Basef Ifimba Jut Nandaꞌafi 1 - Basef Buꞌwami Godi

¹ Ae' Jut anda' maol ape owina Jisas Krais, ae' owalomana Jemsi. Ae' anda' basef amama mafe'mago ipe' amam nematawa God nandandepepa ea'. Mafe'mago ipe' Ahalomapa God okom maimailipei, ipe' Jisas Krais atona nili'akwapa.

² Ae' a'i God nonda'epa pepe la'ifipama dahowe ananinai opalef awanem pegawa okom ananinai nainailipa. Ae' a'i waf anama nupeipa si'ipa.

Basef amam naumbih mambaso'ami

³ Alupipei endilisi, ae' okom nainailipa. Ae' ali' a'i enda' anom basef mil okwatip mefe'mago ipe' ma God nefa'apa motanimani. Anan nefa' ipe' peloma ae' wapoti'. Ea' owa. Dei' a'i ata' enda' anom basef i'ipipago efela ukup ipe'imi ma penda' maol la'ifipa pimafiago basef endilisimi Kraisi ape' mombale'efami. Ama pehagasa naumbih amama mahagofa basef amama Kraisi. Bale'ef anama God nase'apana ape' hiapai amam nematawa Ananipai nemaf anama atotona mape la'ela'ef.

⁴ Dei' main, anom amam mandambaho' mawisi la'afena ape' Kristen. Fowa' gani basef mail Buk Baibeli ma'i amam amama anona nemaf God nowalogama basef lu'wami ma kot. Amam mowa' alafugaha God maho'ofa basef bu'wami Anan nagiambamapa na'a ma'ipas anom basef manda' waf naninani ukup mohafela waf aonai so'a waolanai nataga la'ifina.

⁵ Endilisi, ipe' pegawa basef amama fowa'imi mail Baibeli. Ea' dei' ae' a'i efela ukup ipe'imi ma pegawam wapoti'. Basef amama mape na'ama. Fowa' Dembinai nofa' esis amam nematawa Ananisi Israel sakwaha etap hiagoma Isip nofa'as safi'i. Ea' Anan naha epes isima owa' sombale'efa Anani saga'. Amam mowa' alafugaha aman anama Jisas Krais Dembinai ape'inai numafi pepel hianai.

⁶ Dei' ipe' ukup mopoma amam ensel amama wapoti', amam ina mumafi maol anama naloma agof lu'wami God nase'amamanai andeande', owa'. Amam makwaha wambel amamunai heven. Ea' dei' God nowa'am sen la'ifinai nape la'ela'efi. Ea' mape la'ela'ef wambel anama akot nape la'ela'efa. Mape mohafa nemaf anama lu'unai God nowalogam moloma epes hiesi wapoti' hi'ilas.

⁷ Dei' ipe' okokoma epes isima fowa' sape Sodom naloma Gomora maloma wambel anama hiagoma mape felefele'ma anama. Esis sanda' waf aonai na'ama etin si'i ensel amama. Amam amama Sodom naloma Gomora manda' waf so'a waolanai ea' ukup amamumi mohafel endilisi ma manda' so'a waola waf aonai maloma amam amama atom. Dei' God nagwamama nimanimi lu'wami amam ma nif lu'wami fandom mape dendel la'ela'ef. Amam mape si'i anona ikwaf ape' motolona mogawa ape' ina mila waf aonai amam manda'anai, owa'. Hapainai.

⁸ Amam amama mandambaho' mawisi malomapa manda'am na'ama etin. Koh nandondo'oh hianai amamunai nafela ukup amamumi ma manda' waf aonai ma alop amamunai. Amam masombala basef Dembinai ape'inai manda' anom ensel dembemi mape heveni wapoti' findiwam.

⁹ Ea' amam ensel mape ilifi, amam ina ma'i basef findiwaimi si'i amam amama, owa'. Ensel anama dembinai nape nali'i Maikel wapoti' ina nanda' basef findiwama enis epes na'ama, owa'. Fowa' anan na'i basef nandahihianamam naloma Satan, ma'i anona nemaf emi nofa' alop Mosesi. Ea' Maikel ina nagwamana basef Satan nanda'ana findiwana, owa'. Anan nagwamana basef na'ipana na'i, “Dembinai atona nogwamenam.”

¹⁰ Ea' amam amama mandambaho' mawisi malomapa, amam ma'i basef awami ma amamaga hiami amam owa' mogawa ofagema. Waf ukup mohafela migi'ma alop atona inai mogawana andeande'. Waf anama amam manda'ana si'i mafis amama ukup a'emi manda'ami. Amam manda' waf anama atona nahambombagam endilisi.

¹¹ Endilisi, nimanimi lu'wami anona nemaf motagamam. Amam mefa' waf aonai fowa' Kein nanda'anai. Ukup amamumi mohafel endilisi ma mofa' otamba atom. Ea' dei' maso' alop amamunai nafe' hi'alana manda' waf aonai si'i fowa' aman anama Balam nanda'anai. Ea' masombala basef Godi si'i fowa' aman anama Kora nanda'am. Amam manda' waf anama, dei' aom higilalam si'i fowa' Kora higilalona.

