Judas 1 - Inkeanon

Mga Pagpangamusta

¹ Raya nga sueat hay halin kakon nga si Judas nga igmanghod ni Santiago ag ulipon ni Jesu-Kristo. Nagasueat ako kinyo nga mga tinawag it Dyos nga Ama nga mangin anang katawhan, kamo nga anang mga ginahigugma gid ag ginahaeungan ni Jesu-Kristo.

² Kabay pa nga masamitan pa gid ninyo ro kaeuoy, katawhayan ag paghigugma nga halin sa Dyos.

Dapat nga Depensahan ro Matuod nga Ginaturo ag Indi Magpati sa mga Nagaturo it Eain Karon

³ Mga hinigugma, ro gusto ko gid kunta nga isueat kinyo hay ro hanungod sa kaeuwasan nga nabaton natong mga tumueuo. Ugaling hay mas kinahangean nga sueatan ko kamo ag hinyuon nga inyong depensahan ro matuod nga mensahi nga gintugyan it Dyos katon nga anang mga katawhan. Kumpleto ron ag indi dapat dugangan o bayluhan.

⁴ Ginahambae ko ron ay may mga nakaintra eon kinyo nga mga owa it kahadlok sa Dyos ag owa ninyo masayri ro andang maeain nga tuyo. Anda nga ginabayluhan ro ginaturo parti sa sobrang kabuot it Dyos. Sinanda hay bisan owa kita gapugong-pugong sa atong kaueag hay owa it kaso ay patawaron 't-a kita it Dyos dahil sa anang sobrang kabuot. Ag anda man nga ginapanghiwaea si Jesu-Kristo nga atong solo nga Amo ag Ginuo. Nasueat eon kato-kato pa sa Sagrado nga Kasueatan nga sintinsyahan gid ron sanda nga pinahan.

⁵ Sayod eon gid ninyo ro tanan nakong ihambae parti sa pina it Dyos sa mga nagaobra it saea pero gusto ko nga padumdumon gihapon kamo. Dumduma ninyo nga kato anay hay ginhilway ni Jesus ro mga katawhan it Dyos sa andang pagkaulipon sa Egipto ag ginpaguwa dayon idto. Pero ku ulihi hay ginpinahan nana tag mga owa magtuo, ngani nagkaeamatay sanda tanan sa *disyerto.

⁶ Dumduma man ninyo ro mga anghel kato nga owa makuntento sa pwesto nga ginbutangan kanda it Dyos ngani naghalin sanda sa andang ilistaran. Mawron nga ginkadenahan sanda it Dyos it kadena nga indi mapaeos bisan hasta hin-uno, ag ginpriso sa kadudueman hasta mag-abot ro bukon it basta-basta nga Adlaw nga hukman sanda.

⁷ Ag dumduma man ninyo ro mga tawo sa Sodoma ag Gomora nga nagpinagusto sa pagkaimoral. Makaruyon man ro ginhimo ku andang mga kahilapit nga banwa. Naghulid pa sanda sa andang kapareho nga eaki. Mawron nga ginsunog sanda it Dyos, pati ro andang mga kabanwahan, ag nangin ehemplo sanda kon mauno pinahan it Dyos sa kaeayo nga owa't pagkapaeong ro mga gahimo it maeain.

⁸ Makaruyon man nga kaeainan ro ginaobra ku mga nakaintra ngaron kinyo. Ginabangdanan nanda ro andang mga pananamgo sa andang ginaobra. Nagahimo sanda it makangingil-ad nga mga butang sa andang eawas nga nagapahigko kanda sa mata it Dyos. Nagarebelde sanda sa bisan anong otoridad ag anda pa nga ginapakaeain ro mga kaanghelan sa eangit.

⁹ Pero si Micael nga isaea sa mga pinakapinuno it kaanghelan hay owa't-a ngani nagpasamang-samang nga magkondenar ag magpakaeain kay Satanas tag nagbais sanda katong daywa kon kanyo dapat hiadto ro eawas ni Moises. Ro ginhambae eang ni Micael hay, “Badlungon ka it Ginuong Dyos!”

¹⁰ Pero ro mga nakaintra ngaron kinyo hay owa kaeubot kon ano ro andang mga ginapakaeain. Pareho sanda it mga sapat nga owa it paino-ino nga gasunod eang sa baeatyagon, ay ro anda eang nga hasayran hay ro pagpagusto sa andang maeain nga handom it eawas. Ruyon ro magadaea kanda sa kasamaran nga owa it katapusan nga pina sa impyerno.

¹¹ Makangingidlis gid ro matabo kanda tungod ginatuead nanda ro maeain nga batasan ni Cain kato anay. Ag nagahama-hama gid sanda sa paghimo ku saea nga ginhimo ni Balaam kato anay agod eang makakwarta. Nagarebelde man sanda sa andang mga manogdumaea pareho kay Kora kato anay nga nagrebelde kay Moises ag Aaron. Ngani sa ulihi hay pagapinahan sanda hasta sa owa it katapusan pareho kay Kora ag sa anang mga kaibahan nga nagrebelde kato.

