Jemis 1 - Findel i DeeƁwe Ti Alis i Ron

Too'

¹ Kaada moti ii ta kyel i Jemis, yere i DeeƁwe hu i Deembai Yeso Kristi, too' wa kyel i shak gung hure mulang apil i Isar'ila ima si fa mwawei ima si maɓas ta kikyal na naya shak.

Shum hu Amba

² A shunun, mat hun ɗamam ima si wisu ti pipelat na mulut, myan i ma hu wis shum akat-akat,

³ ɓurti hu shangi amba tasi fati mwawei amu ma wa kini hu wis njeng i ka'ti mulut.

⁴ Hon hun ka'ti mulut amu u mbit ro ames, ɓurti hu ngye hu te nggya-nggya, kaciwa' dun ti ɗama.

⁵ Na ɗeng na saa yuti dun piris, u fwal ta kyel i DeeƁwe ima fai gilik, kaciwa' ɗing ti mafwashi i maɗufali, ma wa fa sus.

⁶ Na ha fwali ha fwal ti mwawei ka ha fwal ti mulut apil kwa, ɓurti maɗufal ima fwal ti mulut apil mayus fota gucuk i ham ima se fu' ta yiir mbai wi, yis hatatan ta ngga' ima sei mafu'i ta.

⁷ Maɗufal mai kan mbe' nyai ma wa wisti ɗama ta kyel i Deembai kwa,

⁸ ɓurti maɗufal ma mulut apil-apil kiyan mulut ta kyel andek tasi shak ɗamam ima ma masi kwa.

Ramwayat hu jyel

⁹ Nin myani, hon hun nusu ima mati jyel u nggwak ajin nyai DeeƁwe zanus fit.

¹⁰ Mbai masufat hwak u nggwak ajin ti nyai yis mii foi ɗama kwa. Ɓurti masufat mai mayus wa shok fota mabuf i foti yit.

¹¹ Na ɓwe ti ɗu sai ren ti o, ti kyan falan u shokus, mabufi u ndakus, ɗat amet u rafatus. Angga' ima maramwayat ma wa mot ta saa ti muɗu ta muɗori i juwil ames nai.

¹² Maɗesi masi maɗufal i ma te mangra ti njeng myan ima yis wis ti amba ta saa ti shum wi. Takfai ti maɗufali te mangra ti njeng ma wa wis ti mupwet tasi ambai. Maɗufali ma wa wis ti mal i mupwet ima yis DeeƁwe ma wa fati som ima si ɓwetus.

¹³ Na amba ti wis maɗufal, kan ni, “A DeeƁwe ma mbasus.” Kwa, ɓurti si mbaa DeeƁwe ti mafwashi kwa, yis hwak mbaa ɗeng ti mafwashi kwa.

¹⁴ Shak ta andiyi maɗufal fwar ta amba wi ɓurti yok, a yis dwalus u no'us ya.

¹⁵ Yok mai ma wa al ti mafwashi. Myan ima mafwashi ngye ma wa al ti mot.

¹⁶ Ka hu ɓwet si dangu kwa, a shunun.

¹⁷ Ɗama maɗesi hu mal maɗesi ima hya nggya-nggya yias ii ta fit ta kyel i DeeƁwe makweneng, ima shiyan fota mashilim kwa.

¹⁸ Ti ɓweti i mulut asus myan ima ka mat findel i mwawei, DeeƁwe al kan ɓa ka te ii fe i bya' ta saa ti ɗamam i ma yis masi.

Hali hu Hyai

¹⁹ I ɓweti ɓa hu shangi a shunun, tehun ii som i hal ti findel kang, ka hu te i som findel kang kwa, ka hu te i som futut kang kwa.

²⁰ Ɓurti futut i maɗufal kyan u mas mute mandyasi ima DeeƁwe ma ɓweti kwa.

²¹ Ɓurti andi tabwathun shak ɗamam i zuruk ya ta mulwat yuti, hu ɗamam i wuwish ta hai amu. Fahun haisu wa kyel i DeeƁwe, hu mat findel ames ima yis kin ta mulwat amu. Findel mai ma wa bumsu.

²² Tehun ii som masti ro ti findeli, ka hu dang haisu ta ti hal ti findel kyek kwa. Mas hun aɗeng ima findeli lak.

²³ Shak maɗufal ima hal findeli kyek kaciwa' hyai, ma fota maɗufal ima ha' pa yis ti ɗing ti shishat ames kyek.

²⁴ Takfai tima ɗing haisus, na wis ta kyeli ma wa munitima ti ngga' ima aɗin ɗing haisus ta.

²⁵ Maɗufal ima kin shit ta si anggut manggya-nggyai ima fai maɗufal mute i haisus, cu wei ti masti mai, kaciwa' munitima ti aɗeng ima hali, masti ro, ma wa wis ti maɗesi tasi ɗamam ima ma masi.

²⁶ Na ɗeng ma ɗingi yis a makoltifai ndere, ɗak findyal kaciwa' ambe', mai musut i maɗufali madang ti haisus ta. Kol tifai ames shak a gbya'.

²⁷ Kol tifai ima DeeƁwe Demukan ma ɓweti, a kol tifai asussi ti sapa kaciwa' mafwashi, ɗing ti mushya fo, hu arof ima si ta shum wi ima arya ames si mwatus. Musut i maɗufal mai fwang haisus ya ta zuruk i naya wi.