FILEMON 1 - Ao Naga C.L. Bible (BSI)

Okila

¹ Paul, Yisu Khrista atema tepuoker ka, asen adianu Timoti nungi, onok külemi inyaker temeimba asen adianu Filemon,

² dangi aser adianutsür Apifa, aser asen medemer temeranger Arkipa, aser ne kidang sentepba arogo nunger ajak dangi:

³ asen Tebu Tsüngrem aser Kibuba Yisu Khrista nungi nenok dangi taochi aser tesünep sang.

Filemon Temeim Aser Tamang

⁴ Kü sarasadem nung na bilemtetdang ni teti kü Tsüngrem tenüng asanger,

⁵ kechiyong Kibuba Yisu Khrista aser temeshipur ajak tsütsü ne temeim aser tamang aliba indang ni angashi.

⁶ Ne tamang lemsatepsang jagi Khrista nung asen meyong tajung metetba shisatsü ajakji tejakleni odaktsütsü asoshi ni sarasademer.

⁷ Kechiaser adianu, ne temeim nungi ni kanga tepela aser tesünep angu, kechiyong na agi temeshipurtem süngzük.

Pauli Onesima Asoshi Mepishitsüba

⁸ Anungji kechi tim aji indang ne dang ozüng agütsütsü Khrista nung ni kanga tasü ita liaka,

⁹ aji saka ni ama tambur Paul asünung, aser tang Khrista Yisu asoshi tepuoker ka asünung, temeim atema ni temepishiang mepishir.

¹⁰ Kü tepuokba nung asoba kü chir Onesima asoshi ni ne dang mepishir.

¹¹ Pa khen mapang ka nung na asoshi tajangzük maka liasü, saka tang na asoshi aser ni asoshi tajangzük

¹² Pa shiba kü pei temulungjang ama lir, paji ni ne dangi meyipa yokogo.

¹³ Osangtajung atema ni tepuokdak alidang, ne melen pai ni yaritsü asoshi ni kü den yunüa liasü.

¹⁴ Saka nai ajungba kangshia masü, saka mulungmulunga asütsü asoshi ni nai mulungba medeni kecha meinyaknü.

¹⁵ Kechiyong nai pa teti tatem makai meyipa agitsü,

¹⁶ joko alar ama masü, saka alar dang nungibo taoba temeim adianu, tongtibangsa ni asoshi temeimba, saka shi aser Kibuba anaprongla nung ne dang kanga tali temeimba asütsü asoshi na nungi pa kenpiga asoshi pila-a liasü südi.

¹⁷ Ajangla nai kü den semteper ta züngshira, ni ama pa agizükang.

¹⁸ Saka pai ne dang langka mashi benshia lira, ajangla aji kü dak zünglokjang.

¹⁹ Ni menokdi, ya ni Pauli kü ket agi zülur. Atangji sentsü ama nai kü nem pei sasa tagütsütsü alibabo ni ne dang mashir.

²⁰ Hau, adianu, Kibuba nung ne indang ni peladakjang, Khrista nung kü temulung süngzükdakjang.

²¹ Ne tashi angaba nung kanga amanga, aser ni kechi ashir idakji alaka nai inyaktsü ta meteta, ni ne dangi zülur.

²² Saka iba den ano ni asoshi tanendak ka renema yujang, kechiyong nenok sarasadem ajanga nenok dangi ni yoktsü ta ni imlar.

Tatem salem o

²³ Epafra, Khrista nung kü medemer tepuokeri ne nem salem agütsür.

²⁴ Aser Mark, Aristarka, Dema aser Luk, kü medemer inyakertemi yamaji ashir.

²⁵ Asen Kibuba Yisu Khrista taochi nenok tanela den liang. Amen.