AMOS 1 - Ao Naga CL Bible - SQC Edition (BSI)

¹ Amos shiba Tekoa sannüker rongnung liasü, pai Yihuda chuba Uzzia tendak, aser Israel chuba Yoas jabaso Yeroboam tendak, menoknok marudang küm ana lia, Israel indang pai anguba otem.

Israel Kiyonger Madak Obendangba

² Aser pai ashi, Kibubai Zion nungi arrtsü, aser Yirusalem nungi pa ola adoktsü; sannüker chiyimdaki mang ayimtsü, aser Karmel tenem kolak azüla-a aotsü.

Damaska Anema

³ Yamai Kibubai ashir, “Damaskai ozüng raksaba asem asoshi, oda pezü asoshi, ni temerenshiji magientsü; kechiaser parnoki Gilead dak mo anetba merang agi zükogo.

⁴ Anungji Hazael kidangi ni mi yoktsü, aser aji agi Ben-hadad chuba ki rongreptsü.

⁵ Aser ni Damaska süngkhüm tardangba raksatsütsü, aser Aven lenten nung alir, aser shibai Beth-eden kidong nungi chuba nüsong ama ali, leptoktsütsü; aser Siria nunger Kir tepuokdaki aitsü, ta Kibubai ashir”.

Gaza Aser Filistia Anema

⁶ Yamai Kibubai ashir, “Gazai ozüng raksaba asem asoshi, oda pezü asoshi, ni iba temerenshi magientsü; kechiaser Edom nem agütsütsü asoshi parnoki kin ajonga tepuokdaki bener ao.

⁷ Anungji Gaza jara madaki ni mi yoktsü, aser aji agi chuba kitemji rongreptsü.

⁸ Aser Ashdod nung alir aser Ashkelon nungi shiba chuba nüsong ama ali, ni leptoktsütsü; aser Ekron anema ni teka mekangtsü, aser Filistia nunger tanüngbatem samatsütsü, ta Kibuba Tsüngremi ashir.”

Tair Anema

⁹ Yamai Kibubai ashir, “Tairi ozüng raksaba asem asoshi, oda pezü asoshi, ni iba temerenshi magientsü; kechiaser parnoki Edom nem kin ajonga bendanga agütsü, aser adianu tezüngzüktepba mebilemtet.

¹⁰ Anungji Tair jara madak ni mi yoktsü, aser aji agi chuba kitemji rongreptsü.”

Edom Anema

¹¹ Yamai Kibubai ashir, “Edomi ozüng raksaba asem asoshi, oda pezü asoshi, ni iba temerenshi magientsü; kechiaser pai nok bener pei adianu arishi, aser aria bilemba ajak endokadok, aser tanen maka pa ain adok, aser pai pei terasaba teti ayu.

¹² Anungji ni Teman madak mi yoktsü, aser aji agi Bozra chuba kitemji rongreptsü.”

Ammon Anema

¹³ Yamai Kibubai ashir, “Ammon chirtemi ozüng raksaba asem asoshi, oda pezü asoshi, ni iba temerenshi magientsü; kechiaser parnok arrtsü uludaktsütsü asoshi Gilead nung mashisa aliba tetsürtem parnoki rangpoktsü.

¹⁴ Anungji Rabba jara nung ni mi tsükloktsütsü, aser aji agi chuba kitemji, tongbang nung ayimtenba ola adoka, Tsüngrem mopung aonba anogo nung yipru agi ona rongreptsü.

¹⁵ Aser parnok chuba, pa aser par tongtipur külemi tepuokdaki aotsü,” ta Kibubai ashir.