Luka 1 - Ajie New Testament

Ka Rhavûû Pâr̂â Nô

¹ Téofila éé, Cér̂é wê waa na bör̂i pa pôr̂ô cè ké-r̂é yu vi yëwaa pâr̂â kââ ré wê rhau pwa mâ yexèvè rö pwar̂a-r̂é wânii,

² ûr̂û ké vi rhenô i yè-r̂é i pâi pa tö rhûû mi mâ' rö ka rhavûû mâ' pâi pa nêr̂ê-r̂é na nô.

³ Na bör̂i tö vèa yè-nya cè göi yu yâbèr̂i yè-i pâr̂â kââ-ré, na gö wê cowa mèyè avâr̂i pâr̂â kââ-ré rhavûû rö pûû-é, cè gèi rhîâgür̂ü na gèi, Téofila,

⁴ wè gèi dö kâmö, ka avâr̂i i pâr̂â kââ ré é wê aʼpâgür̂ü yè-i röi.

Na Êr̂ê Baayê Na Angéla Ké Yè Ârè I Ioané-Batiyi

⁵ Tèi nédaa i Héroda, ör̂ökau ka kau rö Juda, na wê wii na dèxâ wi ka ar̂ii, na Zakaria na néé-é, mâ Abia na néé cî wakè xi-e; aè bwè xi-e wè dèxâ rai pâlè powè i Arona, na Élisabèt na néé-é.

⁶ Cur̂u rhau avâr̂i rö némèè Bâô, mâ köiwaa pâr̂â mââyöö mâ vi winô i Ör̂ökau rö-i wêyê ka dö târi.

⁷ Na wê yèri ki-r̂u o yar̂i, wè na tenu na Élisabèt, mâ cur̂u wê béâr̂i vi.

⁸ Na bör̂i waa nêr̂ê né waa ar̂ii rö némèè Bâô na Zakaria,

⁹ Tèi nédaa né cî wakè xi-e, na bör̂i yejîî-e na vi ya, wè, ökâré wêyê né nêr̂ê-â, cè ki yè vi ru na ce rö mwâ ka ar̂ii i Ör̂ökau, mâ nââ borhêê rö-i.

¹⁰ Aè pâr̂â kâmö wânii, wè cér̂é tö bwêê wêyê, mâ pwaér̂ö rèi pè mèèxa né ké yè nââ borhêê.

¹¹ Na bör̂i tö vèa yè Zakaria na dèxâ angéla i Ör̂ökau, mâ tömâ na ce rö é gaamëë né kaa yâmar̂a né borhêê.

¹² Na bör̂i cêrhö na Zakaria na tö rhûû-é mâ na kau na bar̂a rö xi-e.

¹³ Na bör̂i êr̂ê yè na angéla: «Koa yè bar̂a wè Zakaria, wè é wê cowa cëi ké pwaér̂ö xi-i. Nè mâ vi ër̂i yè-i dèxâ o yar̂i wi na bwè xi-i Élisabèt, aè gè yè mâ ye néé-é, êr̂ê, Ioané.

¹⁴ Nè yè pûû vi or̂o mâ pwérhar̂a rö pwar̂a-i, aè cér̂é pôr̂ô na paxa yè vi or̂o kèi ké ârè xi-e.

¹⁵ Wè nè yè kau rö némèè Ör̂ökau na ce. Nè da wâyö divââ, mâ pâr̂â rhëë pè bwéjé kâmö, aè nè yè rhâri na ce i Ko-Ar̂ii rhavûû rö pwéé pâni-e;

¹⁶ nè yè pè xé-r̂é mi tëë bör̂i pa pôr̂ô pâ mör̂u Israèl wa Ör̂ökau Bâô xé-r̂é;

¹⁷ nè yè vâr̂â vi rö némèè Bâô xar̂a ko mâ awir̂è i Élia, cè ki pèi mi tëë wêê nénââ i pâr̂â pevaa yè pâr̂â pâlè-r̂é, mâ paxa gu vi vââ-r̂é yè gaamëë i pâi pa târi, cè ki kâ vè tö vâ yè Ör̂ökau dèxâ ba ka é wê waa e röi.»

¹⁸ Na bör̂i aʼcëi yè angéla na Zakaria êr̂ê: «Gö mâ tâwai tâîî ö kââ-ré? Wè gö wê béâr̂i, aè bwè xi-nya, wè na tö kwayii.»

