रोमकरस्ले पत्र 1 - आहिराणी नवा करार

नमस्कार

¹ मी पौल, येशु ख्रिस्त ना दास शे, आणि परमेश्वर ना कळून प्रेषित होवा साठे बलावामा एयेल शे आणि तेनी सुवार्ता ना प्रचार करासाठे निवाळा मा एयेल शे.

² परमेश्वर नि ह्या सुवार्ता नि प्रतिज्ञा गैरा पहिलेच आपला भविष्यवक्तास्ना व्दारे परमेश्वर ना पुस्तक मा करेल होती.

³ हय सुवार्ता तेना पोऱ्या, आमना प्रभु येशु ख्रिस्त ना विषय मा शे. तो दाविद ना वंश मा माणुस बनीसन जल्म ले उना

⁴ आणि पवित्र आत्मा ना भाव कण मरेल मधून परत जित्ता होवा मुळे सामर्थ्य कण परमेश्वर ना पोऱ्या येशु ख्रिस्त ठरेल शे.

⁵ येशु ख्रिस्त ना द्वारे परमेश्वर नि मले ख्रिस्त ना प्रेषित ना पद आणि अधिकार दिधा कारण कि तेना नाव ना साठे सर्वा जातीस्ना लोक तेनावर विश्वास करोत आणि तेले स्वीकार करोत.

⁶ जेस्ना मा तुमी बी ज्या रोम शहर मा राहातस मिई जावा आणि येशु ख्रिस्त ना होवा साठे बलावामा एयेल शेतस.

⁷ मी तुमी सर्वा लोकस्ले ज्या रोम शहर मा परमेश्वर ना प्रिय शेतस आणि तेना पवित्र लोक होवा साठे बलावामा एयेल शेतस, हय पत्र लिखस. आमना बाप परमेश्वर आणि प्रभु येशु ख्रिस्त ना कळून तुमले कृपा आणि शांती भेटत राहो.

धन्यवाद नि प्रार्थना

⁸ पहिले मी तुमी सर्वास साठे येशु ख्रिस्त ना व्दारे आपला परमेश्वर ना धन्यवाद करस, कारण कि येशु ख्रिस्त वर तुमना विश्वास नि चर्चा प्रत्येक जागा वर लोकस्ना मधमा हुई ऱ्हायनात.

⁹ परमेश्वर जेनी सेवा मी आपला पुरा हृदय कण तेना पोऱ्या नि सुवार्ता ना विषय मा करस, तोच मना साक्ष शे कि मी तुमले आपली प्रार्थना मा कायम आठवण करत ऱ्हास.

¹⁰ आणि कायम आपली प्रार्थनास्मा विनंती करत ऱ्हास कि परमेश्वर नि ईच्छा कण कोणत्यान-कोणत्या प्रकारे कण मले आखरी वर तुमी लोकस जोळे एवानी संधी भेटो.

¹¹ कारण कि मी तुमले भेटानी लालसा करस एनासाठे कि मी तुमले कोणती तरी आत्मिक कृपादान देवू जेना कण तुमी विश्वास मा पक्का हुई जावोत.

¹² मन सांगान अर्थ हय शे कि जव मी तुमना मधमा ऱ्हासु, त आमी तेनावर विश्वास ना द्वारे जो मना मा आणि तुमना मा शे, एक दुसरा कण प्रोत्साहन भेटो.

¹³ ओ मना विश्वासी भावूसहोण, मले तुमले सांगानी ईच्छा शे कि मनी घडीघडी तुमना जोळे येवानी योजना करी, एनासाठे कि मी तठला लोकस्ले ख्रिस्त ना मांगे चालणारा बनाई सकू जस मनी सर्वा जातीस्ना लोकस्मा करेल शे. पण आते लगून रोका मा उनू.

¹⁴ एना कण काही फरक नई पडत कि लोक सभ्य आणि शिक्षित शे, व जर त्या असभ्य आणि अशिक्षित शे. मी सर्वास्ले सुवार्ता आयकाळाना साठे कर्जदार शे.

¹⁵ म्हणून मी तुमले बी ज्या रोम शहर मा राहातस, सुवार्ता आयकाळाले पुरा तयार शे.

सुवार्ता नि सामर्थ्य

¹⁶ कारण कि मले सुवार्ता आयकाळाना साठे स्वता वर गर्व शे, कारण कि ती प्रत्येक विश्वास करणार ना तारण साठे पहिले त यहुदीस साठे मंग बिगर यहुदीस साठे परमेश्वर नि सामर्थ्य शे.

