YOHAN 1 - Ao Naga CL Bible - SQC Edition (BSI)

Taküm O

¹ Tetenzük nung O liasü, aser O Tsüngrem den liasü, aser Oji Tsüngrem liasü.

² Tetenzük dang pa Tsüngrem den liasü.

³ Kechisarena pa ajanga adok, aser kechisa yangluogo, pa medenibo kecha meyanglu.

⁴ Pa dak taküm liasü, aser takümji meimchir tesangwa liasü.

⁵ Tesangwa jagi ammang nung sangwar aser ammangi aji kodanga mesepdaktsütet.

⁶ Tsüngrem nungi yokba nisung ka liasü, pa tenüng Yohan.

⁷ Pa ajanga ajaki amangtsü asoshi tesangwa indang kuli agütsütsü pa kuli asütsü aru.

⁸ Pa tesangwaji masü, saka tesangwa atemaji kuli agütsütsü pa aru.

⁹ Chichiba tesangwa kobai nisung shia sangwatsür, pa atangji alimai arua liasü.

¹⁰ Pa alima nung liasü aser alimaji pa ajanga adok aji saka alimai pa memeteti liasü.

¹¹ Pa pei nübur dangi aru, saka pei nüburtemi paji magizük.

¹² Saka shirisa pa agizükogo, oda shiri pa tenüng nung amang parnok nem Tsüngrem Chirtem akümtsü pai ain agütsü.

¹³ Parnok azü nungi maso, shi-i mulungba agi maso, mesüra nisungi mulungba agi maso saka Tsüngrem nungi aso.

¹⁴ Aser Oji shi aküm aser taochi aser ochi agi sünga asenok rongnung ali, Tebu ajaso Chir ama pa sentsüwangshi onoki angu.

¹⁵ Yohani pa atema kuli asü, aser pai ayimtena ashi, “Shiba atema ni shia liasü ibaji pa, shiba kü sülen arur pa kü dang tama aküm, kechiaser pa kü dang nungi mezüng liasü.”

¹⁶ Kechiaser pa teperiba nungi asenok ajaki taochi madak taochi shilem lemzük;

¹⁷ kechiaser Mosa ajanga ozüng agütsü; saka taochi aser ochi Yisu Khrista ajanga aru.

¹⁸ Nisung shingaia Tsüngrem kecha südanga munguka, saka Ajaso Chir shiba Tebu teku nung lir pai pa jungkai adoktsüogo.

Yohan Baptitsüba Kuli

¹⁹ “Na shiba?” ta pa dang asüngdangtsü asoshi kodang Yihuda nungertemi Yirusalem nungi pa dangi putirtem aser Levitem yok, Yohan kuliji ya liasü.

²⁰ Pai ya ajang ajanga nangzüka ashi, “Ni Khristaji masü.”

²¹ Parnoki pa dang asüngdang, “Ajangla na shiba? Na Elija asü” Pai langzü, “Ni masü.” Parnoki pa dang asüngdang, “Na ainkarji asü?” Pai langzü, “Ainkarji ni masü.”

²² Anungji parnoki pa dang asüngdang, “Ajangla onok tenyartem dang langzütettsüsa na shiba? Nai ne sasa ne indang kechi-a ta ashir?”

²³ Pai langzü, Isaia ainkari ashiba ama: “Kibuba lenkong metong metonga yangluang, ta arem nung kati ayimtenba olaji ni.”

²⁴ Farisitem nungia parnok kar yok,

²⁵ aser parnoki pa dang asüngdang, “Na Khrista-a masü, Elija-a masü, aser ainkarjia masü süra, ajangla nai kechiba baptitsür?”

²⁶ Yohani parnok dang langzü, “Ni tzü nung baptitsür, saka nenok rongnung ka noktaka lir shiba nenoki meshiteter;

²⁷ paji kü sülen arudagi. Pa tsüngsem lisü salatsü ni metemsü.”