¹⁹ Na bör̂i aʼcëi na angéla: «Gènyâ Gabriel, ré tömâ rö némèè Bâô. É tùr̂ùwaa-nya cè göi pè aʼ-i mâ aʼvè néxâi yè-i nô ka e ré é.

²⁰ Aè tö rhûû gè yè nimâ mâ gè yè da tâwai aʼ kwéyë rua rèi ö nédaa ré nè yè pwa na pâr̂â kââ-ré, wè gè da tâ néwèi pâr̂â nô xi-nya ré yè mâ yexèvè rèi nédaa xé-r̂é.»

²¹ Aè pâr̂â kâmö wânii, wè cér̂é bâ tö târ̂î Zakaria, mâ cêrhö wa ké tö vè mwââ xi-e ûr̂û-ré rö mwâ ka ar̂ii.

²² Aè na wê tù, na bör̂i da tâwai pè aʼ-r̂é na ce, cér̂é bör̂i rhîâgür̂ü êr̂ê na pwa yèr̂i-e na ngërhûû rö mwâ ka ar̂ii; wè na vi yejîî i köwi-e mâ tö nimâ.

²³ Na wê cowa na nédaa né wakè xi-e rö-i, na bör̂i vi a mwâr̂â na wêê mwâ xi-e.

²⁴ Tèi nédèè, na bör̂i wê tâwé na bwè xi-e Élisabèt, na bör̂i öcoé kanii var̂ui na bwè-ré. Na bör̂i êr̂ê:

²⁵ «Wè vi méar̂i vi bwir̂i i Bâô yè-nya na ö kââ-ré rèi nédaa ré na tö rhûû-nya mâ cöö virai ké köö xi-nya rö pwar̂a pâr̂â kâmö.»

Na Êr̂ê Baayê Na Angéla Ké Yè Ârè I Ièsu

²⁶ Tèi var̂ui pèkanii na ma rhaaxâ, na bör̂i tùr̂ùwaa angéla Gabriel na Bâô, na dèxâ névâ rö Galilé, néé-é na Nazarèt,

²⁷ rö pwar̂a dèxâ bwè dowa ka da tö rhéö, ka é aʼwîî vè ki dèxâ kâmö xè-i mwââr̂ö i David, néé-é na Ioséfa, néé bwè dowa-ré wè Maria.

²⁸ Na vi ru rö mwâ xi-e na angéla, mâ êr̂ê: «Na kau mâmâ na ko-i, wè gèi ré na pwa yèr̂i-e na dèxâ vi méar̂i vi bwir̂i, wè na tö pwar̂a-i na Ör̂ökau.»

²⁹ Na bör̂i cêrhö na Maria, êr̂ê, na wêr̂êi na ké aʼvui-a?

³⁰ Na bör̂i aʼcëi na angéla: «Koa yè bar̂a, wè Maria, wè gè pwa yèr̂i vi méar̂i vi bwir̂i rö pwar̂a Bâô.

³¹ Tö rhûû, wè gè yè mâ tâwé, mâ gè mâ vi ër̂i dèxâ o yar̂i wi, na gè yè mâ ye néé-é êr̂ê Ièsu.

³² Nè yè kau na ce, mâ é yè mâ aʼyè-è êr̂ê, o i Ka tö rua aau, aè nè mâ nââ yè-è kaa per̂e i David pevaa xi-e, na Ör̂ökau wè Bâô.

³³ Nè mâ vi winô rö mwââr̂ö i Iakobo na ce kwéyë rua waavi, aè nè yè yèri léé kaa vi winô xi-e.»

³⁴ Na bör̂i êr̂ê yè angéla na Maria: «Nè mâ wêr̂êi, wè gö da tö tâwai dèxâ wi?»

³⁵ Na bör̂i aʼcëi na angéla: «Nè tö bwêêwé-i na Ko-Ar̂ii, mâ awir̂è Ka tö rua aau, wè, nè yè karui i ui xi-e. Ökâré é yè vi aʼyè êr̂ê, o i Bâô, na o yar̂i ka ar̂ii ré yè tö vèa xè xi-i.

³⁶ Tö rhûû, bwè ker̂e-i, wè, Élisabèt, wè na cî rö xi-e dèxâ o yar̂i na na wê béâr̂i, wè na mö ké tö pèkanii na ma rhaaxâ var̂ui xar̂a tâwé xi-e na bwè ré é wê vi êr̂ê mâ', êr̂ê, bwè ka tenu.

³⁷ Wè na yèri kââ ka da pâr̂i Bâô.»

