Jacques 1 - Ajie New Testament

Nô Né Vi Méar̂i

¹ Gènyâ Iakobo kâmö yar̂i i Bâô mâ Ör̂ökau Ièsu Kérisö, gö nââ vi méar̂i xi-nya ka e yè pâr̂â mwââr̂ö ka pârör̂ö na mâ kaar̂u ré é pè vidù rhar̂i-r̂é.

Tâ Néwèi Mâ Gaamëë

² Pa kaavèâi-nya mwêê, na e na ki gëve tâ néxâi, êr̂ê, pè vi or̂o vè kau na ki pwa yèr̂i-ve na pâr̂â yeyèè ka pi dèxâ na nô né vidù,

³ wè gëve wê tâwai êr̂ê na pè tuö vi pè mör̂ö ka târâdâ na ké yè waa yeyèè yè tâ néwèi xe-ve.

⁴ Aè na e na ki waa nêr̂ê vè mör̂ö na vi pè mör̂ö ka târâdâ-ré, cè ki gëve dö târi kwéyë mâ cè ki da wii na dèxâ kââ ka yè yèri-a rö pwar̂a-ve.

⁵ Nè yèri ké yè gaamëë i wêê nénââ i dèxâ rai-ve, na e na ki pëër̂ii yè Bâô, wè ce ré dè dö nââ yè pâr̂â kâmö, na da xè-i vi vër̂ëë; é yè bör̂i nââ yè-è.

⁶ Aè na e na ki vi pëër̂ii na kâmö rö-i tâ néwèi, aè nè da vi rhèè; wè kâmö ka vi rhèè, wè na virù vèr̂i kwiè rö nérhëë, na kui vèr̂i na kayâ, na bör̂i gë i bwir̂i.

⁷ Aè koa yè tâ néxâi na kâmö ré êr̂ê, nè yè cëi dèxâ kââ rai Ör̂ökau,

⁸ wè na kâmö ré vi rhèè na ce, mâ na vi yini rö-i pâr̂â wêyê xi-e wânii.

Rhauadè Mâ Kigör̂ödiwi

⁹ Na e na kaavèâi ka yèri nékwêêr̂ê-ê cè ki vi or̂o tâ néxâi êr̂ê, na wii ki-e rö rua.

¹⁰ Aè na e na ka kigör̂ödiwi cè ki vi or̂o tâ néxâi êr̂ê, na wii ki-e rö ké pè yar̂i-e, wè nè mâ' yèri-e ûr̂û bûr̂û deewi.

¹¹ Wè na wê pwé na mèèxa mâ tè, na bör̂i mür̂ü na deewi mâ bèi ria na bûr̂û-é, na bör̂i wê yèri ké rhî xi-e; na ûr̂û-ré na kâmö ré kigör̂ödiwi e, wè nè yè yèri-e rö-i pâr̂â wêyê xi-e.

Pâr̂â Waawaa Mâ Pâr̂â Yeyèè

¹² Na kau mâmâ na ko kâmö ré pè mör̂ö-è rai yeyèè. Wè é yè wê cowa waa yeyèè yè-è, nè mâ' cëi na ce bwaar̂a kör̂öna né mör̂u ré na êr̂ê baayê ma' na Ör̂ökau yè pâr̂â kâmö ré tâ néwèi-e.

¹³ Koa yè êr̂ê na dèxâ kâmö, na ké mâ waa yeyèè yè-è, êr̂ê: «É waa yeyèè yè-nya xè-i mi Bâô.» Wè é yè da tâwai waa yeyèè yè Bâô xè-i nô ka yaané, aè na da waa yeyèè yè bar̂ee dèxâ kâmö na ce.

¹⁴ Aè cér̂é dè waa yeyèè yè-r̂é vidù na pâr̂â kâmö, wè na dè yörhèè-r̂é na pâr̂â rhî vè e xé-r̂é ka yaané mâ vi ârui.

¹⁵ Nè yè bör̂i wê tâwé na rhî vè e ka yaané, nè yè bör̂i vi ër̂i yerii, aè nè yè wê kau na yerii, nè yè bör̂i vi ër̂i pèii mé.

¹⁶ Koa yè vi mür̂ü na gëve pâ kaavèâi pa dö wêê nénââ xi-nya.

¹⁷ Aè pâr̂â kwââvâr̂â wânii ka e, mâ pâr̂â ka é nââ vi bwir̂i ka rhîrhér̂é, wè xè-i mi xè rua rai Pevaa i daa, wè na yèri aau ka yè gë rö xi-e, mâ na dö yèri aau dèxâ ui pètâbâ né ké yè pugèwè-è xi-e.

¹⁸ Na ër̂i-ré na ce xè-i nô xi-e ka avâr̂i, ûr̂û rhî vè e xi-e, cè ki gèré ûr̂û pâr̂â pwêê ka baayê rai pâr̂â kââ ré na yaxai na ce.

Pwêr̂ê Mâ Yaxèvè

¹⁹ Pa kaavèâi-nya pa dö wêê nénââ xi-nya mwêê, gëve wê tâwai céréé. Na e na ké-r̂é rhau yè tö pwêr̂ê yawi na pâr̂â kâmö, mâ yidöö rö-i ké yè tëvë, mâ yidöö rö-i ké yè rhôê;

²⁰ wè na da yexèvè câwâ ka târi i Bâô na vi rhôê i kâmö.

²¹ Tö ökâré, virai vèr̂i miir̂i wânii mâ pâr̂â mèèjuu né yaané, aè cëi vèr̂i xè-i wêê nénââ ka kièo nô ré é nai rö xe-ve, ré tâwai yè pè mör̂ö pâr̂â ko-ve.

²² Yaxèvè na gëve nô, aè koa yè tö pwêr̂ê rö, wè na ûr̂û gëve dè pè vi mür̂ü-ve na ki gëve ûr̂û-ré.

²³ Wè nè yè tö pwêr̂ê nô na dèxâ kâmö, nè da bör̂i yaxèvè rö, nè virù vèr̂i na ce ö kâmö ré tö rhûû némèè-è rö mwâ vi koomè, wè na dè tö rhûû-é,

²⁴ na bör̂i vi, aè na tâ nénui tëë na ce ké wê tö rhûû-é xi-e.

²⁵ Aè ö kâmö ré tö rhûû-é rö-i mââyöö ka e kwéyë, wè mââyöö né târi, mâ ka tömâ vè mör̂ö rö-i, mâ ka da tö pwêr̂ê rö mâ tâ nénui, aè na dè köiwaa mâ yaxèvè, wè nè yè wii na aʼvui yè kâmö-ré rö-i pâr̂â nêr̂ê-ê.

²⁶ Nè yè wii na rha kâmö ré tâ néxâi na ce, êr̂ê, na waa ar̂ii, aè na da pöi rö kur̂umé-é mâ na pè vi mür̂ü pwéé-é, na bör̂i da dö kââ na ké waa ar̂ii i ö kâmö-ré.

²⁷ Ökââ câwâ né waa ar̂ii ka korhî mâ na yèri ka yaané xè-i rö némèè Bâô Pevaa, êr̂ê, ki yè vi rhâwaa pâr̂â mû mâ pâr̂â powè jâmé rö-i ké bwêêpë xé-r̂é, mâ ki yè öxar̂a-r̂é rai miir̂i né bwêê jë.