¹² Ro mga nagaturo ngaron it saea hay pareho it mantsa nga nagapaeaw-ay sa manami nga eambong. Nagaiba sanda kinyo kon nagatililipon kamo sa pagkaon kaibahan ku pagdumdum ku pagkamatay it Ginuo, pero owa man sanda nagatahod karon ay nagalinamon ag nagaininom mala't-a sanda. Owa kamo it hipuslan kanda ay pareho sanda it gae-om nga ginaapok it mabaskog nga hangin bago makatueo ro uean. Pareho man sanda it patay nga kahoy nga indi makabunga bisan tigbueunga eon ag nagakaeuka eo't-a.

¹³ Pareho man sanda it mabaskog ag daeagko nga humbak nga nagadinagsa it makangingil-ad nga gaea sa baybayon ay nagahinimo sanda it makangingil-ad nga buhat nga makahueuya. Bukon sanda it pareho it mga bituon nga masaligan nga giya sa pagpamanawon kundi pareho sanda it mga planeta nga matsa nagataeang-taeang sa kaeangitan, ngani ro andang giya hay indi gid masaligan. Gintigan-an eon sanda it Dyos it lugar nga grabi it dueom ag idto sanda magapabilin hasta sa owa it katapusan.

¹⁴ Si Enoc nga isaea sa ikapito nga henerasyon nga halin sa linahi ni Adan hay may ginhambae nga mensahi halin sa Dyos kato pa parti sa mga manogturo ngara. Hambae nana, “Tan-awa ninyo, maabot ro Ginuo kaibahan ro linibo-libo nanang mga balaan nga anghel

¹⁵ agod hukman ro tanan nga mga tawo. Sintinsyahan nana nga pinahan ro tanan nga owa it kahadlok kana sa kaeainan nga andang ginhimo, ag sa grabi it eain nga mga ginhinambae nanda kuntra kana.”

¹⁶ Ro mga tawo ngaron hay perming nagasinura ag nagariniklamo. Ginapinasugtan nanda ro andang mga maeain nga handom. Mga bugaeon sanda ag mayad man magpang-into agod makapamintaha.

¹⁷ Pero kamo't-a, mga hinigugma, dumduma ninyo ro mga ginhambae kato kinyo ku mga *apostoles it atong Ginuo nga si Jesu-Kristo.

¹⁸ Ginhambae nanda kinyo nga sa ulihing mga inadlaw hay may mga tawo nga gatuya-tuya kinyo. Owa sanda it kahadlok sa Dyos ag gapinasugot eang sa andang mga maeain nga handom.

¹⁹ Sanda man ro nagapaaway kinyo agod indi kamo magkaeasugot. Ro anda eang nga ginapaino-ino hay kon ano ro iya sa kalibutan nga kuntra sa Dyos ag owa kanda ro Espirito it Dyos.

Ro Katapusan nga mga Bilin Parti sa Batasan it Mga Tumueuo

^20-21 Pero kamo't-a, mga hinigugma, samtang nagapaabot kamo ku kabuhi nga owa it katapusan nga atong mabaton tungod sa kaeuoy ni Ginuong Jesu-Kristo, magkabuhi kamo permi kon mauno dapat magkabuhi ro mga ginahigugma it Dyos. Mahimo ninyo ra paagi sa inyong pagpalig-on ku inyong pagtuo sa sagrado nga mensahi it Dyos nga ginpahayag kakon, ag paagi sa pagpangamuyo sa paggiya ku Espirito Santo.

²² Kaeuy-i ninyo ro mga nagaisaea-daywa kon ano nga ginaturo ro andang patihan.

²³ Ro mga nagapati eo't-a sa saea nga ginaturo hay paathagi ninyo kon ham-an it saea ro turo ngaron, agod hieuwas ninyo sanda sa maeain nga dangatan karon. Ag ro mga nagtalikod eo't-a sa tama nga ginaturo ag nagbalik eon sa dating makasasaea nga kabuhi hay kaeuy-i ninyo. Ugaling dapat man kamo mahadlok ay basi hitentar kamo nga mag-intra man sa andang saea, nga pareho it higko nga nagamantsa ag nagasamad sa eambong. Ngani kaugti ninyo ro andang makangingil-ad nga saea agod indi kamo hitapnan karon.

Ro Katapusan nga Pamisaea it Pagdayaw sa Dyos

²⁴ Ngani makaron, dayawon ta ro Dyos nga makasarang magbantay kinyo agod indi kamo matentar nga magkasaea, ag makasarang man imaw nga paatubangon kamo kana sa ulihi nga mga owa eon it ikasaway. Ag grabi gid ro inyong kalipay sa inyong pag-atubang kana nga owa it katupong sa pagkadaeayawon.

²⁵ Dayawon gid-a naton ro Dyos. Imaw gid lang ro Dyos. Imaw man ro nag-euwas katon paagi kay Jesu-Kristo nga atong Ginuo. Bago pa gintuga ro bisan ano, hasta makaron ag hasta sa owa it katapusan, imaw eang ro daeayawon, eabaw sa tanan, makagagahom ag may otoridad sa pagdumaea. Amen.