Jean 1 - Ajie New Testament

Nô Né Daa Mâ Mör̂u

¹ Tö ka rhavûû wè Nô, na tö pwar̂a Bâô na Nô, aè Nô na Bâô.

² Aè na dè tö pwar̂a Bâô na ce tö ka rhavûû.

³ Na yaxai pâr̂â kââ wânii na ce, na yèri aau rha kââ ré ki da yaxai na ce.

⁴ Na tö pwar̂a-è na mör̂u, aè mör̂u wè daa i kâmö.

⁵ Na waa na daa rö léwé orê, aè na da bar̂i cëi-e na orê.

⁶ Na tùr̂ùwaa kâmö na Bâô, wi-ré néé-é na Ioané.

⁷ Na wê pwa na ce vè pè ye vè avâr̂i, wè pè ye vè avâr̂i daa cè ké-r̂é tâ néwèi-e na pâr̂â kâmö xè-i xi-e.

⁸ Na da xa ce ré daa, aè na pè ye vè avâr̂i rö daa na ce.

⁹ Ökâré dö daa ré pè daa pâr̂â kâmö wânii ré pwa rö bwêê jë.

¹⁰ Na wê tö bwêê jë yawi na ce, mâ na yaxai bwêê jë, aè na da tö tâwai-e na bwêê jë.

¹¹ Na wê pwa rö névâ xi-e na ce, cér̂é bör̂i da cëi-e na pâr̂â pâ ker̂e-é.

¹² Aè pâr̂â kâmö ré cëi-e mâ tâ néwèi rö-i néé-é, wè na nââ yè-r̂é ar̂inadö cè ké-r̂é wê pâr̂â pâlè Bâô,

¹³ pâlè pa é da ër̂i-r̂é rö-i war̂a mâ rhî vè e i kar̂ö, mâ rhî vè e i kâmö bar̂ee, aè pa é ër̂i-r̂é xè-i rö Bâô.

¹⁴ Aè, é pugèwè nô vè kar̂ö, na bör̂i bâ tö négowé né ré, mâ rhâri xè-i vi méar̂i vi bwir̂i mâ avâr̂i; aè gèvé wê tö rhûû rhîrhér̂é xi-e, na ûr̂û rhîrhér̂é i O ka rhaaxâ r̂ö ka mi xè-i Pevaa.

¹⁵ Na ye vè avâr̂i-e na Ioané, mâ na aʼvè kau, êr̂ê: «Ir̂i ce xa gö êr̂ê mâʼ, êr̂ê: “Na mö ké mi rhaadè-nya na kâmö ré baayê rai-nya, wè na dè mör̂u baayê rai-nya.”»

¹⁶ Na wê wii rö pwar̂a-ré wânii na vi méar̂i vi bwir̂i xi-e ka rhâri.

¹⁷ Wè na wêyê né mââyöö na Mosé, aè Ièsu Kérisö, wè na wêyê né vi méar̂i vi bwir̂i mâ avâr̂i na ce.

¹⁸ Na yèri aau rha kâmö ka yè tö rhûû Bâô. Aè o xi-e ka rhaaxâ r̂ö, wè, na tö léwé Pevaa, na bör̂i êr̂ê vèa-è na ce.

Na Ye Vè Avâr̂i Na Ioané Batiyi

¹⁹ Ökââ pè ye vè avâr̂i i Ioané, na cér̂é mö ké nôâ pâi pa nâânévâ mâ pâi xè Lévi mi xè Iérusalèm na pâi xè Juda, cè ké-r̂é vi na ka ërëwaa-è, êr̂ê: «Gèi wîr̂î?»

²⁰ Na dè vi êr̂ê vèa, aè na da aʼvi yiâwîî na ce, aè na dè êr̂ê yè-r̂é, êr̂ê: «Gö da Kérisö.»

