RUTH 1 - Ao Naga CL Bible - SQC Edition (BSI)

Elimelek Aser Par Kibong Moabi Aoba

¹ Obendangertemi yimsü asüba tendak linük nung ayawara ka adok. Aser Yihuda lima Bethlehem nunger nisung ka, pa tebutsü, aser par jabaso ana Moab lima nung amungtsü ao.

² Iba nisung tenüng Elimelek, tebutsü tenüng Naomi, aser par jabaso ana tenüng Malon aser Kilon liasü; parnok Yihuda lima Bethlehem nung alir Efrat nunger. Parnoki Moab limai aru aser yangji ali.

³ Aser la aser par jabaso ana toktsür, Naomi kinungpu Elimelek süadok.

⁴ Aser parnoki parnok kibutsü asoshi Moabtsür agi: ka tenüng Orfa aser tangarla tenüng Ruth; aser yangji parnoki küm ter lir külen,

⁵ Malon o Kilon tenaprongla süadok aser Naomi tebuba aser lar jabaso ana la kija toktsür süadok.

Naomi Aser Ruth Bethlehemi Aoba

⁶ Idangji Moab lima nungi meyiptsü lai lar jabaso kibutsütem den apuso; kechiyong Kibubai pei nübur semdanga parnok nem chiyungtsü agütsüba lai Moab lima nung angashi.

⁷ Aser la jabaso kibutsü ana den lai pei talidak nungi Yihuda limai shilangtsü apuso.

⁸ Idangji Naomi-i lar jabaso kibutsü ana dang ashi, “Oang aser nenaprongla pei tetsü kidangi shilangang; aser nenoki asür dang aser kü dang aochia benshi ama Kibubai nenok dang aochia benshiang.

⁹ Nenaprongla pei pei kinungpu kidang anisüngzük ngutettsüsa Kibubai nena moajang.” Iba sülen lai parnok dak tebang mesep, aser parnoki ola adoka ajeb.

¹⁰ Aser parnoki la dang ashi, “Masü, onoki ne nübur dangi ne den meyipa aotsü”

Naomi-i Orfa Aser Ruth Asoshi Aria Bilemtsüba

¹¹ Naomi-i ashi, “Kü jalatem, meyipa oang; kechiba nenoki kü den aotsü? Nenok kinungpu asütsüsa kü nu menden nung ano jabasotem lir ma?

¹² Meyipang, kü jalatem, nenok lenmangi oang; kechiyong ni kinungpu ka agitsü onsara tantsür kümogo. Ni teimlatsü lir ta ni shira, ni taonung kinungpu ka ngua jabasotem asotsü teimla lir ta shira,

¹³ nenoki parnok tain maküm tashi atadi ma? Anungji nenok kiyi moi alitsü no? Masü, kü jalatem, ya asoshi nenok dang nungi ni ang tesasaba, kechiyong Kibuba teka ni anema mekangogo.”

¹⁴ Aser parnoki ola adoka tanaben ajeb; aser Orfai la kinungpu tetsü dak tebang mesep, saka Ruthbo la dak azüit.

¹⁵ Aser lai ashi, “Ajiang, nenubo pei nübur aser pei tsüngrem dangi meyipa ogo, na-a nenu sülen meyipang.”

¹⁶ Saka Ruthi ashi, “Na toktsütsü aser ne sülen manitaktsü kü dang tajungshi; kechiyong na kongi odir ajagi ni aotsü; na kong lidir angji ni alitsü; ne nübur kü nübur asütsü, aser ne Tsüngremji kü Tsüngrem alitsü;

¹⁷ Na kong südir angji ni asütsü, aser yangji ni aremtsü. Tasüba agi piladaktsüba dak alaka ni na nungi pilara Kibubai kü dak taliang inyakangma.”

¹⁸ Kodang Naomi-i Ruth temulungtetbaji ajitet, lai la dang kecha mashi.

¹⁹ Anungji tena Bethlehem matong tashi ao. Kodang parnok Bethlehem atong, yimti alir ajak atenshi, aser tetsürtemi aoksatepa ashi, “Ibai Naomito na?”

²⁰ Aser lai parnok dang ashi, “Kü dang Naomi mejai Mara ta jaang, kechiyong Takoksangi kü dang kanga kua benshi.

²¹ Ni sünger ao, saka Kibubai ni tanaben kidangi teka tazüng anir aru. Kibubai yimjak nung ni anema inyakba aser Takoksangi ni merenshiba ngur kechiba nenoki kü dang Naomi ajar?”

²² Yamaji Naomi aser lar jabaso kibutsü Moabtsür Ruth, shiba Moab lima nungi meyipa, la den shilang; parnoki barley tsük aruba tenzükdang Bethlehemi aru.