsü aser Yakob o Yohan den Simon aser Andria kidangi ao.

³⁰ Simon kinungtsü tetsü ramen agi shiranga mejanga liasü, aser idangjisa parnoki la indang Yisu dang ashi.

³¹ Pa arua la teka nung amer atsümeso, idangji ramen jagi la toktsü aser lai parnok nem awazüa agütsü.

³² Iba nikongtsütsü anü lur külen shirangertem aser temenen tanelai apubatem ajak parnoki pa dangi anir aru.

³³ Aser yimti nung alir ajak kikümdang sentep.

³⁴ Tashitak tapu jenti agi shiranger ajak pai anebtsü, aser temenen tanelatem aika pai aridoktsü, aser pai temenen tanelatem nem o mejembidaktsü, kechiaser parnoki pa metet.

Sayutsüngi Aoba

³⁵ Anepdang yakta ano manga alidang, Yisui shishir kimai adoka azüngmeyakdak tesem kati aenshia ao, aser yangji pai sarasadem.

³⁶ Simon aser pa den alirtemi pa bushi.

³⁷ Parnoki pa angu aser ashi, “Ajaki na bushidagi.”

³⁸ Pai parnok dang ashi, “Anasa aliba yimtsüngtem nunga sayutsüngitsüsa asenoki tangalen jagi odi, kechiaser ya asoshi ni aru.”

³⁹ Aser pai parnok sinagog nung sayutsüngia aser temenen tanelatem aridokja, Galil ajak sema senzü.

Zütsüra Aketba Nisung Ka Anebtsüba

⁴⁰ Zütsüra aketba nisung ka pa dangi arua apudaka pa dang mepishia ashi, “Nai mulungra, nai ni merüktettsütsü akok.”

⁴¹ Pai aochia bilema pei teka songtok aser pa dak kongshi, aser pa dang ashi, “Ni mulunger, na merüka kümang.”

⁴² Idangyongjisa zütsürai pa toktsü, aser pa meshiteta aküm.

⁴³ Pai pa dang sashia nungtem aser idangyongjisa pa yokadok,

⁴⁴ aser pai pa dang ashi, “Nai ya shinga danga teshima no, saka oang aser putir dang sayuang aser parnok dang kuli asütsü asoshi na merüktettsü atema Mosai melaba ama tenla-ang.”

⁴⁵ Saka pai oadok aser iba o ayimsünga yoktsü atema iba indang odia jembimeso; anungji joko Yisui yimti katia odia meitet, saka azüngmeyakdak tesem ka nung pila-a ali; aser ajaklen nungi nisungtem pa dangi aru.