Actes 1 - Ajie New Testament

É Wê Vi Kîbô I Mâ Ko-Ar̂ii Yè Pâi Pa Pâgür̂ü

¹ Téofila éé, Gö wê yu rö dèxâ vi rherhî ka baayê, pâr̂â kââ wânii ré na rhavûû waa na Ièsu, mâ na vi pur̂â i,

² cêmè rua rèi ö nédaa ré é wê pè xi-e na rua, na na wê cowa vi câwâ pâr̂â nô ré rö-i Ko-Ar̂ii yè pâr̂â aposetolo, ré na wê pâbir̂i-r̂é mâ' na ce.

³ Aè na bör̂i wê vi pèri-e yè-r̂é na na mör̂u rhaadè ké vi nénââwêr̂ê vè kau xi-e rö-i pâr̂â pètâbâ ka pôr̂ô yéyé, wè na kaar̂u kâmö nédaa ré cér̂é bâ tö rhûû-é rèi, mâ na bâ tëvër̂i nô né mwâcir̂i i Bâô.

⁴ Na bör̂i tö cér̂é-é, na bör̂i aʼvè néxâi yè-r̂é na ce, êr̂ê, koa yè vi vidù xè Iérusalèm, aè târ̂î wîr̂î ö nô ré na êr̂ê mâ' na Pevaa ré gëve wê pwêr̂ê rai-nyâ.

⁵ Wè na vi batiyi na Ioané i rhëë, aè na da pôr̂ô na pâr̂â nédaa ré é yè mâ batiyi-ve i Ko-Ar̂ii.

Na Tèi Rua Na Ièsu Na Nékö

⁶ Cér̂é bör̂i rhau kâ vèâi-r̂é mâ ërëwaa-è, êr̂ê: «Ör̂ökau éé, na wêr̂êi gè yè pè tuö tëë mwâcir̂i i pâi xè Israèl tèi ö nédaa-ré?»

⁷ Na bör̂i êr̂ê yè-r̂é na Ièsu, êr̂ê: «Na da nêr̂ê-ve na ké yè tâwai pâr̂â nédaa mâ pâr̂â nédö ré na kâ vè tö vâ na Pevaa rö-i dö vi winô xi-e.

⁸ Aè gëve yè cëi awir̂è né Ko-Ar̂ii ka yè pwa rö xe-ve, mâ gëve yè pâi pa ye vè avâr̂i-nya rö Iérusalèm, mâ Juda wânii, mâ Samaria, mâ kwéyë rua rö mèèwâ bwêê jë.»

⁹ Na wê êr̂ê röi pâr̂â nô-ré, é bör̂i pè xi-e rua na cér̂é mö ké tö rhûû-é, na bör̂i rhîwîî pièmè-r̂é rai-e na dèxâ kö.

¹⁰ Cér̂é baxagür̂ü pièmè-r̂é rö xi-e na na mö ké tèi rua, tö rhûû cur̂u bör̂i tö vèa yè-r̂é na kaar̂u kâmö dua cur̂i âmëë ka uè,

¹¹ cur̂u bör̂i êr̂ê, êr̂ê: «Pâi mi xè Galilé éé, na wêr̂êi, gëve bâ baxagür̂ü pièmè-ve, na nékö? Aè ö Ièsu ré é pè xi-e xè pwar̂a-ve na nékö, wè, nè yè mâ pwa tëë na ce ûr̂û ké tö rhûû-é xe-ve na na vi rua na nékö.»

Ka Yè Bawi Juda

¹² Cér̂é bör̂i vi a mwâr̂â tëë na Iérusalèm mi xè gwêêwè né Élaiö ka tö vè ubwa yè Iérusalèm, wè na pâr̂i-r̂é na ké yè vi nai rèi nédaa ar̂ii.

¹³ Aè cér̂é bör̂i wê pwa, cér̂é bör̂i tèi rua na mwâ wêêwa kaa töö xé-r̂é yawi. Aè pâi-ré, wè dè Pètèru, mâ Iakobo, mâ Ioané, mâ Adèrè, mâ Filipo, mâ Tömâ, mâ Bartélémi, mâ Mataio, mâ Iakobo o i Aléfa, mâ Simona ka dö rhî vè e, mâ Juda o i Iakobo.

¹⁴ Cér̂é rhau mör̂ö pwaér̂ö vè rhaaxâ rö-i wêê nénââ ka dö rhaaxâ cér̂é vèâ pâr̂â powè, mâ Maria pâni Ièsu, mâ pâr̂â pâvâdii Ièsu.

¹⁵ Tèi ö nédaa-ré, na bör̂i tömâ rua na Pètèru rö néjêr̂ê pâr̂â pâ kaavèâi-e pa tâwarè kanii kâmö na ma rhaaxâ na ké pôr̂ô xé-r̂é.

¹⁶ Na bör̂i êr̂ê, êr̂ê: «Pâ kaavèâi-nyâ éé, na dè e na ki wê yexèvè ka é wê êr̂ê i Ko-Ar̂ii, rö ka yu mâ', xè-i néwâ David, wa Juda, kâmö ré mèè vâr̂â xé-r̂é na ka tuwir̂i Ièsu.

¹⁷ Wè é wê vâr̂â-ve vèâ-ê, na wê wii yè bar̂ee rö-i nêr̂ê-â.

¹⁸ Aè ö kâmö-ré, wè na urhii néjë i pè urhii câwâ ka yaané, na bèi i némèè, mâ ya tia pwéé, na bör̂i maii na pâr̂â kwéér̂â-ê.

¹⁹ Nô-ré na rhau tö vèa yè-r̂é wânii pâi pa tö Iérusalèm, ökâré pûû ké ye néé néjë ré rö-i mêr̂ê aʼ xé-r̂é êr̂ê: “Akélédama”, nô-né, “Néjë né war̂a.”

²⁰ Aè é wê yu rö-i pèci Salamo, êr̂ê: “Na e na ki aau rö wêê mwâ xi-e, Mâ ki yèri kâmö ka yè cuè rö-i. Dèxâ: Na e na ki mâ pè nêr̂ê-ê na dèxâ kâmö.”

²¹ Na e na ki ye vè avâr̂i na dèxâ rö pwar̂a-ré mör̂u tëë i Ör̂ökau Ièsu.

²² Ö kâmö-ré, wê dèxâ rai cér̂é ré bâ vi ua Ör̂ökau Ièsu rö pâr̂â bwêê vâr̂â xi-e vèâ-r̂é pwânûr̂i névâ, rhavûû rö vi batiyi i Ioané, cêmè rua rèi nédaa ré é wê pè xi-e xè négowé né-r̂é na rua.»

²³ Cér̂é bör̂i pèri kaar̂u kâmö, wè Ioséfa, dèxâ néé-é na Barsabas, aè néé vi aʼyè, wè Justus, aè néé dèxâ, wè Mathaia.

²⁴ Cér̂é bör̂i pwaér̂ö, êr̂ê: «Ör̂ökau éé, Gèi ré rhî tâwai wêê nénââ i pâr̂â kâmö, na e na gèi pèri vèa ka é yè pâbir̂i xi-i rai dui-a,

²⁵ cè ki pè ki-e rö nêr̂ê-â mâ rö ka vi rherhî, ré na wê kâyâi virai na Juda, cè ki wii na dö kaa töö xi-e.»

²⁶ Cér̂é bör̂i vi ya yè-r̂u, na bör̂i wê yexèvè na Mathaia, na bör̂i wê béé pâr̂â aposetolo pa pârör̂ö na ma rhaaxâ na ce.