2 Timoti 1 - 阿美語聖經-新約附詩篇箴言

¹ Ci Pawlo kako, o nano nafaloco'an no Kawas a malatarokosay ni Yis Kristo kako. O papatnak kako to pakayniay i nano nisowalan no Kawas a fa^lohay a 'orip to nano nika laccay ita aci Yis Kristo.

² Patilid kako i tisowanan, Timoti o kaolahan ako a wawa. Nanay, mapaini no Wama a Kawas ato Tapang ita ci Kristo Yis kiso to mikomi ato sini'ada ato rihaday!

O Pikansiya ato Pipa'icel

³ Mikansiya kako i Kawas, matiya o tato'asan ako ko nika tingalaw no faloco' ako a mita'ong toya Kawas. Yo mikansiya kako i Kawas a mitolon to romi'ad to dadaya i, maharateng ako kiso,

⁴ maharateng ako ko losa' iso yo malaliyas kita. Saka, sakatayra:an kako i tisowanan to sakalipahak ako.

⁵ Maharateng ako ko so'linay a piti'er iso ci Kristoan. Matiya o piti'er no mamo iso ci Lois ato ina iso ci Yuniki i tiyaho ko piti'er iso. Paso'lin kako iraay i faloco' iso ko paso'lin no faloco' nangra.

⁶ Orasaka, papiharatengen ako kiso, oya niparocekan no Kawas yo mikapa kako tisowanan a patireng, samatiyaen iso a malacaayay ka padeng a namal koya rocek.

⁷ Nawhani caay ko patalaway ko nipaflian no Kawas i titaanan a 'Adingo. O romasato, onini a 'Adingo i, o paki^melay, o papiolahay, o paka'metay to faloco' Cingra.

⁸ Orasaka, aka ka ngodo a pawacay to pakayniay i Tapang ita. O romasato, aka ka ngodo to pakayniay i nika rofo ako to nano nika tayal ako ci Kristoan. Ka o mapa'icelay no Kawas kiso a milcad takowanan a mapades a mipatnak to Nga'ayay Ratoh.

⁹ O nipa'oripan no Kawas kita a mitahidang a palafinawlan Ningra. Caay ko nano nga'ayay a dmak ita konini, o nano nafaloco'an no Kawas ato mikomi Ningra. Pakaynien no Kawas i ci Yis Kristoan i 'ayaw no nika sanga' no hkal ko pipafli i titaanan tonini a mikomi.

¹⁰ Pakayni i nika talahkal ni Yis Kristo o pa'oripay titaanan a mapahapinangto anini i titaanan konini a sini'ada. Palasawaden ni Kristo ko 'icel no patay. Pakaynien Ningra i Nga'ayay Ratoh ko pipahapinang to mida'ocay a 'orip.

¹¹ Patirengen no Kawas kako a palapatnakay, palatarokos, palapasifana'ay tonini a Nga'ayay Ratoh.

¹² Onini ko sakapades ako to matiniay. Nikawrira, caay ka ngodo kako tonini. Nawhani mafana' kako to niti'eran ako. Paso'lin kako, pakapidipot Cingra toya nipaconohan Ningra i takowanan tangasa i piliyawan no Tapang a tayni saan kako.

¹³ 'Imeren koya nipasifana'an ako i tisowanan a malodado^doen iso a so'linay a sowal. Kararid kiso a ma'imer to piti'er iso ato olah iso to nano nika laccay iso aci Yis Kristo.

¹⁴ Kaoya iraay i faloco' ita a Fangcalay 'Adingo ko sapi'imer iso toya nipaconohan i tisowanan a so'linay a sowal.

¹⁵ Mafana' kiso to nipiliyas no i Aciyaay a tamdamdaw takowanan. Halo ci Fikilus aci Hermokinis a miliyas.

¹⁶ Nanay kaadayayen no Tapang ko paro no loma' ni Onisiforus. Nawhani hinatayni ci Onisiforus a mipa'icel i takowanan. Saka, mahinom ko faloco' ako. Caay ka ngodo cingra to pakayniay i nika rofo ako.

¹⁷ Yo tahini cingra i Loma i, tangsol cingra a misakilikilim takowanan, ta matama ningra kako.

¹⁸ Nanay kaadayayen no Tapang cingra itiya toya piliyawan ni Kristo a tayni. Ano hakowaay ko nitayalan ningra to saki takowanan yo i tiraho i Ifiso kita i, kiso ko tadamafana'ay.