³⁸ Na bör̂i êr̂ê na Maria: «Tö rhûû, gö kâmö yar̂i i Ör̂ökau. Na e na ki yè waa yè-nya ûr̂û ké êr̂ê xi-i!» Na bör̂i wê kâyâi-e na angéla.

Na Rhâwaa Élisabèt Na Maria

³⁹ Na bör̂i tömâ rua na Maria rèi nédaa ré é, mâ vi rua nér̂êi na dèxâ névâ ré tö négowé gwêêwè rö Juda.

⁴⁰ Na bör̂i pwa rö wêê mwâ i Zakaria, mâ cêmè vi cêrhö wa Élisabèt.

⁴¹ Aè na wê pwêr̂ê na Élisabèt ké cêmè vi cêrhö wa-è i Maria, na bör̂i tee rö pwéé-é na o yar̂i, mâ rhâri i Ko-Ar̂ii na pâni-e.

⁴² Na bör̂i aʼvè kau rua, mâ êr̂ê: «Na kau mâmâ na ko-i rai pâr̂â bwè wânii, mâ é aʼvui pwêê léwé-i!

⁴³ Kè-wè na ké pwa yèr̂i-nya i pâni Ör̂ökau xi-nya?

⁴⁴ Wè na da tö pwa yèr̂i böödê-nya na mêr̂ê aʼ né ké wê cêmè vi cêrhö wa-nya xi-i, na bör̂i tee xè-i vi or̂o na o yar̂i xi-nya rö pwéé-nya.

⁴⁵ Na kau mâmâ na ko bwè-ré wê tâ néwèi, wè, nè yè rhau yexèvè röi na pâr̂â kââ ré é wê êr̂ê yè-è xè-i mi Ör̂ökau.»

Rhe I Maria

⁴⁶ Na bör̂i aʼcëi na Maria, êr̂ê: «Na pè kau rua Ör̂ökau na wêê nénââ xi-nya,

⁴⁷ Mâ na vi or̂o rö-i Bâô na ko-nya, Wè ce ré pè mör̂u-nya,

⁴⁸ Wè, na bèr̂éé wa ké yar̂i ria i bwè kâmö yar̂i xi-e. Tö rhûû, cér̂é yè mâ êr̂ê na pâr̂â cî kani waavi, êr̂ê, Na kau mâmâ na ko-nya.

⁴⁹ Wè na waa rö xi-nya pâr̂â kââ ka kau aau na Katawaiwânii. Na ar̂ii na néé-é.

⁵⁰ Mâ na tö bwêêwé pâr̂â cî kani mâ pâr̂â cî kani, Rö pwar̂a-r̂é paxa bar̂a yè-è na vi kââwaa xi-e.

⁵¹ Na wê yexèvè na mör̂ö xi-e rö köwi-e, Aè na wê kâ vè maii-r̂é pâr̂â paxa vi pè kau-r̂é rö-i vi tâ néxâi i wêê nénââ xé-r̂é.

⁵² Na yapurhâi xè-i kaa per̂e xé-r̂é pâr̂â paxa wii na awir̂è xé-r̂é, Mâ na pè rua pâr̂â pa pè yar̂i-r̂é.

⁵³ Na nââ rha vèâi pâr̂â kââ ka e yè-r̂é paxa mêr̂ê, Aè na kâyâi vè yerii aau cér̂é ré kigör̂ödiwi.

⁵⁴ Na nââbéé Israèl, wè kâmö yar̂i xi-e. Wè na tâ néxâi vi kââwaa xi-e yè-è

⁵⁵ Abérahama mâ pâr̂â mör̂u-é waavi, Ûr̂û ké wê êr̂ê xi-e yè pâr̂â bèmûû-ré.»

⁵⁶ Na wê tö pwar̂a Élisabèt na Maria na ûr̂û karir̂i var̂ui, na bör̂i vi a mwâr̂â na wêê mwâ xi-e.

Ké Ârè I Ioané Batiyi

⁵⁷ Aè na wê pwa na nédaa né ké yè vi ër̂i i Élisabèt, na bör̂i pè ârè dèxâ o yar̂i wi.

⁵⁸ Pâr̂â kâmö pa tö vè ubwa i-e, mâ pâr̂â pâ ker̂e-é, wè cér̂é wê cowa pwêr̂ê ké wê pè tö vèa rö pwar̂a-è vi kââwaa xi-e i Ör̂ökau, cér̂é bör̂i wê vi or̂o wa-è cér̂é-é.