²¹ Cér̂é bör̂i ërëwaa-è, êr̂ê: «É a gè mâ wîr̂î? Gè Élia ra?» Na bör̂i êr̂ê yè-r̂é na ce, êr̂ê: «Aè! Na da gènyâ!» Aè cér̂é bör̂i êr̂ê yè-è êr̂ê: «Gè pérövéta ra?» Na bör̂i êr̂ê yè-r̂é, êr̂ê: «Aè.»

²² Cér̂é bör̂i êr̂ê yè-è, êr̂ê: «É a gè mâ wîr̂î? Wè cè gèvé vi na ka êr̂ê yè pâi ré nôâ-vé mi. Jië na néé-i?»

²³ Na bör̂i aʼcëi yè-r̂é na ce êr̂ê: «Gènyâ, wè, mêr̂ê aʼ i ö kâmö ré aʼ rö nékaê, êr̂ê: Rhôôr̂u vè târi wêyê i Ör̂ökau!» Na ûr̂û ké êr̂ê i Isaia pérövéta.

²⁴ Aè pâr̂â kâmö ré é tùr̂ùwaa-r̂é, wè, cér̂é mi rai pâr̂â pâi pâ farésaiö.

²⁵ Cér̂é bör̂i ërëwaa-è tëë mwâr̂â mâ êr̂ê yè-è, êr̂ê: «Gè wêr̂êi, gè vi batiyi na gè êr̂ê gè da Kérisö, mâ gè da Élia bar̂ee, mâ gè da dèxâ pérövéta?»

²⁶ Na bör̂i aʼcëi yè-r̂é na Ioané, êr̂ê: «Gö vi batiyi i rhëë, aè na tömâ rö négowé né-ve na ö kâmö ré gëve da tâwai-e.

²⁷ Ce rö ré mi rhaadè-nya, aè na dö kau yè-nya na ké yè cöö kwé né duö mwâ néxar̂a â-ê.»

²⁸ Pâr̂â kââ-ré, wè é waa rö Bétani, tö é ye né Ioridanô, tö ökâré na vi batiyi rö-i na Ioané.

Ièsu, Arénio I Bâô

²⁹ Tèi nédaa gaar̂a, na bör̂i tö rhûû Ièsu na Ioané, na na vi ua-è mi, na bör̂i êr̂ê na ce, êr̂ê: «Tö rhûû Arénio i Bâô, ce ré kaxe virai yaané i bwêê jë.

³⁰ Ö ce ré gö êr̂ê mâ, êr̂ê: “Na mi rhaadè-nya na rha kâmö ré baayê rai-nya, wè na dè mör̂u baayê rai-nya.”

³¹ Gö da bör̂i rhîâgür̂ü-é, aè gö mi na ka batiyi i rhëë, cè ki pè pèri-e yè pâi xè Israèl.»

³² Na ye vè avâr̂i na Ioané, êr̂ê: «Gö tö rhûû ko na na cêê ria mi xè nékö, na ûr̂û mawi, na bör̂i cuè rö bwêêwé-é.

³³ Aè gö da rhîâgür̂ü-é, aè ö kâmö ré tùr̂ùwaa-nya na ka vi batiyi i rhëë, wè na êr̂ê yè-nya, êr̂ê: “Ki tö rhûû xi-i ko na na cêê ria mi ua-è mâ cuè rö bwêêwé-é, wè ö ce ré vi batiyi i Ko-Ar̂ii.”

³⁴ Gö tö rhûû-é mâ ye vè avâr̂i, wè o i Bâô na ce.»

Pâi Pa Pâgür̂ü Ka Baayê I Ièsu

³⁵ Gaar̂a tëë mwâr̂â, wè, na tömâ cér̂é kaar̂u kâmö xi-e na Ioané.

³⁶ Na bör̂i tö rhûû Ièsu na ce na na vâr̂â, na bör̂i êr̂ê, êr̂ê: «Tö rhûû Arénio i Bâô!»

³⁷ Cur̂u wê pwêr̂ê na duö kâmö xi-e ké êr̂ê xi-e, cur̂u bör̂i vi ua Ièsu.