¹⁷ कारण कि सुवार्ता हय प्रगट करस कि परमेश्वर कोणता प्रकारे लोकस्ले धर्मी ठरावस, हय सुरुवात पासून त आखरी लगून विश्वास ना द्वारे होस. जस शास्त्र मा लिखेल शे, “विश्वास कण धर्मी झन जित्ता राहीन.”

माणुस जाती ना पाप

¹⁸ परमेश्वर ना राग त सर्वा अभक्ति आणि अधर्म ना काम करणारा लोकस्वर स्वर्ग मधून प्रगट होस, जो अधर्म ना कामस्ले कराना द्वारे परमेश्वर ना सत्य ले लोकस्वर प्रगट होवा पासून रोकतस.

¹⁹ कारण कि सगळी मानव जाती ना साठे स्पष्ट शे कि परमेश्वर कसा शे, कारण कि परमेश्वर नि स्वता तेस्ले स्पष्ट रूप कण प्रगट करेल शे.

²⁰ जव पासून परमेश्वर नि जग नि उत्पती करेल शे तव पासून तेना बिगर देखेल गुण, म्हणजे तेना कायम ना सामर्थ्य आणि स्वभाव ले तेना कार्यस्मा देखामा येस, एनासाठे तेस्ना बचावमा कोणताच बाहान नई शे कि त्या परमेश्वर ले नई ओयखतस.

²¹ त्या परमेश्वर ले वयखतस, तरी बी त्या तेना आदर नई करतस जेना योग्य तो शे आणि नईत तेना धन्यवाद करतस. पण तेस्ना विचार पुरा निरर्थक हुई जायेल शेतस आणि तेस्ना निर्बुद्धी मन अंधार कण भरी जायेल शे.

²² त्या सांगतस कि त्या बुद्धीमान शेतस पण त्या मूर्ख शेतस.

²³ अविनाशी परमेश्वर नि महिमा कराना एवजी त्या नाशवंत माणुसस्ना, आणि पक्षीस्ना, आणि सरपटणार जंतुस्नि मूर्तीस्ना गौरव करतस.

²⁴ एनासाठे परमेश्वर नि तेस्ले तेस्ना मन नि वाईट ईच्छा नुसार अशुद्धता साठे सोळी टाक कि त्या आपस मा वाईट कामस्मा आपला शरीर ना अपवित्र करोत.

²⁵ तेस्नी परमेश्वर नि सत्यता वर विश्वास नई ठेव पण जे खोट शे तेनावर विश्वास ठेव, आणि सृष्टी नि उपासना करी, नई कि त्या निर्माणकर्ता नि जो कायम धन्य शे. आमेन.

²⁶ तेस्न अस करा मुळे, परमेश्वर नि तेस्ले वाईट वासनास्ना वश मा सोळी दिधा. आठ लगून कि बायास्नी माणसस संगे नई करता बायास संगे शारीरिक संबंध ठेवू लागनात.

²⁷ त्याच प्रकारे तेस्ना माणसस्नी बी बायस्ना संगे स्वभाविक संबंध ठेवाना सोळीसन माणसस्ना संगे आपस मा कामातुर हुईसन बयाले लागनात. माणुस-माणुस ना संगेच कुकर्म करू लागनात आणि ह्या प्रकारे त्या आपला वाईट वागणूक ना योग्य दंड स्वतास्ले भेटस.

²⁸ जव तेस्नी परमेश्वर ना खरा ज्ञान ले प्राप्त कराले योग्य नई समजत त परमेश्वर नि बी तेस्ले ते सगळ करासाठे, जे अयोग्य होत, तेस्ना वायबार मन ना वश मा सोळी दिध.

²⁹ एनासाठे त्या सर्वा प्रकार ना अधर्म, दृष्टता, लोभ, मत्सर आणि द्वेष कण भरीग्यात, हत्या, झगळा, कपट, ईर्ष्या कण भरपूर हुई ग्यात, चुगली खोर.

³⁰ निंदा करणारा, परमेश्वर ना संगे घृणा करणारा, हिंसक, गर्विष्ठ, बळाईखी मारणारा, वाईट-वाईट गोष्टीस्ले बनावणारा.

³¹ निर्बुद्ध, विश्वासघाती, दयाहीन आणि निर्दय हुई जायेल शेतस.

³² तेस्ले त परमेश्वर नि विधी माहिती शे कि असा काम करणारा मृत्यु ना दंड ना योग्य शेतस, तरी बी नईत फक्त स्वताच असा काम करतस पण करणारस कण खुश बी होतस.