⁵⁹ Tèi nédaa pèkanii na ma karir̂i, cér̂é bör̂i wê ye néé-é êr̂ê Zakaria, ûr̂û pevaa xi-e.

⁶⁰ Na bör̂i aʼ na pâni-e: «Aè é yè ye néé-é êr̂ê, Ioané.»

⁶¹ Cér̂é bör̂i aʼcëi yè-è êr̂ê: «Na yèri aau kâmö rö mwââr̂ö xi-i ré é ye néé-é ûr̂û-ré.»

⁶² Cér̂é bör̂i vi yejîî i köwi-r̂é yè pevaa xi-e, cè ké-r̂é tâwai êr̂ê, nè jië na néé-é.

⁶³ Na bör̂i tùr̂ùyè pèyaa na Zakaria, mâ yu rö-i, êr̂ê: «Na Ioané na néé-é.» Cér̂é bör̂i rhau cêrhö.

⁶⁴ Tèi cér̂é-é, na bör̂i cîî-e na néwâ Zakaria, mâ cöö-è na kur̂umé-é, na bör̂i aʼ na ce mâ aʼvui Bâô.

⁶⁵ Cér̂é bör̂i rhau cêrhö na pâr̂â kâmö paxa tö pwânûr̂i, mâ tö pâr̂â négowé rö Juda.

⁶⁶ Aè pâr̂â kâmö ré vi tëvë wè cér̂é pwêr̂ê, mâ cér̂é bâ tö xar̂a rö pâr̂â wêê nénââ xé-r̂é, cér̂é tâ néxâi êr̂ê: «Nè yè mâ wîr̂î na o yar̂i-a?» Wè na wê tö xi-e na néxar̂a â Bâô.

Rhe I Zakaria

⁶⁷ Na bör̂i rhâri i Ko-Ar̂ii na Zakaria, pevaa xi-e, mâ aʼ ûr̂û pérövéta, êr̂ê:

⁶⁸ «Na e na ki yè aʼvui Ör̂ökau, Bâô i Israèl, Wè na rhâwaa vi nââwîî ba xi-e mâ pè tö vèa vi pè mör̂u vè ké-ré,

⁶⁹ Wè na pè tö vèa vè ké-ré dèxâ vi pè mör̂u, Rö pwar̂a pâr̂â mör̂u ör̂ökau David, kâmö yar̂i xi-e,

⁷⁰ Ûr̂û ké wê aʼvè néxâi xi-e rö-i néwâ pâi pa ar̂ii mâ' xiréé aau mâ pâ pérövéta;

⁷¹ Mâ cè ki öxar̂a-ré rai pâi pa vi paa yè-ré, Mâ rai köwi-r̂é paxa vi rhîaa xé-ré.

⁷² Na pè tö vèa vi kââwaa xi-e yè pâr̂â bèmûû-ré, Mâ tâ néxâi tëë vi kîbô xi-e ka ar̂ii.

⁷³ Ûr̂û ké wê kîbô xi-e yè Abérahama, bèmûû-ré,

⁷⁴ Nè yè nââ yè-ré ki yè yèri bar̂a, Mâ ki yè cöö-ré rai néxar̂a â pâi pa rhîaa xé-ré,

⁷⁵ Cè gèré kâmö xi-e xar̂a vi rheewaa mâ târi rö némèè-è, Rèi pâr̂â nédaa né mör̂u xé-ré.

⁷⁶ Aè gèi, o yar̂i ka yar̂i-a, wè, é mâ ye néé-i êr̂ê, pérövéta i Ka tö rua aau, Wè gè yè köiwaa vi rö némèè Ör̂ökau, cè gèi kâ vè tö vâ wêyê xi-e,

⁷⁷ Mâ cè gèi nââ yè ba xi-e vi rhîâgür̂ü i vi pè mör̂u Rö-i ké yè cöö nô ka yaané,

⁷⁸ Na rhâri xè-i nénââ né vi kââwaa mâ ké e aau i Bâô xé-ré Na ké rhâwaa ré mi xè rua i mèèxa ré mö ké pwé,

⁷⁹ Cè ki waavèai-r̂é paxa cuè rö orê mâ ui né pèii mé, Mâ kâ vè târi ké yâi â-ré rö wêyê né nâânévâ.»

⁸⁰ Aè o yar̂i-a, wè na wê bâ kani vi, mâ mör̂ö vi rö-i ko. Na bör̂i wê bâ cuè rö nékaê, kwéyë rua rèi ö nédaa ré na wê tö vèa rö némèè Israèl.