³⁸ Na bör̂i yabér̂é na Ièsu mâ tö rhûû-r̂u, na cur̂u vi ua-è mi, na bör̂i êr̂ê yè-r̂u, êr̂ê: «Göu vi mè yé?» Cur̂u bör̂i êr̂ê yè-è, êr̂ê: «Rabbi (ökââ na nô né kâmö ka vi pur̂â), âri ökâré gè yè töö-i?»

³⁹ Na bör̂i êr̂ê yè-r̂u na Ièsu êr̂ê: «Göu mi na ka tö rhûû.» Cér̂é bör̂i rhau vi vèâ na ka tö rhûû kaa töö xi-e. Cér̂é bör̂i tö vèâ rèi nédaa-ré rö-i, wè na wê rhêêrè.

⁴⁰ Adèrè, wè, pâdii Simona Pètèru, na dèxâ rai dui ré pwêr̂ê Ioané mâ vi ua Ièsu na cur̂u,

⁴¹ Adèrè, wè na tö rhûû baayê pâriè-è Simona, mâ êr̂ê yè-è, êr̂ê: «Gèvé wê tö rhûû Mésia.» Nô né «Kérisö.»

⁴² Na bör̂i yörhèè-è yè Ièsu. Na bör̂i tö rhûû-é na Ièsu, mâ êr̂ê yè-è, êr̂ê: «Simona, o i Iona; é yè wê aʼyè-i vè Kéfa.» Dèxâ néé-é “Pètèru”.

Filip Mâ Natanaèl

⁴³ Gaar̂a, na bör̂i vi tëë na Galilé na Ièsu, na bör̂i tö rhûû Filip, mâ êr̂ê yè-è, êr̂ê: «Ua-nya mi.»

⁴⁴ Filip, wè kâmö xè Bétsaïda, névâ i bar̂ee Adèrè mâ Pètèru.

⁴⁵ Filip, wè na tö rhûû Natanaèl, mâ êr̂ê yè-è, êr̂ê: «Gèvé tö rhûû ö kâmö ré na êr̂ê na maâyöö ré na yu mâ na Mosé, mâ ka yu i mâ pâr̂â pérövéta, êr̂ê, Ièsu, wè wi xè Nazarèt, o i Ioséfa.»

⁴⁶ Na bör̂i êr̂ê yè-è na Natanaèl, êr̂ê: «Na wii na kââ ka e ré yè pwa mi xè Nazarèt?» Na bör̂i aʼcëi yè-è na Filip, êr̂ê: «Mi cè gèi vi tö rhûû.»

⁴⁷ Na bör̂i tö rhûû Natanaèl na Ièsu, na na mi ua-è, na bör̂i êr̂ê, êr̂ê: «Tö rhûû dö kâmö mi xè Israèl, wè na yèri nô ka vee xi-e.»

⁴⁸ Na bör̂i aʼcëi-e na Natanaèl, mâ êr̂ê yè-è êr̂ê: «Gè rhîâgür̂ü-nya xè-wè?» Na bör̂i êr̂ê yè-è na Ièsu, êr̂ê: «Gö tö rhûû-i rö pûû bââwê na na da tö-aʼyè-i na Filip.»

⁴⁹ Na bör̂i êr̂ê yè-è na Natanaèl, êr̂ê: «Rabbi, gèi rö O i Bâô, gèi rö Ör̂ökau xè Israèl.»

⁵⁰ Na bör̂i êr̂ê yè-è na Ièsu, êr̂ê: «Gè wê tâ néwèi xè-i ké êr̂ê xi-nya yè-i, êr̂ê, gö wê tö rhûû-i rö pûû bââwê? Tö wîr̂î, gè yè mâ tö rhûû pâr̂â kââ ka kau rai kââ-ré.»

⁵¹ Na bör̂i êr̂ê bar̂ee, êr̂ê: «Avâr̂i, avâr̂i, gö êr̂ê yè-ve, êr̂ê, gëve yè tö rhûû nékö na ki mâ cîî, aè pâr̂â angéla i Bâô, wè cér̂é yè vi rua mâ vi ria mi rö bwêêwé o i kâmö!»