Tite 1 - Ajie New Testament

Nô Né Vi Méar̂i

¹ Gènyâ Paulo, kâmö yar̂i i Bâô, mâ aposetolo i Ièsu Kérisö vè tâ néwèi pâr̂â kâmö ré na pâbir̂i-r̂é na Bâô mâ vi rhîâgür̂ü i avâr̂i rö-i vi tâ nôô yè Bâô,

² rö ka tâ néwèi yè mör̂u ka da tâwai yèri, ré na êr̂ê vèa baayê ma'ʼ na Bâô ka da tâwai vee,

³ na bör̂i êr̂ê vèa nô xi-e rèi nédaa-né, na wêyê-né na vi pur̂â ré é kâyâi yè-nya, na ûr̂û ké vi câwâ i Bâô ré pè mör̂u-ré.

⁴ Gö yu vèr̂i yè-i Tito, ka dö o xi-nya rö-i tâ néwèi ka rhaaxâ na nô-né. Na e na ki tö pwar̂a-i na vi méar̂i vi bwir̂i mâ avâr̂i xè-i mi Bâô Pevaa mâ Kérisö Ièsu ka vi pè mör̂u-ré!

Nêr̂ê Tito Rö Kérété

⁵ Gö kâyâi-i rö Kérété, na pûû-é na cé-a êr̂ê, gèi mâ tâ pè cowa pâr̂â nêr̂ê ré é da tö waa, na ûr̂û ké vi câwâ xi-nya yè-i, mâ gè yè pè tömâ pâr̂â pâi béâr̂i rö pâr̂â névâ, na ki wii na dèxâ ka yè pâr̂i-e,

⁶ wè kâmö ka yèri pè aʼvè yaané-é, mâ ka rhaaxâ rö na bwè xi-e, mâ ka wii na pâr̂â pâlè-è pa tâ néwèi, mâ ka da mâʼ vè yaané na rhenô né-r̂é, rö-i câwâ bwir̂i mâ da pwêr̂ê nô.

⁷ Wè na e yè ka vi târ̂î waa ar̂ii cè ki yèri pè aʼvè yaané-é, na ûr̂û kâmö ré waa nêr̂ê vè ki Bâô; na e na ki da kâmö ka tëvë vi pè kau-é, mâ ka da rhôê vi bèr̂éé, mâ ka da wâyö vè kau divââ, mâ ka da vi paa, mâ ka da âmu i mwâné,

⁸ aè na e rö na ki kâmö ka méar̂i pa döwöö na ce, béé pâr̂â kâmö pa e, mâ ka tâ néxâi gaamëë, mâ târi mâ ka vi rheewaa-è, mâ pè yar̂i câwâ i kar̂ö,

⁹ aè na tuwir̂i tuxâgür̂ü nô ka avâr̂i, na ûr̂û ké pâgür̂ü-é, cè ki tâwai yè vi aʼpâgür̂ü ké vi aʼpâgür̂ü ka târi, mâ yâwîî néwâ pâr̂â kâmö pa vi yiâ.

¹⁰ Wè cér̂é pôr̂ô na pâr̂â kâmö pa da pwêr̂ê nô, pa tëvë bwir̂i, mâ vi ârui, aè cér̂é pôr̂ô vi kwéjî rö pwar̂a-r̂é pâr̂â paxa wê vâr̂â yêr̂ê,

¹¹ na e na kè-r̂é yâwîî néwâ-r̂é. Cér̂é pur̂â bwir̂i pâr̂â wêê mwâ wânii, mâ aʼpâgür̂ü pâr̂â kââ ka da pâr̂i cè ké-r̂é cëi pè yadii pè köö-r̂é.

¹² Na êr̂ê na dèxâ rai-r̂é ka pérövéta xé-r̂é, êr̂ê: «Pâi xè Kérété, wè cér̂é pâr̂â paxa veevee, pâr̂â bwâr̂âwê pa vi paa, pâr̂â kâmö pa gupöö na pwéé-r̂é.»

¹³ Na avâr̂i na ké êr̂ê céréé. Tö ökâré, gè yè aʼpâgür̂ü-r̂é vè mör̂ö, cè ki târi na tâ néwèi xé-r̂é,

¹⁴ aè koa yè cëi rö pâr̂â vi nimö i pâi xè Juda, mâ pâr̂â ké vi câwâ i kâmö ré wê teyâ rai avâr̂i.

¹⁵ Na korhî na pâr̂â kââ wânii yè pâr̂â kâmö pa korhî na wêê nénââ xé-r̂é, aè pâr̂â kâmö ré miir̂i mâ pa da tâ néwèi, wè na yèri dèxâ kââ ka korhî yè-r̂é, xè-i ké wê miir̂i i pâr̂â vi tâ pâgür̂ü xé-r̂é, mâ pâr̂â vi rhîâgür̂ü xé-r̂é bar̂ee.

¹⁶ Cér̂é bâ êr̂ê, cér̂é tâwai Bâô, aè cér̂é vi yiâ xi-e rö, xè-i pâr̂â nêr̂ê-r̂é, aè cér̂é miir̂i mâ da pwêr̂ê nô, aè na yèri dèxâ nêr̂ê ka e ré ka yè pâr̂i-r̂é na ké yè waa.