¹² Amam amama mandambaho' mawisi malomapa, waf aonai amamunai nape na'ama. Nemaf anama ipe' Kristen ukup maimaila sahin owan ipe'isi pandakolas panda' gwa'aimi ipe'imi o panda' gwa'aimi Jisasi, amam mape malomepa ma' gwa'aimi amama wapoti'. Ea' amam si'i ikwaf aonai la'ifinai nail nanda' gwa'aimi amama aom. Amam ma' gwa'aimi malomepa, ea' ina umbamaham ma waf aonai manda'anai, owa'. Ukup mapoma amam atom. Ina magiambama enis epes mase'asam, owa'. Amam mawalipasa basef, ea' basef amamumi ina magiambamas, owa'. Basef amama wafimi atom si'i otaga wafinai uf nefa'ana nafi'i ina asaf nalai, owa'. Amam mandahama lawah mola gwa'aimi, ea' nogota mailanai ina mola gwa'aimi, owa'. Lawah amama alim sagiam nombalef mapomamam ma'oh.

¹³ Amam manda' waf ambagof awami, anama nataga si'i naoh embel mohafel lu'um endilisi matoma ufun matagam. Ea' mape manda' waf anama aonai mandahama ondowa motawa otagai ina magawa eaf la'ela'ef mafi'i anai. God nandomba anona wambela amam owamb lu'unai napoma anona nemaf mope la'ela'ef.

Amam manda' waf aonai mambaso'mami mofa' nimanimi

¹⁴ Aman anama Enok fowa' nawalapa basefa amamaga anona nemaf migi' meatagai alihima amam amama manda' waf aonai. Anan nataga nagi'ma wambotagw amama 7-peleim mahafela Adami nawalapa basef amama alihim endilisi ma amam na'i, “Ipe' peme'! Dembinai anona nemaf nifi'i noloma ensel ananimi tausen hiami endilisi

¹⁵ ma nowaloga epes hiesi nogwamasa nimanimi lu'wami ma waf aonai esis sanda'anai. Ama nihi'ambamas alihisa waf aonai hianai esis sanda'anai ofagema asasimi atom. Epes isima sanda' waf anama aonai na'ama. Esis sowa' alafugaha God endilisi, sosambala basef, sa'i basef sosambalom mamumami awami ma anan.”

¹⁶ Amam amama mambaso'ami mawisi malomapa ina mape andeande' opalef awanem, owa'. Amam mondowamba' ma amamaga hiami ea' mosambala basef Godi. Ukup amamumi mohafel na'ana'a ma waf aonai ukup mohafemami ea' magi'ma amama. Amam ma'i basef mamumami mafela agof amamumi atom. Amam ma'ipa enis epesa basef usihimi ma mamboma ukup asasimi saila basef amamumi.

Ipe' pembale'efa Jisas Krais la'ifipa la'ela'ef

¹⁷ Ea' ipe' alupipei ae'ipei endilisi, ipe' ukup mopoma basef fowa' amam aposel Dembinai ape'inai Jisas Kraisi ma'ipipami ma amamaga maim anona nemaf nigi' neatagai.

¹⁸ Fowa' amam aposel ma'ipipa na'ama ma'i, “Anom nimeguf akutaimi motaga, anom amam monda' iafa waf Godi mifi'i mope. Amam mowa' alafugaha God, ea' ukup amamumi mohafel endilisi na'ana'a ma waf aonai atona ea' mila amama.”

¹⁹ Amam amama atom manda' ipe' Kristen pandawal. Amam maila ukup epes etapasi etis, Ambal Bu'unai Godi a'am.

²⁰ Ea' ipe' alupipei endilisi, la'ela'ef ipe' penda' opalef ipe'imi la'ifim pembale'efa God, Anan ofagonama bale'ef ipe'inai. Ea' la'ela'ef ipe' pihali' Ambal Bu'unai Godi ma nonda'epa la'ifipa numafipa ma beten ipe'inai.

²¹ Ipe' pindumafuma andeande' pila waf Godi andeande'ma Anan nihi'ambepa andeande' okom lu'unai ananinai nainailipei. Ipe' penda'am na'ama pepe pehafa Dembinai ape'inai Jisas Krais, Anan nati uwahipipa anona nemaf nonda'epa pepe namepa ma pepe andeande' la'ela'ef hihif.

²² Enis epes sape ukup biambiefima sombale'efa Kraisi, ipe' piti uwahipis pigiambamas penda'as sotaga la'ifis.

²³ Enis epes sowa' alafugaha Godi si'i sape nif fandumi la'afen, ipe' mehip gwasi'as sotanimani. Ea' enis epes sanda' waf aonai la'ela'ef, ipe' umbamehepamas. Na'ama sohonde'epa pefe' nif. Ea' piti esis uwahipis pigiambamas. Waf apinai aonai asasinai si'i sowaho' luwaguf alogw la'ifimi mailami. Ea' ipe' pewa' alafugaha waf anama aonai pendafa'mana endilisi.

Ape' minifela God

²⁴ Ae' a'i ape' mefela agel Godi lu'una na'ama. Anan la'ifinai ma nili'akwapa andeande'ma anona nemaf ipe' ina pewa ma waf aonai, owa'. Ama anona nemaf nofa'epa nokolasipa pepe andeande' pendanifel endilisi, ofagema ma waf aonai a'epa ma anama Anan nape nafifimagoma.

²⁵ Anan atona God, nefa' ape' motanimani ma lagel Dembinai ape'inai Jisas Krais. Nafifili naloma agel lu'unai pepel lu'unai naloma waf anama nape la'ifinai numafi amamaga hiami, amama ananimi atom nafi'i nafi'i nataga dei' anona nemaf owagama wapoti' nope na'ama etin la'ela'ef hihif. Ea' ma'um.