2 Timoti 1 - Basef Buꞌwami Godi

^1-2 Ae' Pol anda' basef mafe'mago ine' Timoti, ae' okom nainailina. Ine' nembale'efa God dei' nataga nogalome ae'inai. Okom Godi atona dei' ape aposel Jisas Kraisi. Basef Krais Jisasi endilisimi atom, nase'apa ambal namunai ape' mape la'ifipa maloma Anan. Ae' a'i amam biam migiambamena na'a ea' muti uwahipina monda' okom ine'inai nope awanena.

Ape' ina ambagof aoma basef Jisasi, owa'

³ Esis ihase ae'asi saila waf Godi, dei' ae' wapoti' ailana. Ea' malogel nape opaf ae' nomoni ina nihi'ambe anona waf aonai anda'anai, owa'. Beten ae'anai owamb alip la'ela'ef ae' okom napomena anifela God.

⁴ Ae' okom napoma embif maluwi naep ine'imi, okom nohafel endilisi a'i ata' efo'o itilina endanifel endilisi.

⁵ Ae' okom napoma bale'ef ine'inai, anama endilisinai, ina baso'omunai, owa'. Bale'ef anama fowa' nali' napoma iha'mena ine'ikwi Lois kwaloma mama'wena Yunis. Ea' egawa endilisi, bale'ef anama dei' napoma ine' wapoti'.

⁶ Fowa' ae' awamona lagofa balaga ine'inai ma God nase'ena presen bu'unai ananinai. Ea' dei' a'i efela okom ine'inai ma okom nopoma presen anama napoma ine' nimafiana notaga la'ifina si'i sufapula nif fandom lu'um.

⁷ Ambal Bu'unai God nase'apanai ina nonda'apa umbamohapa, owa'. Anan nase'apa waf anama mitu la'ifipamanai ma ukup mimila enis epes ea' mumafi alop ape'inai andeande'.

⁸ Ine' owa' ambal aona ni'ipasa basef Dembinai apa'inai, owa'. Ea' ina ambal aona ma ae' wapoti', owa'. Ae' anda' maola Dembinai dei' anda' kalabus. Ine' nefa' pepel Godi ma netaga la'ifina nefa' nimanimi nelome owalapa basef bu'wami Ananimi.

⁹ God nofa'apa mutanimani mope andeande'. Anan nofalapa amam nematawa ananipai atepa mope bo'wepa andeande'. Anan ina okom napoma waf bu'unai ape' manda'anai nofalapa, owa'. Okom Ananinai atona nainailapa nofalapa nagiambamapa na'a. Fowa' dambadamba ina dei' nanda' etap, ata' owa', Jisas Krais nandahomapa nagiambamapa na'a.

¹⁰ Ea' dei' nogota anae' Krais Jisas nafi'i nofa'apa motanimani, anan nataga alihina. Dei' maol ananinai God nagiambamapa na'a nanda'apa mataga la'ifipa mataga alihim. Krais Jisas nikila' ga', ea' basef bu'wami Godi mihima'mapa ambal namunai nape andeande' la'ela'ef.

¹¹ Anan nali' nandandepe anda' maol anama awalapa basef bu'wami Godi ma epes hiesi. Ae' aposel God nasapa'e awalapa basef Ananimi, ae' tisa dembiwei anda' maol Jisasi.

¹² Amama atom dei' efa' nimanimi amama. Ea' ae' ina ambal aona ma amama, owa'. Ae' egawa aman anama embale'efanai. Ae' egawana endilisi anan la'ifinai ma numafi amamaga hiami moloma epes hiesi ananisi ae' ase'anas lagof ananimi. Ea' amama mope bo'om andeande' mefe' motagama nemaf anama lu'unai notaga.

¹³ Basef amama bu'wami ine' name'ama malogel ae'anai, basef amama si'i anona ikwaf bu'unai ma nihi'ambena waf bu'unai newalipasa epes. Ine' nembale'efa Jisas Krais endilisi ea' okom ninilana nenda' waf na'ama nembale'ef la'ifina ma basef amama.

¹⁴ Nimafi basef amama bu'wami endilisimi God nase'enam lagof ine'imi ma nimafiam. Ambal Bu'unai Godi nape nomona ape', nigiambamena numafina ma maol anama.

¹⁵ Ine' negawa epes hiesi sape etap hiagoma Esiai, saloma amam biam Figelus naloma Hermogenes sakwahowe safe'.

¹⁶ Ae' anda' betena Dembinai ma ata' niti Onesiforus naloma wambota ananinai uwahipis. Dei' main, anan la'ela'ef nanda' okom ae'anai nape andeande'. Anan ina ambal aona ma ae' anda' kalabus, owa'.

¹⁷ Anan nafi'i Rom nanda' maol lu'unai nagolope nogota laona ea' natolowe.

¹⁸ Ae' anda' betena Dembinai ma niti anan uwahipina nemaf anama bu'unai. Anan nagiambame nimeguf hiami wambel anama Efesus, amama ine' negawam andeande'.