²⁸ Yohani baptija alidak, Yordan külen Bethani nung itemi atalok.

Tsüngrem Sanchanu

²⁹ Asüngji pa dangi Yisu aruya pai angu aser ashi, “Alima temenen bener aoba Tsüngrem Sanchanu ajiang!

³⁰ Kü sülen nisung ka arudar shiba kü dang tama kechiaser pa kü dang mezüng liasü ta shiba indang ni ashi ibaji pa.

³¹ Nia pa memeteti liasü, saka pa Israel madang jungkai adokdaktsütsü asoshi ni tzü nung baptija aru.”

³² Yohani kuli agütsü aser ashi. “Tanela posü ka ama kotak nungi alu aser pa dak atemba ni angu.

³³ Ni pa memeteti liasü, saka shibai tzü nung baptitsü ni yok pai kü dang ashi, shiba madak Tanela aluya aser lia ngudir, pai Tanela Temeshi nung baptitsütsü.

³⁴ Ibai Tsüngrem Chir ta ni nguogo aser kuli agütsür.”

Mezüng Nütsüngtem

³⁵ Ano tananüji Yohan pa nütsüng ana den noktaka liasü,

³⁶ Pai Yisu süia angu aser ashi, “Tsüngrem San Chanu ajiang!”

³⁷ Pa nütsüng ana jagi pa nungi aji angashi aser parnoki Yisu sülen anitak.

³⁸ Aser Yisui tejak meyipdang, parnok pa sülen anitakba ngua parnok dang asüngdang, “Nenoki kechi bushir?” Aser parnoki pa dang langzü, “Rabbi (Tetezü tesayur) na kong alir?”

³⁹ Pai parnok dang ashi “Arung aser nenoki angutsü.” Anungji parnok aru, aser pa kong alir aji angu aser panüji parnoki pa den ali, aji pezü baji shi liasü.

⁴⁰ Yohani jembiba angashir Yisu sülen anitakba ana rongnungji kabo Simon Peter tenu Andria liasü.

⁴¹ Pai tamasa tedi Simon ngua pa dang ashi. “Onoki Mesia (Mesia tetezü Khrista) nguogo.”

⁴² Pai pa Yisu dangi anir aru. Yisui pa dak repranga ashi, “Na Yona chir Simon. Ne tenüng Kefa tetezü agi lung ta ajatsü.”

Filip Aser Nathanel Ajaba

⁴³ Asüngji Yisui Galili oya liasü, aser pai Filip angu. Yisui pa dang ashi, “Kü Sülen anitakang.”

⁴⁴ Filipji Andria o Peter tena aliba Bethsaida yimti nungi liasü.

⁴⁵ Filipi Nathanel angu aser ashi, “Yosef chir Nazaret nunger Yisu, shiba indang Mosa Ozüng kaket nung aser ainkartemi zülu onoki pa nguogo.”

⁴⁶ Aser Nathaneli pa dang ashi, “Nazaret nungi langka tajung adoktettsü ama?” Filipi pa dang langzü, “Arung aser ajiang.”

⁴⁷ Yisui Nathanel pa dangi aruba ngua pa dang ashi, “Tekülak maliba chichiba Israel nunger ka ajiang!”

⁴⁸ Nathaneli pa dang asüngdang, “Nai kechi koda ni metet?” Yisui pa dang langzüa ashi, “Filipi na majadang, na mungudong kübok alidang ni na angu.”

⁴⁹ Nathaneli Yisu dang langzüa ashi, “Tesayur, na Tsüngrem Chir, Na Israel nunger Chuba.”

⁵⁰ Yisui pa dang ashi, “Ni na mungudong kübok angu ta ni ne dang ashi nung nai amanger asü? Item dangi tuluba nai angutsü.”

⁵¹ Aser Yisui pa dang ashi, “Atangji ni nenok dang shidi, anüng lapoker Tsüngrem tenyartem Nisung Chir madak atuba aser aluba nenoki angutsü.”